ಭಾರತದಾದ್ಯಂತ ಕೋವಿಡ್ -19 ವ್ಯಾಕ್ಸಿನೇಷನ್ ಡ್ರೈವ್ ಸಂಪೂರ್ಣ ಜಾರಿಯಲ್ಲಿದ್ದರೂ, ಕೆಲವು ಜನರು ಲಸಿಕೆ ಹಾಕಿಸಿಕೊಳ್ಳಲು ಇನ್ನೂ ಹಿಂಜರಿಯುತ್ತಾರೆ. ಕೆಲವರು ಸೂಜಿ ಫೋಬಿಯಾದಿಂದ ಇಂಜೆಕ್ಷನ್ ತೆಗೆದುಕೊಳ್ಳಲು ತುಂಬಾ ಹೆದರುತ್ತಾರೆ. ಅಂತಹ ಒಂದು ಉಲ್ಲಾಸದ ವಿಡಿಯೋ ಒಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಪುರುಷರ ಗುಂಪೊಂದು ವ್ಯಕ್ತಿಯನ್ನು ಮನವೊಲಿಸಿ ಲಸಿಕಾ ಕೇಂದ್ರದತ್ತ ಕರೆತರುತ್ತಾರೆ. ಆದರೆ ಆತ ಲಸಿಕಾ ಕೇಂದ್ರದ ಮೆಟ್ಟಿಲು ಹತ್ತಲು ಕೇಳುವುದೇ ಇಲ್ಲ. ಒತ್ತಾಯಪೂರ್ವಕವಾಗಿ ಆತನ ಸ್ನೇಹಿತರು ಲಸಿಕೆ ಹಾಕಿಸಿಕೊಳ್ಳುವಂತೆ ತಳ್ಳುವ ದೃಶ್ಯ ವಿಡಿಯೋದಲ್ಲಿ ಕಾಣಬಹುದು.
ಮಧ್ಯಪ್ರದೇಶದ ಬುಂದೇಲ್‌ಖಂಡ್‌ನಲ್ಲಿರುವ ಲಸಿಕೆ ಕೇಂದ್ರದಲ್ಲಿ ಈ ಘಟನೆ ನಡೆದಿದೆ. 1.20 ನಿಮಿಷಗಳಿರುವ ವಿಡಿಯೋದಲ್ಲಿ ವ್ಯಕ್ತಿಯನ್ನು 4-5 ಜನ ಸ್ನೇಹಿತರು ಸೇರಿ ತಳ್ಳಿದ್ರೂ ಆತ ಲಸಿಕೆ ಪಡೆಯುವುದನ್ನು ವಿರೋಧಿಸಿದ್ದಾನೆ. ಕೊನೆಗೆ ಆತನನ್ನು ಕೆಳಕ್ಕೆ ಬೀಳಿಸಿ ಗಟ್ಟಿಯಾಗಿ ಹಿಡಿದಿಕೊಂಡಿದ್ದಾರೆ. ಈ ವೇಳೆ ಸಿಬ್ಬಂದಿ ಬಂದು ಆತನಿಗೆ ಲಸಿಕೆ ನೀಡಿದ್ದಾರೆ.
ಈ ವಿಡಿಯೋವನ್ನು ಅನಿಲ್ ದುಬೆ ಎಂಬ ಪತ್ರಕರ್ತ ಟ್ವಿಟ್ಟರ್‌ನಲ್ಲಿ ಹಂಚಿಕೊಂಡಿದ್ದು, “ಲಸಿಕೆ ಪಡೆಯುವುದು ಹೇಗೆ, ಯಾರಿಗಾದರೂ ಲಸಿಕೆ ಹಾಕಿಸುವುದು ಕಷ್ಟದ ಕೆಲಸ” ಎಂದು ಶೀರ್ಷಿಕೆ ನೀಡಿದ್ದಾರೆ. ಸದ್ಯ ಈ ವಿಡಿಯೋ ಭಾರಿ ವೈರಲ್ ಆಗಿದೆ.
Loading ...