10 ಸಾವಿರ ರೂಪಾಯಿಗೆ ಯುವಕನಿಂದ ಸೈಕಲ್ ಆಟೋರಿಕ್ಷಾ..! ಒಂದೇ ಚಾರ್ಜ್‌ ನಲ್ಲಿ 150 ಕಿ.ಮೀ. ಸಂಚರಿಸುತ್ತೆ ವಾಹನ

ಕೈಗಾರಿಕೋದ್ಯಮಿ ಆನಂದ್ ಮಹೀಂದ್ರಾ ಆಗಾಗ್ಗೆ ಕೆಲವು ಆಸಕ್ತಿದಾಯಕ ವಿಡಿಯೋಗಳನ್ನು ಶೇರ್​ ಮಾಡುತ್ತಲೇ ಇರುತ್ತಾರೆ. ಅವರು ಈಚೆಗೆ ಪೋಸ್ಟ್​ ಮಾಡಿರುವ ಸೈಕಲ್​ ಆಟೋ ರಿಕ್ಷಾದ ವಿಡಿಯೋ ಒಂದು ಸಾಮಾಜಿಕ ಜಾಲತಾಣದಲ್ಲಿ ಭಾರಿ ವೈರಲ್​ ಆಗಿದ್ದು, ಹಲವರ ಕುತೂಹಲ ಕೆರಳಿಸಿದೆ.

ಆರು ಆಸನಗಳ ಸೈಕಲ್ ಆಟೋ-ರಿಕ್ಷಾ ಇದಾಗಿದೆ. ಇಂಥದ್ದೊಂದು ಕನಸಿನ ರಿಕ್ಷಾ ನಿರ್ಮಿಸುವಲ್ಲಿ ಯಶಸ್ವಿಯಾದ ಗ್ರಾಮೀಣ ಭಾರತದ ಯುವಕನ ವಿಡಿಯೋ ಆನಂದ್​ ಮಹೀಂದ್ರಾ ಶೇರ್ ಮಾಡಿಕೊಂಡಿದ್ದು, ಆತನನ್ನು ಶ್ಲಾಘಿಸಿದ್ದಾರೆ.

ಇದು ವಿದ್ಯುತ್‌ನಿಂದ ಚಲಿಸುತ್ತದೆ ಮತ್ತು ಒಂದೇ ಚಾರ್ಜ್‌ನಿಂದ 150 ಕಿಮೀ ವರೆಗೆ ಕಾರ್ಯನಿರ್ವಹಿಸುತ್ತದೆ ಎಂದು ವಿಡಿಯೋದಲ್ಲಿರುವ ವ್ಯಕ್ತಿ ಹೇಳಿಕೊಂಡಿದ್ದಾನೆ. ಈ ವಾಹನವನ್ನು ನಿರ್ಮಿಸಲು ಬಳಸಲಾದ ಮೊತ್ತ 10 ಸಾವಿರದಿಂದ 12 ಸಾವಿರ ರೂಪಾಯಿ ಮಾತ್ರ. ಕೇವಲ 10 ರೂ.ಗೆ ವಾಹನವನ್ನು ಚಾರ್ಜ್ ಮಾಡಬಹುದು ಎಂದು ವ್ಯಕ್ತಿ ವಿಡಿಯೋದಲ್ಲಿ ಹೇಳಿದ್ದಾನೆ.

ಈ ವ್ಯಕ್ತಿಯ ಆವಿಷ್ಕಾರಕ್ಕೆ ಶ್ಲಾಘನೆ ವ್ಯಕ್ತಪಡಿಸಿರುವ ಆನಂದ್​ ಮಹೀಂದ್ರಾ ಅವರು, ಗ್ರಾಮೀಣ ಸಾರಿಗೆ ಆವಿಷ್ಕಾರಗಳಿಂದ ನಾನು ಯಾವಾಗಲೂ ಪ್ರಭಾವಿತನಾಗಿದ್ದೇನೆ, ಅಲ್ಲಿ ಅವಶ್ಯಕತೆಯು ಆವಿಷ್ಕಾರದ ತಾಯಿಯಾಗಿದೆ ಎಂದಿದ್ದು, ನೆಟ್ಟಿಗರು ಕೂಡ ಶ್ಲಾಘನೆ ವ್ಯಕ್ತಪಡಿಸುತ್ತಿದ್ದಾರೆ.