ವಿಶ್ವದ ಅತ್ಯಂತ ಜನಪ್ರಿಯ ನಾಯಕ ಪ್ರಧಾನಿ ನರೇಂದ್ರ ಮೋದಿ; ಇಲ್ಲಿದೆ ಇದರ ಹಿಂದಿನ ಕಾರಣ

ಪ್ರಧಾನಿ ನರೇಂದ್ರ ಮೋದಿ ವಿಶ್ವದ ಅತ್ಯಂತ ಜನಪ್ರಿಯ ನಾಯಕ ಅನ್ನೋದು ಹೊಸ ವಿಷಯವೇನಲ್ಲ. ಆದರೆ ಮೋದಿ ಅವರಿಗೆ ಈ ಪರಿ ಜನಪ್ರಿಯತೆ ಬಂದಿದ್ಹೇಗೆ ಅನ್ನೋದೇ ಇಂಟ್ರೆಸ್ಟಿಂಗ್‌ ಸಂಗತಿ. ನಮೋ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್ ಟ್ವಿಟರ್‌ನಲ್ಲಿ 89.5 ಮಿಲಿಯನ್ ಅನುಯಾಯಿಗಳನ್ನು ಹೊಂದಿದ್ದಾರೆ. ಇದೇ ಕಾರಣಕ್ಕೆ ಮೋದಿ ಪಾಪ್ಯುಲರ್‌ ಆಗಿರಬಹುದು ಎಂದುಕೊಂಡಿದ್ದರೆ ನಿಮ್ಮ ಲೆಕ್ಕಾಚಾರ ತಪ್ಪು. ದಿ ನ್ಯೂಯಾರ್ಕ್ ಟೈಮ್ಸ್ ನಲ್ಲಿ ಮುಜಿಬ್ ಮಶಾಲ್ ಬರೆದಿರುವ ಪ್ರಕಾರ ನರೇಂದ್ರ ಮೋದಿ ಅವರು ಇಷ್ಟೊಂದು ಜನಪ್ರಿಯರಾಗಲು ಕಾರಣ ಹಳೆಯ-ಶೈಲಿಯ ರೇಡಿಯೊ ಕಾರ್ಯಕ್ರಮ.

“ಮನ್ ಕಿ ಬಾತ್” ನ ಪ್ರತಿ ಪ್ರಸಾರವೂ ಹೃದಯದಿಂದ ನಡೆಸಿದ ಸಂಭಾಷಣೆಯಾಗಿದೆ. ಇದು ಭಾರತದ ಪ್ರತಿ ಮನೆ ಮನೆಯನ್ನೂ ತಲುಪುತ್ತಿದೆ. ರಾಷ್ಟ್ರೀಯ ಮತ್ತು ಜಾಗತಿಕದ ಜೊತೆಗೆ ಸ್ಥಳೀಯರನ್ನು ಸಂಪರ್ಕಿಸುತ್ತದೆ ಈ ಮನ್‌ಕಿ ಬಾತ್‌ ಕಾರ್ಯಕ್ರಮ. ಪ್ರತಿ ತಿಂಗಳು ಪ್ರಸಾರವಾಗುವ ಈ ಕಾರ್ಯಕ್ರಮ ಪ್ರಧಾನ ಮಂತ್ರಿ ಮೋದಿಯವರನ್ನು ಪ್ರತಿಯೊಂದು ಸಕಾರಾತ್ಮಕ ಘಟನೆಗಳೊಂದಿಗೆ ಸಂಯೋಜಿಸುತ್ತದೆ. ಸಮಸ್ಯೆಗಳಿಗೆ ಪರಿಹಾರ, ಸ್ಪಷ್ಟತೆ ಮತ್ತು ಆಧ್ಯಾತ್ಮಿಕತೆ ಇದರಲ್ಲಿದೆ.

ಮೋದಿ ಅವರ ಜನಪ್ರಿಯತೆಗೆ ಕಾರಣ ಅವರು ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವದ ಪ್ರಧಾನಿ ಎಂಬುದಲ್ಲ. ಅಥವಾ ಅವರು ವಿವಿಧ ದೇಶಗಳಿಗೆ ಭೇಟಿ ನೀಡುತ್ತಾರೆ ಎಂಬ ಕಾರಣಕ್ಕಲ್ಲ. ನಿಸ್ಸಂಶಯವಾಗಿ ಇಡೀ ಜಗತ್ತಿನ ಮೇಲೆ, ಭಾರತೀಯರು ಮತ್ತು ಅವರ ನೀತಿಗಳ ಮೇಲೆ ಬೀರುವ ಪ್ರಭಾವದಿಂದಾಗಿ. ತಿಂಗಳಿಗೊಮ್ಮೆ ಪ್ರಧಾನಿ ಮೋದಿ ಅವರು ತಮ್ಮ ಸರ್ಕಾರಿ ಬಂಗಲೆಯಲ್ಲಿ ಸ್ಥಾಪಿಸಲಾದ ಸ್ಟುಡಿಯೊಗೆ ಕಾಲಿಡುತ್ತಾರೆ ಮತ್ತು ಮೈಕ್ರೊಫೋನ್ ಹಿಂದೆ ಕುಳಿತು ತಮ್ಮ ರೇಡಿಯೊ ಕಾರ್ಯಕ್ರಮವನ್ನು ಪ್ರಾರಂಭಿಸುತ್ತಾರೆ.

ಈಗಾಗ್ಲೇ ಅವರು 100 ಸಂಚಿಕೆಗಳನ್ನು ರೆಕಾರ್ಡ್ ಮಾಡಿದ್ದಾರೆ, ಹಿಂದಿಯಲ್ಲಿ ಸಾಮಾನ್ಯ ಶುಭಾಶಯದೊಂದಿಗೆ ಆರಂಭವಾಗುತ್ತದೆ ಈ ಕಾರ್ಯಕ್ರಮ. ಈ 30 ನಿಮಿಷಗಳ ಮಾತು ಭಾರತದ ವಿಶಾಲತೆಯನ್ನು ಬಿಚ್ಚಿಡುವಂತಿರುತ್ತದೆ. ಟೀಕೆಗೆ ಒಳಪಡದ ರಾಷ್ಟ್ರೀಯ ಕಲ್ಪನೆಯ ಮೇಲೆ ಹಿಡಿತ ಸಾಧಿಸಿದೆ. ಭಾರತದ ಪ್ರಜಾಸತ್ತಾತ್ಮಕ ನಿಯಮಗಳನ್ನು ಪಸರಿಸುತ್ತದೆ. ಕಾರ್ಯಕ್ರಮದಲ್ಲಿ ಪಿಎಂ ಮೋದಿ ಅವರು ನೆಚ್ಚಿನ ಶಿಕ್ಷಕರು, ಸಹಾನುಭೂತಿಯುಳ್ಳ ಸ್ನೇಹಿತರು, ಕೇಳುಗರು ಮತ್ತು ಜನಸಾಮಾನ್ಯರೊಂದಿಗೆ ನೇರವಾಗಿ ಮಾತನಾಡುತ್ತಾರೆ.

ಶಾಲಾ ಪರೀಕ್ಷೆಗಳ ಒತ್ತಡವನ್ನು ನಿರ್ವಹಿಸುವ ಕುರಿತು ಸಲಹೆ ನೀಡುತ್ತಾರೆ. ಗ್ರಾಮ ಮತ್ತು ಕೃಷಿ ಜೀವನದ ಸವಾಲುಗಳ ಅರಿವನ್ನು ವ್ಯಕ್ತಪಡಿಸುವಾಗ ಅವರು ಜಲ ಸಂರಕ್ಷಣೆಯನ್ನು ಪ್ರತಿಪಾದಿಸುತ್ತಾರೆ. ಮನ್‌ ಕಿ ಬಾತ್‌ ಮೋದಿ ಅವರ ಎರಡು ಶ್ರೇಷ್ಠ ಸಾಮರ್ಥ್ಯಗಳನ್ನು ಸಂಯೋಜಿಸುತ್ತದೆ. ಮೊದಲನೆಯದು ಭಾರತದ ತಳಮಟ್ಟದ ಬಗ್ಗೆ ಅವರ ಆಳವಾದ ತಿಳುವಳಿಕೆ. ಇನ್ನೊಂದು ಡಿಜಿಟಲ್ ಮಾಧ್ಯಮ ಕ್ಷೇತ್ರಕ್ಕಾಗಿ ಕಥೆ ಹೇಳುವ ಅವರ ಜನಪ್ರಿಯ ಪಾಂಡಿತ್ಯ. ಅಲ್ಲಿ ಅವರು ತಮ್ಮ ಸರ್ಕಾರದ ಜನಪ್ರಿಯ ಕಾರ್ಯಕ್ರಮಗಳನ್ನು ಪರಿಣಾಮಕಾರಿಯಾಗಿ ಸಂವಹನ ಮಾಡುತ್ತಾರೆ.

ಉಚಿತ ಪಡಿತರದಿಂದ ಸುಧಾರಿತ ಮೂಲಸೌಕರ್ಯಗಳವರೆಗೆ. ಸಾಂದರ್ಭಿಕವಾಗಿ ಅವರು ಅಂತರರಾಷ್ಟ್ರೀಯ ಘಟನೆಗಳ ಬಗ್ಗೆ ಮಾತನಾಡುತ್ತಾರೆ, ಅಲ್ಲಿ ಭಾರತವು ಗಮನ ಸೆಳೆಯುತ್ತದೆ. ಆದರೆ ಅವರು ಹೆಚ್ಚಾಗಿ ಮೂಲಭೂತ ಸರ್ಕಾರಿ ಸೇವೆಗಳ ಸಮಸ್ಯೆಗಳನ್ನು ಪರಿಹರಿಸುತ್ತಾರೆ. ನೀರು, ಶೌಚಾಲಯಗಳಂತಹ ಜೀವನದ ಕೆಲವು ಮೂಲಭೂತ ಸೌಕರ್ಯಗಳ ವಿತರಣೆ ಇದರಲ್ಲಿ ಸೇರಿದಂತೆ. ನೀರಿನ ಕೊರತೆ ಬಗ್ಗೆ ಮಾತನಾಡುತ್ತ “ಜವಾಬ್ದಾರಿಯುತ ಪ್ರಜೆಯಾಗಿ ಮತ್ತು ಸಮಾಜದ ಸದಸ್ಯನಾಗಿ, ನಾವು ಪ್ರತಿ ಹನಿ ನೀರನ್ನು ಸಂರಕ್ಷಿಸುವ ಅಭ್ಯಾಸವನ್ನು ಬೆಳೆಸಿಕೊಳ್ಳಬೇಕು” ಎಂದು ಪ್ರಧಾನಿ ಮೋದಿ ಒಂದು ಸಂಚಿಕೆಯಲ್ಲಿ ಹೇಳಿದರು.

ಮತ್ತೊಂದು ನಿಯಮಿತ ವಿಷಯವೆಂದರೆ ಪರೀಕ್ಷೆಯ ಒತ್ತಡ ಸೇರಿದಂತೆ ಯುವಜನರ ಮೇಲಿನ ಒತ್ತಡ. “ಉತ್ತಮ ಅಂಕಗಳನ್ನು ಪಡೆಯುವ ತಂತ್ರಗಳ ಬಗ್ಗೆ ನಾನು ನಿಮಗೆ ಮಾರ್ಗದರ್ಶನ ನೀಡಲು ಸಾಧ್ಯವಿಲ್ಲ ಏಕೆಂದರೆ ಅಂತಹ ವಿಷಯಗಳಲ್ಲಿ ನಾನು ಸರಾಸರಿ ವಿದ್ಯಾರ್ಥಿ ಎಂದು ಪರಿಗಣಿಸುತ್ತೇನೆ. ನನ್ನ ಜೀವನದಲ್ಲಿ ನಾನು ಯಾವುದೇ ಪರೀಕ್ಷೆಗಳಲ್ಲಿ ಉತ್ತಮ ಅಂಕ ಗಳಿಸಿಲ್ಲ” ಎಂದು ಅವರು ಕಾರ್ಯಕ್ರಮದಲ್ಲಿ ಹೇಳಿದರು. ಕೊರೊನಾ ಸಾಂಕ್ರಾಮಿಕದ ಸಮಯದಲ್ಲಿ ಲಸಿಕೆ ಹಾಕಿಸಿಕೊಳ್ಳಲು ನಾಗರಿಕರನ್ನು ಉತ್ತೇಜಿಸಲು ಪಿಎಂ ಮೋದಿ ಒಂದು ಸಂಚಿಕೆಯನ್ನು ಬಳಸಿದರು. ಈ ಎಲ್ಲಾ ಕಾರಣಗಳಿಂದಲೇ ಮೋದಿ ಜನಪ್ರಿಯ ನಾಯಕ ಎನಿಸಿಕೊಂಡಿದ್ದಾರೆ ಎಂದು ನ್ಯೂಯಾರ್ಕ್‌ ಟೈಮ್ಸ್‌ ಬಣ್ಣಿಸಿದೆ.