ಕಾಂಟ್ಯಾಕ್ಟ್ ಲೀಸ್ಟ್ ನಲ್ಲಿದ್ದವರಿಗೆಲ್ಲ ಸೆಂಡ್ ಆಯ್ತು ಸಾಲಗಾರನ ಪತ್ನಿಯ ಅಶ್ಲೀಲ ಫೋಟೊ

ಅಹಮದಾಬಾದ್: ಸಾಲದ ಹಣ ಮರುಪಾವತಿಸಿದರೂ ತನ್ನ ಪತ್ನಿಯ ಅಶ್ಲೀಲ ಚಿತ್ರಗಳನ್ನು ಹಂಚಿಕೊಂಡು ಬೆದರಿಕೆ ಹಾಕಿರುವುದಾಗಿ ಆರೋಪಿಸಿ 34 ವರ್ಷದ ವ್ಯಕ್ತಿಯೊಬ್ಬರು ಸೈಬರ್ ಕ್ರೈಮ್ ಪೊಲೀಸರಿಗೆ ಬುಧವಾರ ದೂರು ನೀಡಿದ್ದಾರೆ.

ಅಹಮದಾಬಾದ್‌ ನ ಬೆಹ್ರಾಂಪುರ ಪ್ರದೇಶದಲ್ಲಿ ವಾಸಿಸುವ ಮತ್ತು ಗಾರ್ಮೆಂಟ್ಸ್ ವ್ಯವಹಾರವನ್ನು ಹೊಂದಿರುವ ವ್ಯಕ್ತಿ ಈ ದೂರನ್ನು ದಾಖಲಿಸಿದ್ದಾರೆ.

ಉದ್ಯಮಿಯ ದೂರು ಪ್ರಕಾರ, ಡಿಸೆಂಬರ್ 28, 2021 ರಂದು, ಕೋವಿಡ್-19 ನಂತರದ ಆರ್ಥಿಕ ಸಮಸ್ಯೆಗಳನ್ನು ಎದುರಿಸಲು ಸ್ನೇಹಿತರೊಬ್ಬರ ಶಿಫಾರಸಿನ ಮೇರೆಗೆ ಅವರು ಅಪ್ಲಿಕೇಶನ್ ಮೂಲಕ ಸಾಲವನ್ನು ಪಡೆದರು. ಅವರು ಆರಂಭದಲ್ಲಿ ಅಪ್ಲಿಕೇಶನ್ ಡೌನ್‌ ಲೋಡ್ ಮಾಡಿ 6,000 ರೂ. ಸಾಲಕ್ಕೆ ವಿನಂತಿಸಿದರು, ವಿವಿಧ ಶುಲ್ಕಗಳನ್ನು ಕಡಿತಗೊಳಿಸಿದ ನಂತರ ಅವರು ಸುಮಾರು 3,480 ರೂ. ಪಡೆದರು. ಸುಮಾರು ಒಂದು ವಾರದ ನಂತರ 6,000 ರೂ.ಗಳನ್ನು ವಾಪಸ್ ನೀಡಿದ್ದಾರೆ ಎಂದು ಎಫ್‌ಐಆರ್‌ನಲ್ಲಿ ತಿಳಿಸಿದ್ದಾರೆ.

ಇದೇ ರೀತಿಯ 14 ಅರ್ಜಿಗಳಿಂದ ಒಟ್ಟು 1.20 ಲಕ್ಷ ರೂ.ಗೆ ಸಾಲ ಪಡೆದಿದ್ದ ಅವರು, ಜನವರಿಯಲ್ಲಿ ಒಟ್ಟು 2.36 ಲಕ್ಷ ರೂ. ಪಾವತಿಸಿದ್ದಾರೆ. ಅವರು ಹಣವನ್ನು ಪಾವತಿಸಿದ ನಂತರವೂ ಇತರ ರಿಕವರಿ ಏಜೆಂಟ್‌ಗಳಿಂದ ಕರೆಗಳು, ಬೆದರಿಕೆ ಕರೆಗಳು ಬರಲಾರಂಭಿಸಿದವು. ಅವರ ಪತ್ನಿಯ ಫೋಟೋ ತೆಗೆದುಕೊಂಡು ಅದನ್ನು ಅಶ್ಲೀಲವಾಗಿ ಬದಲಾಯಿಸಿದ್ದಾರೆ ಎಂದು ದೂರುದಾರರು ಹೇಳಿದ್ದಾರೆ.

ಅಶ್ಲೀಲ ಫೋಟೋವನ್ನು ಮೊದಲು ದೂರುದಾರರಿಗೆ ಇಮೇಲ್ ಮಾಡಲಾಗಿದೆ, ನಂತರ ಅವರ ಸಂಪರ್ಕ ಪಟ್ಟಿಯಲ್ಲಿರುವ ಅವರ ಕುಟುಂಬಕ್ಕೆ ಇಮೇಲ್ ಮಾಡಲಾಗಿದೆ. ಸೈಬರ್ ಅಪರಾಧಿಗಳು ತನಗೆ ಮತ್ತು ಅವರ ಕುಟುಂಬಕ್ಕೆ ಕಿರುಕುಳ ನೀಡುವುದನ್ನು ಮುಂದುವರೆಸಿದ ನಂತರ ದೂರುದಾರರು ಪೊಲೀಸರನ್ನು ಸಂಪರ್ಕಿಸಿದ್ದಾರೆ.