ಬೆಂಗಳೂರಿಗರೇ ಗಮನಿಸಿ: ಬೆಳ್ಳಂದೂರು ಕೆರೆ ರಸ್ತೆ 2 ತಿಂಗಳ ಕಾಲ ಬಂದ್; ನಿಮಗೆ ತಿಳಿದಿರಲಿ ಈ ಪರ್ಯಾಯ ಮಾರ್ಗಗಳ ಡಿಟೇಲ್ಸ್

ನವೆಂಬರ್ 5 ರಿಂದ ದೇವರಬೀಸನಹಳ್ಳಿ-ಸಕ್ರ ಆಸ್ಪತ್ರೆ ಮುಖ್ಯರಸ್ತೆಯ ಮಿಂತ್ರಾ ಅಪಾರ್ಟ್ಮೆಂಟ್ ಮತ್ತು ಬೆಳ್ಳಂದೂರು ಕೋಡಿ ನಡುವಿನ ರಸ್ತೆಯನ್ನು ಮುಂದಿನ 60 ದಿನಗಳ ಕಾಲ ಎಲ್ಲಾ ವಾಹನಗಳಿಗೆ ಮುಚ್ಚಲಾಗುವುದು.

ಚಾಲಕರು ಈ ಅವಧಿಯಲ್ಲಿ ಪರ್ಯಾಯ ಮಾರ್ಗಗಳ‌ ಮೊರೆ ಹೋಗಬೇಕಿದ್ದು, ಅದರ ವಿವರ ಇಲ್ಲಿದೆ.

ಸಂಚಾರ ತಿರುವುಗಳು ಮತ್ತು ಪರ್ಯಾಯ ಮಾರ್ಗಗಳು

1. ಯಮಲೂರಿನಿಂದ ದೇವರಬೀಸನಹಳ್ಳಿ, ಬೆಳ್ಳಂದೂರು ಕಡೆಗೆ ಬರುವ ವಾಹನಗಳು ಹಳೆ ವಿಮಾನ ನಿಲ್ದಾಣ ರಸ್ತೆ, ಯಮಲೂರು ಜಂಕ್ಷನ್, ಮಾರತ್ತಹಳ್ಳಿ ಸೇತುವೆ, ಕಾಡುಬೀಸನಹಳ್ಳಿ ಸೇತುವೆ ಮೂಲಕ ಹೊರ ವರ್ತುಲ ರಸ್ತೆಯಲ್ಲಿ ಸಾಗಬೇಕು.
2. ಯಮಲೂರಿನಿಂದ ಕಾಡುಬೀಸನಹಳ್ಳಿ, ದೇವರಬೀಸನಹಳ್ಳಿ: ಚಾಲಕರು ಯಮಲೂರು ಕೋಡಿಯಲ್ಲಿ ಎಡ ತಿರುವು ತೆಗೆದುಕೊಂಡು, ಹಳೆ ವಿಮಾನ ನಿಲ್ದಾಣ ರಸ್ತೆ, ಯಮಲೂರು ಜಂಕ್ಷನ್ ಮತ್ತು ಯಮಲೂರು ಗ್ರಾಮದ ಮೂಲಕ ಹೋಗಿ ಕರಿಯಮ್ಮನ ಅಗ್ರಹಾರ ರಸ್ತೆ ಮೂಲಕ ಮುಂದುವರಿಯಬಹುದು.
3. ಯಮಲೂರಿನಿಂದ ಹೊರ ವರ್ತುಲ ರಸ್ತೆಗೆ: ಯಮಲೂರು ಕೋಡಿಯಿಂದ ಬೆಳ್ಳಂದೂರು ಕೋಡಿ ಕಡೆಗೆ ಬಲಕ್ಕೆ ತೆಗೆದುಕೊಂಡು, ನಂತರ ಹಳೆ ವಿಮಾನ ನಿಲ್ದಾಣ ರಸ್ತೆ, ಯಮಲೂರು ಜಂಕ್ಷನ್ ಮತ್ತು ಯಮಲೂರು ಗ್ರಾಮದ ಮೂಲಕ ಹೊರ ವರ್ತುಲ ರಸ್ತೆಯನ್ನು ತಲುಪಬಹುದು.
4. ದೇವರಬೀಸನಹಳ್ಳಿ ಮತ್ತು ಬೆಳ್ಳಂದೂರಿನಿಂದ ನಗರಕ್ಕೆ: ಚಾಲಕರು ಹೊರ ವರ್ತುಲ ರಸ್ತೆಯಲ್ಲಿ ಎಡಕ್ಕೆ ತಿರುಗಿ, ಕಾಡುಬೀಸನಹಳ್ಳಿ ಸೇತುವೆಗೆ ಹೋಗಿ, ಮಾರತಹಳ್ಳಿ ಸೇತುವೆಯನ್ನು ದಾಟಿ, ಯಮಲೂರು ಜಂಕ್ಷನ್ ಮೂಲಕ ನಗರಕ್ಕೆ ಹೋಗಬಹುದು.
5. ಕಾಡುಬೀಸನಹಳ್ಳಿ ಮತ್ತು ದೇವರಬೀಸನಹಳ್ಳಿಯಿಂದ ನಗರಕ್ಕೆ: ಕರಿಯಮ್ಮನ ಅಗ್ರಹಾರದಿಂದ ಯಮಲೂರು ಕೋಡಿ ಕಡೆಗೆ ಬಲಕ್ಕೆ ತೆಗೆದುಕೊಂಡು, ಯಮಲೂರು ಗ್ರಾಮದ ಮೂಲಕ ಹಾದು ಹಳೆ ವಿಮಾನ ನಿಲ್ದಾಣ ರಸ್ತೆಯಲ್ಲಿ ನಗರಕ್ಕೆ ಮುಂದುವರಿಯಿರಿ.
6. ಹೊರ ವರ್ತುಲ ರಸ್ತೆಯಿಂದ ನಗರಕ್ಕೆ: ವಾಹನಗಳು ಬೆಳ್ಳಂದೂರು ಕೋಡಿಯಲ್ಲಿ ಎಡಕ್ಕೆ ತಿರುಗಿ ಯಮಲೂರು ಕೋಡಿ ತಲುಪಿ, ನಂತರ ಯಮಲೂರು ಜಂಕ್ಷನ್ ನಲ್ಲಿ ಎಡಕ್ಕೆ ತಿರುಗಿ ಹಳೆ ವಿಮಾನ ನಿಲ್ದಾಣ ರಸ್ತೆಗೆ ಸಂಪರ್ಕ ಕಲ್ಪಿಸಬೇಕು.

ಅನಾನುಕೂಲತೆಯನ್ನು ಕಡಿಮೆ ಮಾಡಲು ಮತ್ತು ಸುಗಮ ಸಂಚಾರವನ್ನು ಖಚಿತಪಡಿಸಿಕೊಳ್ಳಲು ಈ ಅವಧಿಯಲ್ಲಿ ಸಹಕರಿಸುವಂತೆ ಬೆಂಗಳೂರು ಸಂಚಾರ ಪೊಲೀಸರು ನಾಗರಿಕರನ್ನು ಕೋರುತ್ತಿದ್ದಾರೆ.

Traffic advisory ; bellandur lake road closed for white topping work by bbmp authorities , requesting commuters to avoid yamalur towards bellandur lake road to avoid congestion at bellandur lake road.@0RRCA @DCPSouthTrBCP @blrcitytraffic @blrcitytraffic @acphsrtrps @CPBlr pic.twitter.com/8XINMhzxmd

— BELLANDURU TRAFFIC BTP (@bellandurutrfps) November 14, 2024