ಶಾಲೆಯಲ್ಲಿ ಶೂಟಿಂಗ್​ ನಡೆದರೆ ರಕ್ಷಿಸಿಕೊಳ್ಳುವುದು ಹೇಗೆ…..? ತಾಯಿ ಹೇಳಿಕೊಟ್ಟ ಪಾಠ

ಮುಂದುವರಿದ ದೇಶದ ಶಾಲೆಗಳಲ್ಲಿ ಆಗಾಗ್ಗೆ ಶೂಟಿಂಗ್​ ಅವಘಡ ನಡೆಯುವುದುಂಟು. ಅಮೆರಿಕಾದಲ್ಲಿ ಸಾಕಷ್ಟು ಪ್ರಕರಣ ನಡೆಯುತ್ತಿವೆ. ಹೀಗಾಗಿ ತಾಯಂದಿರು ಶೂಟಿಂಗ್​ನಿಂದ ರಕ್ಷಿಸಿಕೊಳ್ಳುವ ಪಾಠವನ್ನು ತಮ್ಮ ಮಕ್ಕಳಿಗೆ ಮಾಡಬೇಕಾದ ಅನಿವಾರ್ಯತೆ ಇದೆ.

ಇದೀಗ ಐದು ವರ್ಷದ ಬಾಲಕನ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ಚರ್ಚೆಯಾಗುತ್ತಿದೆ. ಶಾಲೆಯಲ್ಲಿ ಶೂಟಿಂಗ್​ ವೇಳೆ ಏನು ಮಾಡಬೇಕು ಎಂದು ತಾಯಿ ಮಗನಿಗೆ ಸೂಚನೆ ನೀಡುತ್ತಿರುವುದು ವಿಡಿಯೋದಲ್ಲಿದೆ.

ವೀಡಿಯೊವನ್ನು ಆರಂಭದಲ್ಲಿ ಟಿಕ್​ಟಾಕ್​ನಲ್ಲಿ ಹಂಚಿಕೊಳ್ಳಲಾಗಿತ್ತು. ಅಲ್ಲಿ ಅದು ಲಕ್ಷಾಂತರ ವೀಕ್ಷಣೆಗಳನ್ನು ಹೊಂದಿದೆ. ನಂತರ ಇದನ್ನು ಟ್ವಿಟರ್​ ಮತ್ತು ಇನ್​ಸ್ಟಾಗ್ರಾಮ್​ನಲ್ಲಿಯೂ ಹಂಚಿಕೊಳ್ಳಲಾಗಿದೆ.

ಒಕ್ಲಹೋಮಾದ ಮ್ಯಾಕ್​ಅಲೆಸ್ಟರ್​ನಲ್ಲಿ ಎರಡು ಮಕ್ಕಳ ತಾಯಿಯಾದ 22 ವರ್ಷದ ಕ್ಯಾಸ್ಸಿ ವಾಲ್ಟನ್​ ತನ್ನ ಮಗ ವೆಸ್ಟನ್​ನೊಂದಿಗೆ ಶಾಲೆಯ ಶೂಟಿಂಗ್​ ಡ್ರಿಲ್​ ಮಾಡಿದಳು.

ವಿಡಿಯೋದ ಹಿನ್ನೆಲೆಯಲ್ಲಿ ತಾಯಿಯ ಸೂಚನೆಗಳನ್ನು ಕೇಳಬಹುದು ಮತ್ತು ಚಿಕ್ಕ ಹುಡುಗ ಅದನ್ನು ಎಚ್ಚರಿಕೆಯಿಂದ ಅನುಸರಿಸುತ್ತಾನೆ. ಶೂಟಿಂಗ್​ನಂತಹ ಯಾವುದೇ ಅಹಿತಕರ ಘಟನೆಯಿಂದ ತನ್ನನ್ನು ರಕ್ಷಿಸಿಕೊಳ್ಳಲು ಬುಲೆಟ್​ ಪ್ರೂಫ್​ ಸ್ಪೈಡರ್​ ಮ್ಯಾನ್​ ಬ್ಯಾಕ್​ಪ್ಯಾಕ್​ ಹೊಂದಿರುವ ಬಾಲಕ ಶಾಲೆಯಲ್ಲಿ ಗುಂಡಿನ ದಾಳಿ ನಡೆದರೆ ಬ್ಯಾಕ್​ಪ್ಯಾಕ್​ನಿಂದ ಯಾವ ರೀತಿ ಬಚ್ಚಿಟ್ಟು ರಕ್ಷಿಸಿಕೊಳ್ಳಬೇಕು ಎಂದು ತಾಯಿ ಮಗನಿಗೆ ನಿರ್ದೇಶನ ನೀಡುತ್ತಾಳೆ.

ಸುದ್ದಿಮಾಧ್ಯಮದೊಂದಿಗೆ ಮಾತನಾಡಿದ ತಾಯಿ ವಾಲ್ಟನ್​, ತನ್ನ ಮಗನಿಗೆ ಈ ಪಾಠ ಮುಖ್ಯವಾದ ಕಾರಣವನ್ನು ಪ್ರಸ್ತಾಪಿಸಿದರು. ನಾನು ವೀಡಿಯೊವನ್ನು ಚಿತ್ರೀಕರಿಸುವಾಗ, ನಾನು ಎಲ್ಲಾ ಕಣ್ಣೀರನ್ನು ಹಿಂದಕ್ಕೆ ತಳ್ಳುತ್ತಿದ್ದೆ, ಎಲ್ಲವನ್ನೂ ಹೊರಹಾಕಲು ಪ್ರಯತ್ನಿಸುತ್ತಿದ್ದೆ. ಅವನು ತುಂಬಾ ಬುದ್ಧಿವಂತ, ಮತ್ತು ಅವನು ಎಲ್ಲಾ ಮಾಹಿತಿಯನ್ನು ಚೆನ್ನಾಗಿ ತೆಗೆದುಕೊಂಡನು, ಹೆದರುತ್ತಿರಲಿಲ್ಲ. ಇದು ಗಂಭೀರ ಪರಿಸ್ಥಿತಿ ಎಂದು ಆತ ತಿಳಿದಿದ್ದ ಎಂದು ವಿವರಿಸಿದರು.

ವರದಿಯ ಪ್ರಕಾರ ಆಗಸ್ಟ್​ 1, 2021 ಮತ್ತು ಮೇ 31, 2022ರ ನಡುವೆ ಶಾಲಾ ಮೈದಾನದಲ್ಲಿ 193 ಗನ್​ ಹಿಂಸಾಚಾರ ಘಟನೆಗಳು ನಡೆದಿವೆ. 2021- 22ರಲ್ಲಿ ಯುಎಸ್​ನಲ್ಲಿ ಶಾಲಾ ಬಂದೂಕು ಹಿಂಸಾಚಾರ ಘಟನೆಗಳು ಸುಮಾರು ನಾಲ್ಕು ಪಟ್ಟು ಹೆಚ್ಚಾಗಿದೆ.