ಗ್ರಾಹಕರಿಗೆ ಕಣ್ಣೀರು ತರಿಸಲಿದೆ ಈರುಳ್ಳಿ: 5 ವರ್ಷಗಳ ಗರಿಷ್ಠ ಮಟ್ಟಕ್ಕೇರಿದ ಸರಾಸರಿ ಸಗಟು ದರ: ಕ್ವಿಂಟಲ್‌ಗೆ 5,400 ರೂ.

ನಾಸಿಕ್: ನಾಸಿಕ್ ಜಿಲ್ಲೆಯ ಲಾಸಲ್‌ಗಾಂವ್ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿ(ಎಪಿಎಂಸಿ) ದೇಶದ ಅತಿದೊಡ್ಡ ಸಗಟು ಈರುಳ್ಳಿ ಮಾರುಕಟ್ಟೆಯಾಗಿದೆ. ಇಲ್ಲಿ ಬುಧವಾರದ ಸರಾಸರಿ ಸಗಟು ಬೆಲೆ ಕ್ವಿಂಟಲ್‌ಗೆ 5,400 ರೂ. ಆಗಿದೆ.

ಐದು ವರ್ಷಗಳಲ್ಲೇ ಗರಿಷ್ಠ ಬೆಲೆಯನ್ನು ದಾಖಲಿಸಿದೆ. ಸರಾಸರಿ ಸಗಟು ಈರುಳ್ಳಿ ಬೆಲೆಯನ್ನು ಡಿಸೆಂಬರ್ 10, 2019 ರಂದು ಈ ಬೆಲೆಯಲ್ಲಿ ಕೊನೆಯದಾಗಿ ದಾಖಲಿಸಲಾಗಿದೆ.

ಸೋಮವಾರ ಲಾಸಲ್‌ಗಾಂವ್‌ನಲ್ಲಿ ಸರಾಸರಿ ಸಗಟು ಈರುಳ್ಳಿ ಬೆಲೆ ಕ್ವಿಂಟಲ್‌ಗೆ 4,770 ರೂ. ಇತ್ತು. ಎಪಿಎಂಸಿ ಅಧಿಕಾರಿಗಳ ಪ್ರಕಾರ ಈರುಳ್ಳಿ ಪೂರೈಕೆ ತೀವ್ರವಾಗಿ ಕುಸಿದಿದ್ದು, ಸರಾಸರಿ ಸಗಟು ಈರುಳ್ಳಿ ಬೆಲೆಯಲ್ಲಿ ಏರಿಕೆಯಾಗಿದೆ. ಸಾಮಾನ್ಯವಾಗಿ ಎಪಿಎಂಸಿಗೆ ನಿತ್ಯ 15 ಸಾವಿರ ಕ್ವಿಂಟಾಲ್‌ ಬರುತ್ತಿದ್ದು, 3 ಸಾವಿರ ಕ್ವಿಂಟಾಲ್‌ಗೆ ಇಳಿಕೆಯಾಗಿದೆ. ಹಳೆ ಬೇಸಿಗೆ ಈರುಳ್ಳಿಯ ಆಗಮನ ಬಹುತೇಕ ಮುಗಿದಿದ್ದು, ಖಾರಿಫ್ ಈರುಳ್ಳಿಯ ಆಗಮನ ಇನ್ನೂ ಹೆಚ್ಚಿಲ್ಲ.

ಜಿಲ್ಲೆಯಲ್ಲಿ ಅಕ್ಟೋಬರ್ 11 ಮತ್ತು 20 ರ ನಡುವೆ ಮಳೆಯಿಂದಾಗಿ ಬಹುತೇಕ ಖಾರಿಫ್ ಈರುಳ್ಳಿ ಬೆಳೆಗಳು ಹಾನಿಗೊಳಗಾಗಿದ್ದು, ಇದರ ಪರಿಣಾಮವಾಗಿ ಈರುಳ್ಳಿಯ ಆಗಮನ ಕಡಿಮೆಯಾಗಿದೆ. ಮಾರುಕಟ್ಟೆಯಲ್ಲಿ ಪರಿಸ್ಥಿತಿ ಸುಧಾರಿಸಲು ಸುಮಾರು ಒಂದು ತಿಂಗಳು ಬೇಕಾಗುತ್ತದೆ ಎಂದು ಎಪಿಎಂಸಿ ಅಧಿಕಾರಿಗಳು ತಿಳಿಸಿದ್ದಾರೆ.

ಇದಲ್ಲದೆ, ಬೇಸಿಗೆ ಈರುಳ್ಳಿ ಸುಮಾರು ಆರು ತಿಂಗಳ ಬಾಳಿಕೆ ಹೊಂದಿರುತ್ತದೆ, ಆದ್ದರಿಂದ ರೈತರು ಬೇಸಿಗೆ ಈರುಳ್ಳಿಯನ್ನು ಸಂಗ್ರಹಿಸಲು ಬಯಸುತ್ತಾರೆ. ಆದರೆ, ಈ ವರ್ಷ ಬೇಸಿಗೆ ಈರುಳ್ಳಿ ದಾಸ್ತಾನು ಬಹುತೇಕ ಖಾಲಿಯಾಗಿದೆ ಎಂದು ಈರುಳ್ಳಿ ವ್ಯಾಪಾರಿ ಮನೋಜ್ ಜೈನ್ ಹೇಳಿದರು.

ಮುಂದಿನ ತಿಂಗಳ ಮಧ್ಯಭಾಗದಿಂದ ಜಿಲ್ಲೆಯಲ್ಲಿ ಹೊಸ ಖಾರಿಫ್ ಈರುಳ್ಳಿ ಆಗಮನ ಪ್ರಾರಂಭವಾಗುವ ನಿರೀಕ್ಷೆಯಿದೆ. ಹೆಚ್ಚುವರಿಯಾಗಿ, ಕಳೆದ ತಿಂಗಳು ಸುರಿದ ಭಾರಿ ಮಳೆಯಿಂದಾಗಿ ಜಿಲ್ಲೆಯಲ್ಲಿ ಖಾರಿಫ್ ಈರುಳ್ಳಿ ಬೆಳೆಗಳು ದೊಡ್ಡ ಪ್ರಮಾಣದಲ್ಲಿ ಹಾನಿಗೊಳಗಾಗಿವೆ ಎಂದು ಅವರು ಹೇಳಿದರು.

ಇದಲ್ಲದೆ, ಮಳೆಯಿಂದ ಉಳಿದುಕೊಂಡಿರುವ ಈರುಳ್ಳಿಯ ಗುಣಮಟ್ಟವೂ ಹದಗೆಟ್ಟಿದೆ. ಬೇಡಿಕೆಗೆ ಹೋಲಿಸಿದರೆ ಪೂರೈಕೆಯಲ್ಲಿನ ಕುಸಿತವು ಲಾಸಲ್‌ಗಾಂವ್‌ನಲ್ಲಿ ಸರಾಸರಿ ಸಗಟು ಈರುಳ್ಳಿ ಬೆಲೆಯಲ್ಲಿ ಏರಿಕೆಗೆ ಕಾರಣವಾಗಿದೆ.

ಕಳೆದ ಎರಡೂವರೆ ತಿಂಗಳಲ್ಲಿ ಸರಾಸರಿ ಸಗಟು ಈರುಳ್ಳಿ ಬೆಲೆಯಲ್ಲಿ ಶೇ.50ರಷ್ಟು ಏರಿಕೆಯಾಗಿದೆ. ಬೇಡಿಕೆಗೆ ಹೋಲಿಸಿದರೆ ಪೂರೈಕೆಯಲ್ಲಿನ ಕುಸಿತದಿಂದಾಗಿ ಆ.24 ರಂದು ಕ್ವಿಂಟಲ್‌ಗೆ 3,600 ರೂ.ನಿಂದ ನವೆಂಬರ್ 6 ರಂದು 5,400 ರೂ.ಗೆ ಏರಿಕೆಯಾಗಿದೆ.

ಬುಧವಾರದಂದು ಲಾಸಲ್‌ಗಾಂವ್‌ನಲ್ಲಿ ಕನಿಷ್ಠ ಮತ್ತು ಗರಿಷ್ಠ ಸಗಟು ಈರುಳ್ಳಿ ಬೆಲೆ ಕ್ರಮವಾಗಿ ಕ್ವಿಂಟಲ್‌ಗೆ 3,951 ರೂ. ಮತ್ತು 5,656 ರೂ. ದರ ದಾಖಲಾಗಿದೆ. ಬುಧವಾರ ಲಾಸಲ್‌ಗಾಂವ್‌ನಲ್ಲಿ ಸುಮಾರು 3,000 ಕ್ವಿಂಟಾಲ್ ಈರುಳ್ಳಿ ಹರಾಜು ನಡೆದಿತ್ತು.