2020 ರಲ್ಲಿ ಭಾರತ ಸರ್ಕಾರವು 200 ಕ್ಕೂ ಹೆಚ್ಚು ಚೀನೀ ಅಪ್ಲಿಕೇಶನ್‌ಗಳನ್ನು ನಿಷೇಧಿಸಿದ ನಂತರ, ಇದೀಗ 36 ಅಪ್ಲಿಕೇಶನ್‌ಗಳು ಮರಳಿ ಬಂದಿವೆ. ಟಿಕ್‌ಟಾಕ್ ಸೇರಿದಂತೆ ಹಲವು ಜನಪ್ರಿಯ ಅಪ್ಲಿಕೇಶನ್‌ಗಳನ್ನು ಭದ್ರತಾ ಕಾರಣಗಳಿಗಾಗಿ ನಿಷೇಧಿಸಲಾಗಿತ್ತು. ಈ ಅಪ್ಲಿಕೇಶನ್‌ಗಳು ಮರುಪ್ರವೇಶಿಸಲು ಬೇರೆ ಬೇರೆ ಮಾರ್ಗಗಳನ್ನು ಅನುಸರಿಸಿವೆ. ಅವುಗಳಲ್ಲಿ ಕೆಲವು ಮರುನಾಮಕರಣಗೊಂಡಿದ್ದರೆ, ಇನ್ನು ಕೆಲವು ಮಾಲೀಕತ್ವ ಬದಲಾಯಿಸಿಕೊಂಡಿವೆ. ಮತ್ತೆ ಕೆಲವು ಭಾರತೀಯ ಕಂಪನಿಗಳೊಂದಿಗೆ ಪಾಲುದಾರಿಕೆ ಮಾಡಿಕೊಂಡಿವೆ.
ಈಗ ಮರಳಿ ಬಂದಿರುವ ಅಪ್ಲಿಕೇಶನ್‌ಗಳಲ್ಲಿ ಕ್ಸೆಂಡರ್, ಮ್ಯಾಂಗೊಟಿವಿ, ಯುಕು, ತಾವೊಬಾವೊ ಮತ್ತು ಟ್ಯಾಂಟಾನ್ ಡೇಟಿಂಗ್ ಅಪ್ಲಿಕೇಶನ್ ಸೇರಿವೆ. ಕ್ಸೆಂಡರ್ ಫೈಲ್ ಶೇರಿಂಗ್ ಅಪ್ಲಿಕೇಶನ್ “ಕ್ಸೆಂಡರ್: ಫೈಲ್ ಶೇರ್, ಶೇರ್ ಮ್ಯೂಸಿಕ್” ಹೆಸರಿನಲ್ಲಿ ಆಪಲ್ ಆಪ್ ಸ್ಟೋರ್‌ನಲ್ಲಿ ಲಭ್ಯವಿದೆ. ಆದರೆ ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ಇನ್ನೂ ಲಭ್ಯವಿಲ್ಲ. ಟ್ಯಾಂಟಾನ್ ಅಪ್ಲಿಕೇಶನ್ “ಟ್ಯಾಂಟಾನ್ – ಏಷ್ಯನ್ ಡೇಟಿಂಗ್ ಅಪ್ಲಿಕೇಶನ್” ಎಂದು ಮರುನಾಮಕರಣಗೊಂಡಿದೆ. ಅಲಿಬಾಬಾ ಗ್ರೂಪ್‌ನ ತಾವೊಬಾವೊ ಯಾವುದೇ ಬದಲಾವಣೆಗಳಿಲ್ಲದೆ ಮರಳಿ ಬಂದಿದೆ.
ಇದಲ್ಲದೆ, ಮ್ಯಾಂಗೊಟಿವಿ ಮತ್ತು ಯುಕು ಯಾವುದೇ ಬದಲಾವಣೆಗಳಿಲ್ಲದೆ ಮರಳಿ ಬಂದಿವೆ. ಕೆಲವು ಅಪ್ಲಿಕೇಶನ್‌ಗಳು ತಮ್ಮ ಬ್ರ್ಯಾಂಡ್ ಮತ್ತು ಮಾಲೀಕರ ಮಾಹಿತಿಯಲ್ಲಿ ಸಣ್ಣ ಬದಲಾವಣೆಗಳನ್ನು ಮಾಡಿವೆ. ಇನ್ನು ಕೆಲವು ಭಾರತೀಯ ಕಂಪನಿಗಳೊಂದಿಗೆ ಒಪ್ಪಂದ ಮಾಡಿಕೊಂಡು ಕಾನೂನುಬದ್ಧವಾಗಿ ಕಾರ್ಯನಿರ್ವಹಿಸಲು ದಾರಿ ಕಂಡುಕೊಂಡಿವೆ. ಉದಾಹರಣೆಗೆ, ಶೆರಿನ್ ಫ್ಯಾಶನ್ ಶಾಪಿಂಗ್ ಅಪ್ಲಿಕೇಶನ್ ರಿಲಯನ್ಸ್‌ನೊಂದಿಗೆ ಪಾಲುದಾರಿಕೆ ಮಾಡಿಕೊಂಡಿದೆ.
2020 ರಲ್ಲಿ ನಿಷೇಧಿಸಲ್ಪಟ್ಟ ಪಬ್‌ಜಿ ಮೊಬೈಲ್, ಬ್ಯಾಟಲ್‌ಗ್ರೌಂಡ್ಸ್ ಮೊಬೈಲ್ ಇಂಡಿಯಾ (ಬಿಜಿಎಂಐ) ಆಗಿ ದಕ್ಷಿಣ ಕೊರಿಯಾದ ಕ್ರಾಫ್ಟನ್ ಕಂಪನಿಯ ಅಡಿಯಲ್ಲಿ ಮರಳಿ ಬಂದಿತ್ತು. ಆದರೆ ಬಿಜಿಎಂಐ ಅನ್ನು 2022 ರಲ್ಲಿ ಮತ್ತೆ ನಿಷೇಧಿಸಲಾಯಿತು. ನಂತರ ಭಾರತದ ಭದ್ರತಾ ನಿಯಮಗಳನ್ನು ಪೂರೈಸಿದ ನಂತರ 2023 ರಲ್ಲಿ ಪುನಃ ಪ್ರಾರಂಭಿಸಲಾಯಿತು.
ಟಿಕ್‌ಟಾಕ್ ಇನ್ನೂ ಮರಳಿ ಬಂದಿಲ್ಲ. ಟಿಕ್‌ಟಾಕ್ ಅಥವಾ ಇತರ ನಿಷೇಧಿತ ಅಪ್ಲಿಕೇಶನ್‌ಗಳು ಭವಿಷ್ಯದಲ್ಲಿ ಮರಳಿ ಬರುತ್ತವೆಯೇ ಎಂದು ಕಾದು ನೋಡಬೇಕಿದೆ.
Loading ...