ಸಂಭವನೀಯ ಕೊರೊನಾ 3 ನೇ ಅಲೆ ಎದುರಿಸಲು ಸಿದ್ಧತೆ; 18 ಸಾವಿರ ನರ್ಸ್ ಗಳಿಗೆ 1 ತಿಂಗಳು ತರಬೇತಿ

ಕೊರೊನಾ ಮೂರನೇ ಅಲೆಯ ಆತಂಕ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯದ ಆಸ್ಪತ್ರೆಗಳಲ್ಲಿ ಎಲ್ಲಾ ರೀತಿಯ ತಯಾರಿಗಳನ್ನು ಮಾಡಿಕೊಳ್ಳಲಾಗುತ್ತಿದೆ ಎಂದು ಆರೋಗ್ಯ ಮತ್ತು ವೈದ್ಯಕೀಯ ಶಿಕ್ಷಣ ಸಚಿವ ಡಾ. ಸುಧಾಕರ್​ ಹೇಳಿದ್ರು.

ಬೆಂಗಳೂರಿನಲ್ಲಿ ಈ ವಿಚಾರವಾಗಿ ಮಾತನಾಡಿದ ಅವರು 18 ಸಾವಿರ ನರ್ಸ್​ಗಳಿಗೆ 1 ತಿಂಗಳ ತರಬೇತಿ, ಮಕ್ಕಳ ಐಸಿಯು ಸೇರಿದಂತೆ ಅಗತ್ಯ ಸಿದ್ಧತೆಗಳು ನಡೆಯುತ್ತಿದೆ ಎಂದು ಹೇಳಿದ್ದಾರೆ.

ಆರೋಗ್ಯ ಸೌಧದಲ್ಲಿ ವೈದ್ಯಕೀಯ ಕಾಲೇಜುಗಳ ನಿರ್ದೇಶಕರೊಂದಿಗೆ ವಿಡಿಯೋ ಕಾನ್ಫರೆನ್ಸ್​​ ನಡೆದ ಬಳಿಕ ಮಾತನಾಡಿದ ಅವರು, ಸಂಭವನೀಯ ಮೂರನೇ ಅಲೆ ಹಾಗೂ ಓಮಿಕ್ರಾನ್​​ಗೆ ಚಿಕಿತ್ಸೆ ನೀಡುವ ಬಗ್ಗೆ ಚರ್ಚೆ ನಡೆಸಲಾಯ್ತು. ಒಂದು ಹಾಗೂ 2ನೇ ಅಲೆಯ ಸಂದರ್ಭದಲ್ಲಿ ನರ್ಸ್​ಗಳ ಕೊರತೆ ತುಂಬಾನೇ ಕಾಡಿತ್ತು. ಆದರೆ ಈ ಬಾರಿ ಇಂತಹ ಯಾವುದೇ ಸಮಸ್ಯೆ ಉಂಟಾಗೋದಿಲ್ಲ ಎಂದು ಹೇಳಿದ್ರು.

ಇನ್ನು ಮೂರನೇ ಅಲೆಯಲ್ಲಿ ಮಕ್ಕಳಿಗೆ ಅಪಾಯವಿದೆ ಎಂಬ ತಜ್ಞರ ಮಾಹಿತಿ ಆಧರಿಸಿ ಸಂಪುಟ ಸಭೆಯ ನಿರ್ಧಾರದಂತೆ ಮಕ್ಕಳಿಗೆ ಐಸಿಯು ಸಿದ್ಧಪಡಿಸಲಾಗಿದೆ. ವಿವಿಧ ವೈದ್ಯೋಪಕರಣಗಳ ಖರೀದಿ ಸೇರಿದಂತೆ ಎಲ್ಲಾ ವ್ಯವಸ್ಥೆಗಳನ್ನೂ ಮಾಡಲಾಗಿದೆ ಎಂದು ಹೇಳಿದ್ರು.

ಗೃಹ ವೈದ್ಯರಿಗೆ ನೀಡಬೇಕಾದ ಕೋವಿಡ್​ ರಿಸ್ಕ್​ ಭತ್ಯೆ ನೀಡಲು ಹಣಕಾಸು ಇಲಾಖೆಯಿಂದ 55 ಕೋಟಿ ರೂಪಾಯಿ ಬಿಡುಗಡೆಯಾಗಿದೆ.ಬಾಕಿ ಹಣ ಕೂಡ ಒಂದೆರಡು ದಿನಗಳಲ್ಲಿ ರಿಲೀಸ್​ ಆಗಲಿದೆ. ತಾಂತ್ರಿಕ ದೋಷದಿಂದಾಗಿ ಪ್ರತಿ ತಿಂಗಳು ವೇತನ ಖಾತೆಗೆ ಹಾಕಲು ಸಾಧ್ಯವಾಗಿರಲಿಲ್ಲ. ಆದರೆ ಡಿಸೆಂಬರ್​ನಿಂದ ವೇತನ ನೇರವಾಗಿ ಖಾತೆಗೆ ಜಮೆ ಆಗಲಿದೆ ಎಂದು ಭರವಸೆ ನೀಡಿದ್ದಾರೆ.

ಅಲ್ಲದೇ ಓಮಿಕ್ರಾನ್​ ಹಾಗೂ ಡೆಲ್ಟಾ ಸೋಂಕಿತರ ಚಿಕಿತ್ಸೆಗೆ ಪ್ರತ್ಯೇಕ ವಾರ್ಡ್​ ನೀಡಲು ನಿರ್ಧರಿಸಲಾಗಿದೆ. ಆಫ್ರಿಕಾದಿಂದ ಆಗಮಿಸಿದ 57 ಪ್ರಯಾಣಿಕರ ಬಗ್ಗೆ ವಿಶೇಷ ಗಮನವನ್ನೂ ನೀಡಿದ್ದೇವೆ. ಪೊಲೀಸ್​ ಇಲಾಖೆಯ ನೆರವಿನಿಂದ ಎಲ್ಲರನ್ನೂ ಟ್ರ್ಯಾಕ್​ ಮಾಡಲಾಗುತ್ತೆ ಎಂದು ಹೇಳಿದ್ರು.