ಅಮೆಜಾನ್​ ಪ್ರೈಮ್​ ಸದಸ್ಯತ್ವಕ್ಕೆ ಬೆಲೆ ಏರಿಕೆ ಶಾಕ್…!‌ ಹಳೆ ಬೆಲೆಯಲ್ಲೇ ಸದಸ್ಯತ್ವ ಪಡೆಯಲು ನೀವು ಮಾಡಬೇಕಾಗಿದ್ದೇನು….?

ಡಿಸೆಂಬರ್​ 14ರಿಂದ ಅಮೆಜಾನ್​ ಪ್ರೈಮ್​​ ಸದಸ್ಯತ್ವದ ದರವು ಹೆಚ್ಚಾಗಲಿದೆ. ಡಿಸೆಂಬರ್​ 13ರ ಬಳಿಕ ಪ್ರೈಮ್​​ ಮೆಂಬರ್​ಶಿಪ್​ ಭಾರತದಲ್ಲಿ 50 ಪ್ರತಿಶತಕ್ಕಿಂತ ಅಧಿಕವಾಗಲಿದೆ. ಕಂಪನಿಯ ವಾರ್ಷಿಕ ದೀಪಾವಳಿ ಸಂದರ್ಭದಲ್ಲಿ ಅಂದರೆ ಅಕ್ಟೋಬರ್ ತಿಂಗಳಿನಲ್ಲಿ ಕಂಪನಿಯು ಪ್ರೈಮ್​ ಸದಸ್ಯತ್ವ ಶುಲ್ಕ ಹೆಚ್ಚಳದ ಬಗ್ಗೆ ಘೋಷಣೆ ಮಾಡಿದೆ.

ಆದರೆ ಆಗ ಹೊಸ ದರವು ಯಾವಾಗ ಜಾರಿಗೆ ಬರಲಿದೆ ಎಂಬುದನ್ನು ಕಂಪನಿ ಹೇಳಿರಲಿಲ್ಲ. ನವೆಂಬರ್ ತಿಂಗಳ ಕೊನೆಯಲ್ಲಿ ಅಮೆಜಾನ್​​ ದಿನಾಂಕ ಘೋಷಣೆ ಮಾಡಿದೆ.

ಡಿಸೆಂಬರ್​ 13ರವರೆಗೂ ಅಮೆಜಾನ್​ ಪ್ರೈಮ್​ ಸದಸ್ಯತ್ವ ಈಗಿರುವ ದರದಲ್ಲೇ ಇರಲಿದೆ. ಡಿಸೆಂಬರ್​ 14ರಿಂದ ಹೊಸ ದರವು ಜಾರಿಗೆ ಬರಲಿದೆ. ಹೀಗಾಗಿ ಡಿಸೆಂಬರ್ 13ರ ಮಧ್ಯರಾತ್ರಿಯವರೆಗೂ ಗ್ರಾಹಕರು ಹಳೆಯ ದರ ಅಂದರೆ ವಾರ್ಷಿಕ 999 ರೂಪಾಯಿ ಮೌಲ್ಯದಲ್ಲಿಯೇ ತಮ್ಮ ಅಮೆಜಾನ್​ ಪ್ರೈಮ್​ ಸದಸ್ಯತ್ವ ಮುಂದುವರಿಸಬಹುದಾಗಿದೆ.

ಡಿಸೆಂಬರ್​ 13ರ ಬಳಿಕ ಅಮೆಜಾನ್​ ಪ್ರೈಮ್​ ಸದಸ್ಯತ್ವ ದರ ಎಷ್ಟಾಗಲಿದೆ..?

ಡಿಸೆಂಬರ್​ 13ರ ಬಳಿಕ ಗ್ರಾಹಕರು ಅಮೆಜಾನ್​ ಸದಸ್ಯತ್ವ ಪಡೆಯಬೇಕು ಅಂದರೆ 1499 ರೂಪಾಯಿ ಪಾವತಿ ಮಾಡಬೇಕು. ಅಂದರೆ ಗ್ರಾಹಕರ ಜೇಬಿಗೆ ಹೆಚ್ಚುವರಿ 500 ರೂಪಾಯಿಗಳ ಹೊರೆ ಬೀಳಲಿದೆ.

ಈಗಾಗಲೇ ಅಮೆಜಾನ್​ ಪ್ರೈಮ್​ ಸದಸ್ಯತ್ವ ಹೊಂದಿರುವವರು ತಮ್ಮ ಪ್ಲಾನ್​ನ್ನು ಡಿಸೆಂಬರ್​ 13ರವರೆಗೆ ನವೀಕರಿಸಬಹುದಾಗಿದೆ. ಆಫರ್​ ಮುಗಿಯುವ ಒಳಗಾಗಿ ನೀವು ಹಳೆಯ ಬೆಲೆಗೆ ಅಮೆಜಾನ್​ ಪ್ರೈಮ್ ಸದಸ್ಯತ್ವ ಮುಂದುವರಿಸಿಕೊಳ್ಳಿ ಎಂದು ಅಮೆಜಾನ್​ ಹೇಳಿದೆ.