ಮತಾಂತರವಿಲ್ಲದೆ ವಿಶೇಷ ವಿವಾಹ ಕಾಯ್ದೆಯಡಿ ವಿವಾಹವಾಗಬಹುದು; ಅಲಹಾಬಾದ್ ಹೈಕೋರ್ಟ್ ಮಹತ್ವದ ಆದೇಶ

ಅಂತರ್‌ಧರ್ಮೀಯ ಜೋಡಿಗೆ ವಿಶೇಷ ವಿವಾಹ ಕಾಯಿದೆಯಡಿ ಮತಾಂತರವಿಲ್ಲದೆ ವಿವಾಹವಾಗಲು ಕಾನೂನು ಅನುಮತಿ ನೀಡುತ್ತದೆ ಎಂದು ಅಲಹಾಬಾದ್ ಹೈಕೋರ್ಟ್ ಹೇಳಿದೆ.

ಕುಟುಂಬಗಳಿಂದ ಬೆದರಿಕೆ ಎದುರಿಸುತ್ತಿರುವ ಲಿವ್-ಇನ್ ರಿಲೇಶನ್ ಶಿಪ್ ನಲ್ಲಿರುವ ಅಂತರ್‌ಧರ್ಮೀಯ ಜೋಡಿಗೆ ನ್ಯಾಯಾಲಯವು ರಕ್ಷಣೆ ನೀಡಿ, “ಮದುವೆಗಾಗಿ ಮತಾಂತರಗೊಳ್ಳದಿರಲು ನಿರ್ಧರಿಸುವ ಅಂತರ್ ಧರ್ಮೀಯ ಜೋಡಿ ವಿಶೇಷ ವಿವಾಹ ಕಾಯಿದೆಯಡಿಯಲ್ಲಿ ತಮ್ಮ ಮದುವೆ ನೋಂದಾಯಿಸಿಕೊಳ್ಳಬಹುದು” ಎಂದು ತಿಳಿಸಿದೆ.
ರಿವ್ ಇನ್ ರಿಲೇಷನ್ ಶಿಪ್ ನಲ್ಲಿರುವ ಜೋಡಿ ತಮ್ಮ ಜೀವನ ಮತ್ತು ಸ್ವಾತಂತ್ರ್ಯಕ್ಕೆ ಬೆದರಿಕೆ ಎದುರಿಸುತ್ತಿದ್ದು ಇವರಿಗೆ ರಕ್ಷಣೆ ನೀಡುವ ಸಂದರ್ಭದಲ್ಲಿ ನ್ಯಾಯಮೂರ್ತಿ ಜ್ಯೋತ್ಸ್ನಾ ಶರ್ಮಾ ಈ ಆದೇಶ ನೀಡಿದ್ದಾರೆ.

ದಂಪತಿಗಳು ಒಪ್ಪಂದದ ಮೂಲಕ ವಿವಾಹವಾಗಿದ್ದು ಇದು ಕಾನೂನುಬದ್ಧವಾಗಿ ಗುರುತಿಸಲ್ಪಟ್ಟಿಲ್ಲ ಎಂದು ಸರ್ಕಾರವು ಜೋಡಿಯ ಮನವಿಯನ್ನು ವಿರೋಧಿಸಿತು.

ನ್ಯಾಯಾಲಯವು ಸರ್ಕಾರದ ವಾದವನ್ನು ವಜಾಗೊಳಿಸಿ, ಒಪ್ಪಂದದ ಮೂಲಕ ಮದುವೆಯು ಅಮಾನ್ಯವಾಗಿದೆ. ಜೋಡಿ ಮತಾಂತರವಿಲ್ಲದೆಯೇ ವಿಶೇಷ ವಿವಾಹ ಕಾಯಿದೆಯಡಿಯಲ್ಲಿ ನ್ಯಾಯಾಲಯದ ವಿವಾಹಕ್ಕೆ ಅರ್ಜಿ ಸಲ್ಲಿಸಬಹುದು ಎಂದಿತು.

“ನನ್ನ ಅಭಿಪ್ರಾಯದಲ್ಲಿ, ಒಪ್ಪಂದದ ಮೂಲಕ ಮದುವೆಯು ಕಾನೂನಿನಲ್ಲಿ ಖಂಡಿತವಾಗಿಯೂ ಅಮಾನ್ಯವಾಗಿದೆ. ಆದರೆ ವಿಶೇಷ ವಿವಾಹ ಸಮಿತಿಯ ಅಡಿಯಲ್ಲಿ ಮತಾಂತರವಿಲ್ಲದೆ ನ್ಯಾಯಾಲಯದ ವಿವಾಹಕ್ಕೆ ಅರ್ಜಿ ಸಲ್ಲಿಸುವುದನ್ನು ಕಾನೂನು ತಡೆಯುವುದಿಲ್ಲ” ಎಂದು ನ್ಯಾಯಮೂರ್ತಿ ಜ್ಯೋತ್ಸ್ನಾ ಶರ್ಮಾ ತಮ್ಮ ಆದೇಶದಲ್ಲಿ ತಿಳಿಸಿದ್ದಾರೆ.

ತಮ್ಮ ಧರ್ಮವನ್ನು ಬದಲಾಯಿಸದೆ ವಿಶೇಷ ವಿವಾಹ ಕಾಯ್ದೆಯಡಿ ಮದುವೆಯಾಗುವ ಬಯಕೆಯನ್ನು ವ್ಯಕ್ತಪಡಿಸಿದ ಜೋಡಿ ತಮ್ಮ ನೋಂದಣಿಯನ್ನು ಮುಂದುವರಿಸಲು ರಕ್ಷಣೆ ಕೋರಿದರು.

ನ್ಯಾಯಾಲಯವು ಜೋಡಿಗೆ ರಕ್ಷಣೆ ನೀಡಿ ಪೂರಕ ಅಫಿಡವಿಟ್‌ನಲ್ಲಿ ಸಾಕ್ಷ್ಯಚಿತ್ರ ಪುರಾವೆಗಳನ್ನು ಒದಗಿಸುವ ಮೂಲಕ ವಿಶೇಷ ವಿವಾಹ ಕಾಯ್ದೆಯಡಿಯಲ್ಲಿ ಅವರ ವಿವಾಹವನ್ನು ಶಾಸ್ತ್ರೋಕ್ತವಾಗಿ ನಡೆಸುವಂತೆ ಸೂಚಿಸಿತು.

ಮುಂದಿನ ವಿಚಾರಣೆ ಜುಲೈ 10ಕ್ಕೆ ನಿಗದಿಯಾಗಿದೆ. ವಿಶೇಷ ವಿವಾಹ ಕಾಯಿದೆ (SMA), 1954 ವಿವಿಧ ಧರ್ಮಗಳಿಗೆ ಸೇರಿದ ಜನರ ವಿವಾಹಕ್ಕೆ ಕಾನೂನು ಚೌಕಟ್ಟನ್ನು ಒದಗಿಸುತ್ತದೆ. ಈ ಕಾನೂನಿನ ಅಡಿಯಲ್ಲಿ ವ್ಯಕ್ತಿ ತನ್ನ ಧರ್ಮ ಬದಲಾಯಿಸದೆ ಇತರ ಧರ್ಮದ ವ್ಯಕ್ತಿಯೊಂದಿಗೆ ಮದುವೆಯಾಗಬಹುದು.