ಸೀರೆಯುಟ್ಟ ನಾರಿಯ ಲಾಂಗ್ ಬೋರ್ಡ್ ಸಾಹಸ ಕಂಡು ಬೆರಗಾದ ನೆಟ್ಟಿಗರು

ಲಾಂಗ್ ಬೋರ್ಡ್ ನಲ್ಲಿ ನಿಂತು ರಸ್ತೆಯಲ್ಲಿ ಚಲಿಸುವುದೆಂದರೆ ಒಂದು ರೋಮಾಂಚನವೇ ಸರಿ. ಅದಕ್ಕೆ ಚಾಕಚಕ್ಯತೆಯೂ ಬೇಕು ಮತ್ತು ಬ್ಯಾಲೆನ್ಸ್ ಮಾಡಿ ಚಲಿಸುವ ಕಲೆಯೂ ಕರಗತವಾಗಿರಬೇಕು. ಇಲ್ಲವಾದರೆ, ಕೆಳಗೆ ಬಿದ್ದು ಕೈಕಾಲು ಮುರಿದುಕೊಳ್ಳುವುದಂತೂ ನಿಶ್ಚಿತ. ಸಾಮಾನ್ಯವಾಗಿ ಈ ಲಾಂಗ್ ಬೋರ್ಡ್ ಅನ್ನು ಬಳಸುವವರು ಟ್ರ್ಯಾಕ್ ಸೂಟ್ ಹಾಕಿಕೊಳ್ಳುತ್ತಾರೆ.

ಆದರೆ, ಇಲ್ಲೊಬ್ಬ ಮಹಿಳೆ ಸೀರೆಯನುಟ್ಟು ಕೇರಳದ ರಸ್ತೆಯೊಂದರಲ್ಲಿ ಲಾಂಗ್ ಬೋರ್ಡ್ ಬ್ಯಾಲೆನ್ಸ್ ಮಾಡುತ್ತಾ ಚಲಿಸುತ್ತಿರುವ ವಿಡಿಯೋ ಸಾಕಷ್ಟು ವೈರಲ್ ಆಗಿದೆ.

ಲಾರಿಸ್ಸಾ ಡಿಸಾ ಎಂಬ ಈ ಮಹಿಳೆ ಕೇರಳದ ಸಾಂಪ್ರದಾಯಿಕ ಕಸವು ಸೀರೆಯನ್ನು ಧರಿಸಿ ರಸ್ತೆಯಲ್ಲಿ ಲಾಂಗ್ ಬೋರ್ಡ್ ಮೇಲೆ ಚಲಿಸುತ್ತಾ ಎದುರಾದವರಿಗೆ ನಮಸ್ತೆ ಹೇಳುವ ವಿಡಿಯೋವನ್ನು ತಮ್ಮ ಇನ್ ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.

ತಮ್ಮ ಪಕ್ಕದಲ್ಲಿ ಚಲಿಸುವ ವಾಹನ ಚಾಲಕರಿಗೆ ಮತ್ತು ಪ್ರಯಾಣಿಕರಿಗೆ ವಿಶ್ ಮಾಡುತ್ತಿದ್ದಾರೆ ಈ ವಿಡಿಯೋದಲ್ಲಿ. ನಾನು ಇದನ್ನು ಮಾಡಬೇಕಿತ್ತು. ಸೀರೆಯನ್ನು ಧರಿಸಿ ಲಾಂಗ್ ಬೋರ್ಡ್ ಸಾಹಸ ಮಾಡುವುದು ಸುಲಭದ ಕೆಲಸವಲ್ಲ. ನಾನು ಧೈರ್ಯ ಮತ್ತು ಛಲದಿಂದ ಮಾಡಿದ್ದೇನೆ. ಸಾಕಷ್ಟು ಜನರು ಈ ಸಾಹಸ ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿದರೆ, ಮತ್ತೆ ಕೆಲವರು ನನ್ನೊಂದಿಗೆ ಸೆಲ್ಫಿ ತೆಗೆದುಕೊಂಡಿದ್ದಾರೆ ಎಂದು ಲಾರಿಸ್ಸಾ ಹೇಳಿಕೊಂಡಿದ್ದಾರೆ.

ಅವರ ಈ ಪೋಸ್ಟ್ ಗೆ ಒಂದು ಲಕ್ಷಕ್ಕೂ ಅಧಿಕ ಲೈಕ್ ಗಳು ಬಂದಿದ್ದರೆ, ಹಲವಾರು ನೆಟ್ಟಿಗರು ಈಕೆಯ ಸಾಹಸವನ್ನು ಹೊಗಳಿದ್ದಾರೆ.

https://youtu.be/iR65xsRGhxU