ಬೆರಗಾಗಿಸುತ್ತೆ 80 ರ ಹರೆಯದಲ್ಲೂ ಈ ʼವೃದ್ಧೆʼ ಮಾಡಿದ ಸಾಧನೆ

ಕಲಿಯೋದಕ್ಕೆ ವಯಸ್ಸಿನ ಮಿತಿಯಿಲ್ಲ ಅಂತಾರೆ. ಈ ಮಾತನ್ನ ಹೌದು ಎಂದು ಇನ್ನೊಮ್ಮೆ ಸಾಬೀತು ಪಡಿಸಿದ್ದಾರೆ ಉಜ್ಜಯಿನಿಯ ಶಶಿಕಲಾ ರಾವಲ್​. ಈ ಮಹಿಳೆ ತನ್ನ 80ನೇ ವಯಸ್ಸಿನಲ್ಲಿ ಸಂಸ್ಕೃತದಲ್ಲಿ ಪಿಹೆಚ್​ಡಿ ಪದವಿಗೆ ಭಾಜನರಾಗಿದ್ದಾರೆ.

ಸರ್ಕಾರಿ ಕಾಲೇಜಿನ ಉಪನ್ಯಾಸಕಿ ಆಗಿದ್ದ ಶಶಿಕಲಾ ನಿವೃತ್ತಿ ಹೊಂದಿದ್ದರು. 2009 ರಿಂದ 2011ರವರೆಗೆ ಜ್ಯೋತಿಷ್ಯ ಶಾಸ್ತ್ರದ ಬಗ್ಗೆ ಕಲಿತು ಪದವಿ ಪಡೆದ ಶಶಿಕಲಾ ಅಲ್ಲಿಗೆ ತಮ್ಮ ಓದುವ ಆಸಕ್ತಿಯನ್ನ ನಿಲ್ಲಿಸಲಿಲ್ಲ.

ಪಿಹೆಚ್​ಡಿ ಪದವಿ ಪಡೆಯಬೇಕು ಎಂಬ ಮಹದಾಸೆ ಹೊಂದಿದ್ದ ಶಶಿಕಲಾ, 2019ರಲ್ಲಿ ಪಿಹೆಚ್​ಡಿ ಪೂರ್ಣಗೊಳಿಸಿದ್ದಾರೆ. ಉತ್ತರ ಪ್ರದೇಶ ರಾಜ್ಯಪಾಲೆ ಆನಂದಿಬೆನ್​ ಪಟೇಲ್​​ ಶಶಿಕಲಾಗೆ ಪಿಹೆಚ್​ಡಿ ಪದವಿ ಪ್ರದಾನ ಮಾಡಿದ್ದು ಇಳಿವಯಸ್ಸಿನಲ್ಲಿ ಶಶಿಕಲಾ ಮಾಡಿದ ಸಾಧನೆ ಕಂಡು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ.