ನಮ್ಮ ದೇಹಕ್ಕೆ ಜೀವಸತ್ವಗಳು ಮತ್ತು ಖನಿಜಗಳು ಬಹಳ ಅವಶ್ಯಕ. ಇವೆಲ್ಲವೂ ತರಕಾರಿಗಳಿಂದ ಸಿಗುತ್ತವೆ. ದೃಷ್ಟಿಶಕ್ತಿ ಹೆಚ್ಚಳ, ಹೊಳೆಯುವ ಚರ್ಮಕ್ಕೆ ತರಕಾರಿ ಕಾರಣ. ತೂಕ ನಷ್ಟಕ್ಕೆ ಸಂಬಂಧಿಸಿದ ಸಮಸ್ಯೆಗಳಿದ್ದರೂ ತರಕಾರಿಗಳಿಂದ ಅದಕ್ಕೆ ಪರಿಹಾರ ಸಿಗುತ್ತದೆ. ಆದರೆ ತರಕಾರಿಗಳನ್ನು ಬೇಯಿಸಿ ತಿನ್ನಬೇಕೋ ಅಥವಾ ಹಸಿಯಾಗಿ ತಿನ್ನಬೇಕೋ ಎಂಬ ಗೊಂದಲ ಸಹಜ. ಯಾವ ವಿಧಾನದಲ್ಲಿ ತಿಂದರೆ ಹೆಚ್ಚಿನ ಪೋಷಕಾಂಶಗಳು ಸಿಗುತ್ತವೆ ಎಂಬುದನ್ನು ನೋಡೋಣ. ಕೆಲವರು ಹಸಿ ತರಕಾರಿಗಳನ್ನು ತಿನ್ನುವುದು ಆರೋಗ್ಯಕ್ಕೆ ಹೆಚ್ಚು ಪ್ರಯೋಜನಕಾರಿ ಎಂದು ಹೇಳುತ್ತಾರೆ.
ಕ್ಯಾರೆಟ್ ಅಥವಾ ಮೂಲಂಗಿಯನ್ನು ಹಸಿಯಾಗಿ ತಿಂದುಬಿಡಬಹುದು, ಆದರೆ ಎಲ್ಲವನ್ನೂ ಹಸಿಯಾಗಿ ತಿನ್ನುವುದು ಅಸಾಧ್ಯ. ತರಕಾರಿಗಳನ್ನು ಆವಿಯಲ್ಲಿ ಬೇಯಿಸುವುದರಿಂದ ಅವುಗಳಲ್ಲಿರುವ ಪೋಷಕಾಂಶಗಳು ನಾಶವಾಗುತ್ತವೆ ಎಂಬ ಭಾವನೆ ಕೂಡ ನಮ್ಮಲ್ಲಿ ಮೂಡುತ್ತದೆ. ಸಾಮಾನ್ಯವಾಗಿ ನಾವು ತರಕಾರಿಗಳನ್ನು ಬೇಯಿಸಲು ನೀರಿನಲ್ಲಿ ಕುದಿಸುತ್ತೇವೆ, ಮೈಕ್ರೋವೇವ್‌ ಮಾಡುತ್ತೇವೆ ಅಥವಾ ಉಗಿಯಲ್ಲಿ ಬೇಯಿಸುತ್ತೇವೆ, ಇಲ್ಲವೇ ಎಣ್ಣೆಯಲ್ಲಿ ಫ್ರೈ ಮಾಡುತ್ತೇವೆ. ಸಂಶೋಧನೆಯ ಪ್ರಕಾರ ಆವಿಯಲ್ಲಿ ಬೇಯಿಸುವುದನ್ನು ಹೊರತುಪಡಿಸಿ ಉಳಿದ ಎಲ್ಲಾ ಅಡುಗೆ ವಿಧಾನಗಳು ವಿಟಮಿನ್ ಸಿ ಮತ್ತು ಕ್ಲೋರೊಫಿಲ್‌ಗೆ ಹಾನಿಯನ್ನುಂಟುಮಾಡುತ್ತವೆ.
ತರಕಾರಿಗಳನ್ನು ವಿಶೇಷವಾಗಿ ಬ್ರೊಕೋಲಿಯನ್ನು ಹಬೆಯಲ್ಲಿ ಬೇಯಿಸುವುದು ಆರೋಗ್ಯಕ್ಕೆ ಹೆಚ್ಚು ಉತ್ತಮ ಎಂಬುದು ಸ್ಪಷ್ಟವಾಗಿದೆ. ಪೌಷ್ಟಿಕ ತಜ್ಞರ ಪ್ರಕಾರ ಇತರ ಅಡುಗೆ ವಿಧಾನಗಳಿಗೆ ಹೋಲಿಸಿದರೆ ತರಕಾರಿಗಳನ್ನು ಹಬೆಯಲ್ಲಿ ಬೇಯಿಸುವುದು ಸುರಕ್ಷಿತ ಮತ್ತು ವೇಗದ ವಿಧಾನವಾಗಿದೆ. ತರಕಾರಿಗಳ ಸ್ಟೀಮಿಂಗ್‌ ಪ್ರಕ್ರಿಯೆಯಿಂದ ನಿಯಾಸಿನ್, ಬೀಟಾ ಕ್ಯಾರೋಟಿನ್, ಪ್ಯಾಂಟೊಥೆನಿಕ್ ಆಮ್ಲ ಮತ್ತು ವಿಟಮಿನ್ ಸಿನಂತಹ ಪೋಷಕಾಂಶಗಳು ವ್ಯರ್ಥವಾಗುವುದಿಲ್ಲ, ಹಾಗೇ ಉಳಿಯುತ್ತವೆ.
ಬೇಯಿಸಿದ ತರಕಾರಿಗಳು ಸುಲಭವಾಗಿ ಜೀರ್ಣವಾಗುತ್ತವೆ. ಬ್ರೊಕೊಲಿ, ಎಲೆಕೋಸು ಮತ್ತು ಹೂಕೋಸುಗಳಂತಹ ಕೆಲವು ತರಕಾರಿಗಳನ್ನು ಹಬೆಯಲ್ಲಿ ಬೇಯಿಸುವುದರಿಂದ ಅವು ಮೃದುವಾಗುತ್ತವೆ, ಇದರಿಂದಾಗಿ ಆಹಾರವು ಜೀರ್ಣವಾಗಲು ಹೆಚ್ಚು ಸಮಯ ತೆಗೆದುಕೊಳ್ಳುವುದಿಲ್ಲ. ಹಬೆಯಲ್ಲಿ ಬೇಯಿಸಿದರೆ ತರಕಾರಿಗಳ ಬಣ್ಣ ಮತ್ತು ವಿನ್ಯಾಸವು ಹಾಗೇ ಉಳಿಯುತ್ತದೆ. ಆದರೆ ಉಗಿಯ ಪ್ರಮಾಣ ಹೆಚ್ಚಾದಾಗ ಬಣ್ಣ ಮಾಸುತ್ತದೆ.
Loading ...