ಮೆಕ್ಸಿಕೋದಲ್ಲಿ ಮನೆಗಳನ್ನೇ ನುಂಗಿಹಾಕಿದ ಬೃಹತ್ ಸಿಂಕ್​ಹೋಲ್..​..!

ಸ್ಪೇಸ್​ ಕ್ರಾಫ್ಟ್​ ಪತನದಿಂದಾಗಿ ಉಂಟಾದ ಕುಳಿಯೇನೋ ಎಂಬಂತೆ ಕಾಣುವ ಸಿಂಕ್​ಹೋಲ್​ ಒಂದು ಮೆಕ್ಸಿಕೋದ ಕೃಷಿಭೂಮಿ ಒಂದರಲ್ಲಿ ಕಾಣಿಸಿದೆ. ಈ ಸಿಂಕ್​ಹೋಲ್​ ಸುತ್ತಮುತ್ತಲಿನ ಮನೆಗಳನ್ನ ನಾಶ ಮಾಡಿದೆ. ತತ್​ ತಕ್ಷಣದಲ್ಲಿ 60 ಮೀಟರ್​​ ವ್ಯಾಸದಷ್ಟು ಆವರಿಸಿದ ಈ ಸಿಂಕ್​ಹೋಲ್​ ಇನ್ನೂ ದೊಡ್ಡದಾಗುತ್ತಲೇ ಇದೆ.‌

ಕಳೆದ ವಾರ ಮೊದಲ ಬಾರಿಗೆ ಈ ಸಿಂಕ್​ಹೋಲ್​ ಕಾಣಿಸಿಕೊಂಡಾಗ ಮೆಕ್ಸಿಕೋ ಸರ್ಕಾರಿ ಅಧಿಕಾರಿಗಳು ಈ ಸ್ಥಳಕ್ಕೆ ಆಗಮಿಸಿ ಪರಿಶೀಲನೆ ನಡೆಸಿದ್ದರು. ಈ ಸಿಂಕ್​​ಹೋಲ್​ನ ತುಂಬೆಲ್ಲ ನೀರು ತುಂಬಿಕೊಂಡಿದೆ. ಈ ಸಿಂಕ್​ಹೋಲ್​ ಸರಿಸುಮಾರು 60 ಅಡಿ ಆಳ ಹೊಂದಿದೆ ಎಂದು ಅಂದಾಜಿಸಲಾಗಿದೆ. ಈ ಸಿಂಕ್​ಹೋಲ್​ನ ಸಮೀಪ ಸುಳಿಯದಂತೆ ಸ್ಥಳೀಯರಿಗೆ ಅಧಿಕಾರಿಗಳು ಎಚ್ಚರಿಕೆ ನೀಡಿದ್ದಾರೆ.

ಕಳೆದ ಶನಿವಾರ ಮೊದಲ ಬಾರಿಗೆ ಕಾಣಿಸಿಕೊಂಡ ಈ ಸಿಂಕ್​ ಹೋಲ್​ ಇದೀಗ ಸುಮಾರು 70 ಸಾವಿರ ಚದರ ಅಡಿ ವ್ಯಾಪ್ತಿಯ ಕೃಷಿ ಭೂಮಿಯನ್ನ ನುಂಗಿ ಹಾಕಿದೆ. ಈ ಘಟನೆಯಿಂದಾಗಿ ಇಲ್ಲಿಯವರೆಗೆ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ. ಸ್ಥಳೀಯರನ್ನ ಸುರಕ್ಷಿತ ಸ್ಥಳಕ್ಕೆ ಶಿಫ್ಟ್ ಮಾಡಲಾಗಿದೆ ಎಂದು ನ್ಯೂಯಾರ್ಕ್ ಪೋಸ್ಟ್ ವರದಿ ಮಾಡಿದೆ.