ರಕ್ತ ಸಂಬಂಧಗಳನ್ನೂ ಮೀರಿದ ಬಂಧ ಅಂದ್ರೆ ಅದು ಸ್ನೇಹ: ನಿಜವಾದ ಸ್ನೇಹಿತರು ಹೇಗಿರುತ್ತಾರೆ….?

ಸ್ನೇಹ ಅಂದ್ರೆ ಏನು? ರಕ್ತ ಸಂಬಂಧಕ್ಕಿಂತಲೂ ಮಿಗಿಲಾಗಿ ತಮ್ಮ ಸ್ನೇಹಿತರಿಗೆ ಜೀವಕ್ಕೆ ಜೀವ ಆಗಿರುವಂಥವರನ್ನು ಸ್ನೇಹಿತರು ಎನ್ನುತ್ತಾರೆ. ತಮ್ಮ ಕಷ್ಟಕ್ಕೆ ಮಿಡಿಯುವವರೇ ನಿಜವಾದ ಸ್ನೇಹಿತರು. ಕೇವಲ ಸುಖದಲ್ಲಿದ್ದಾಗ ಮಾತ್ರವಲ್ಲ, ದುಃಖದಲ್ಲಿದ್ದಾಗಲೂ ಜೊತೆ ನಿಲ್ಲುವವರೇ ಸ್ನೇಹಿತರು. ಪರಸ್ಪರ ಕಚ್ಚಾಡುತ್ತಾ, ಸ್ನೇಹಿತರ ಏಳಿಗೆಯನ್ನು ಸಹಿಸದವ ಎಂದಿಗೂ ಸ್ನೇಹಿತನಾಗಿರಲು ಸಾಧ್ಯವಿಲ್ಲ. ನಿಜವಾದ ಸ್ನೇಹ ಹೇಗಿರಬೇಕು ಗೊತ್ತಾ? ಇಲ್ಲಿದೆ ಐದು ಮುಖ್ಯ ವಿಚಾರಗಳು..

ಚೌಕಾಶಿ ಇಲ್ಲ: ನಿಮ್ಮ ಸ್ನೇಹಿತ ಎಂದಿಗೂ ಪ್ರತಿಯಾಗಿ ಏನನ್ನೂ ನಿರೀಕ್ಷಿಸುವುದಿಲ್ಲ. ನಿಮ್ಮ ಸ್ನೇಹಿತ ತನ್ನ ಸಮಯ, ಪ್ರೀತಿಯನ್ನು ನಿಮ್ಮ ಜೊತೆ ಹೊಂದಿದ್ದರೆ, ಅಂಥ ಸ್ನೇಹಿತರನ್ನು ಎಂದಿಗೂ ಬಿಡಬಾರದು. ಸ್ನೇಹದ ವಿಷಯದಲ್ಲಿ ಚೌಕಾಶಿಯೇ ಇಲ್ಲ.

ನಂಬಲರ್ಹ: ನೀವು ನಿಮ್ಮ ಸ್ನೇಹಿತನನ್ನು ನಂಬಲು ಸಾಧ್ಯವಾದರೆ ಮತ್ತು ನಿಮ್ಮ ಎಲ್ಲಾ ಏರಿಳಿತಗಳಲ್ಲಿ ನಿಮಗೆ ಬೆಂಬಲ ನೀಡಿದರೆ, ಯಾವುದೇ ಸಂದರ್ಭಗಳು ಇರಲಿ, ಆ ಸ್ನೇಹಿತನನ್ನು ಎಂದಿಗೂ ನಿಮ್ಮ ಜೀವನದಿಂದ ಕಳೆದುಕೊಳ್ಳದಿರಿ.

ಕಾಳಜಿ ಮತ್ತು ಆಸಕ್ತಿ: ನಿಮ್ಮ ನಿಜವಾದ ಸ್ನೇಹಿತರು ನಿಮ್ಮ ಆಸಕ್ತಿಯ ಬಗ್ಗೆ ಕಾಳಜಿ ವಹಿಸುತ್ತಾರೆ. ಅವರು ಯಾರ ಮಾತನ್ನೂ ಕೇಳದೆ ಕೇವಲ ನಿಮ್ಮ ಮಾತನ್ನಷ್ಟೇ ಕೇಳುತ್ತಾರೆ. ನಿಮ್ಮ ಯಶಸ್ಸನ್ನು ತಮ್ಮ ಯಶಸ್ಸಿನಂತೆ ಸಂಭ್ರಮಿಸುತ್ತಾರೆ.

ಪ್ರಾಮಾಣಿಕತೆ: ಏನೇ ಇರಲಿ, ನಿಜವಾದ ಸ್ನೇಹಿತರು ನಿಮ್ಮ ಬಳಿಗೆ ಹಿಂತಿರುಗುತ್ತಾರೆ. ನಿಮಗೆ ಸತ್ಯವನ್ನೇ ಹೇಳುತ್ತಾರೆ. ಅವರು ಸ್ಪಷ್ಟ ಸಂವಹನವನ್ನು ಗೌರವಿಸುತ್ತಾರೆ. ಬೇರೆಯವರ ಮಾತು ಕೇಳಿ ನಿಮ್ಮ ಸ್ನೇಹವನ್ನು ಕಳೆದುಕೊಳ್ಳುವುದಿಲ್ಲ.

ಬೆಂಬಲ: ಅಗತ್ಯವಿರುವ ಸಮಯದಲ್ಲಿ ನಿಜವಾದ ಸ್ನೇಹಿತರು ನಿಮ್ಮೊಂದಿಗೆ ಇರುತ್ತಾರೆ. ನಿಮ್ಮ ಭಾವನೆಗಳು ಮತ್ತು ಅನುಭವಗಳೊಂದಿಗೆ ಸಹಾನುಭೂತಿ ಹೊಂದುತ್ತಾರೆ. ನಿಮ್ಮ ಬಗ್ಗೆ ಬೇರೆಯವರು ಏನೇ ಹೇಳಿದ್ರೂ ಅವರನ್ನು ವಿರೋಧಿಸಿ ನಿಮ್ಮ ಪರವಾಗಿ ಮಾತನಾಡುತ್ತಾರೆ. ಕಷ್ಟದಲ್ಲಿ ಬೆಂಬಲವಾಗಿರುತ್ತಾರೆ.