ಸಿ ಸೆಕ್ಷನ್ ಮೂಲಕ ಗರ್ಭಿಣಿಗೆ ಹೆರಿಗೆ ಮಾಡಿಸಿದ ವೇಳೆಯಲ್ಲಿ ಆಕೆಯ ಹೊಟ್ಟೆಯಲ್ಲಿಯೇ ಹತ್ತಿಯನ್ನು ಬಿಟ್ಟು ಹೊಲಿಗೆ ಹಾಕಿದ ವಿಲಕ್ಷಣ ಘಟನೆಯೊಂದು ಗುರುಗ್ರಾಮದಲ್ಲಿ ನಡೆದಿದೆ. ಈ ಪ್ರಕರಣದಲ್ಲಿ ವೈದ್ಯರ ನಿರ್ಲಕ್ಷ್ಯ ಎದ್ದು ಕಾಣುತ್ತಿರುವ ಹಿನ್ನೆಲೆಯಲ್ಲಿ ವೈದ್ಯರ ಮೇಲೆ ಎಫ್ಐಆರ್ ದಾಖಲಿಸುವಂತೆ ಗುರುಗ್ರಾಮ್ ಕೋರ್ಟ್ ಆದೇಶ ನೀಡಿದೆ.
ಸೆಕ್ಟರ್ 12ರಲ್ಲಿರುವ ಶಿವ ಆಸ್ಪತ್ರೆ ವಿರುದ್ಧ ಕ್ರಿಮಿನಲ್ ಮೊಕದ್ದಮೆ ಹೂಡಲು ಪೊಲೀಸರು ನಿರಾಕರಿಸಿದ ಬಳಿಕ ಮಹಿಳೆಯ ಪತಿ ಗುರುಗ್ರಾಮ್ ಮೆಟ್ರೋಪಾಲಿಟನ್ಸ್ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯದ ಮೆಟ್ಟಿಲೇರಿದ್ದರು. ಈ ಅರ್ಜಿಯನ್ನು ಆಲಿಸಿದ ಕೋರ್ಟ್ ಆಸ್ಪತ್ರೆ ವಿರುದ್ಧ ಕೇಸು ದಾಖಲಿಸಿ ತನಿಖೆ ನಡೆಸುವಂತೆ ಪೊಲೀಸರಿಗೆ ಸೂಚನೆಯನ್ನು ನೀಡಿದೆ.
ಮಹಿಳೆಯ ಪತಿ ದಿವಸ್ ರೈ ದಾರ್ಜೆಲಿಂಗ್ ಮೂಲದವರಾಗಿದ್ದು ತಮ್ಮ ಪತ್ನಿ ಸ್ವಸ್ತಿಕಾ ಜೊತೆಯಲ್ಲಿ ಸಿಕಂದರಾಪುರದಲ್ಲಿ ವಾಸವಿದ್ದರು. ಸ್ವಸ್ತಿಕಾ ಏಪ್ರಿಲ್ 2020ರಲ್ಲಿ ಗರ್ಭಿಣಿಯಾಗಿದ್ದರು. ಅದು ಕೋವಿಡ್ ಲಾಕ್ಡೌನ್ ಸಮಯವಾಗಿದ್ದರಿಂದ ದಿವಸ್ ರೈ ತಮ್ಮ ಕೆಲಸವನ್ನೂ ಕಳೆದುಕೊಂಡಿದ್ದರು. ಇಂತಹ ಪರಿಸ್ಥಿತಿಯಲ್ಲಿ ದಿವಸ್ ಬಳಿಯಲ್ಲಿ ಹಣವಿಲ್ಲದ ಕಾರಣ ಪತ್ನಿಯನ್ನು ಸರ್ಕಾರಿ ಅಂಗನವಾಡಿ ಕೇಂದ್ರಕ್ಕೆ ಕರೆದುಕೊಂಡು ಹೋಗಿದ್ದರು. ಇಲ್ಲಿ ಅಂಗನವಾಡಿ ಕಾರ್ಯಕರ್ತೆಯರು ಸ್ವಸ್ತಿಕಾರನ್ನು ಸೆಕ್ಟರ್ 12ರಲ್ಲಿರುವ ಶಿವ ಆಸ್ಪತ್ರೆಗೆ ಕರೆದುಕೊಂಡು ಹೋಗುವಂತೆ ಸಲಹೆ ನೀಡಿದ್ದರು.
ಅಂಗನವಾಡಿ ಕಾರ್ಯಕರ್ತೆಯರ ಸಲಹೆ ಮೇರೆಗೆ ನಾನು ಪತ್ನಿಯನ್ನು ಶಿವ ಆಸ್ಪತ್ರೆಗೆ ದಾಖಲು ಮಾಡಿದ್ದೆ. ವೈದ್ಯರು ನವೆಂಬರ್ 16, 2020ರಂದು ಪತ್ನಿಗೆ ಸಿ ಸೆಕ್ಷನ್ ಮೂಲಕ ಹೆರಿಗೆ ಮಾಡಿದರು. ನಮಗೆ ಹೆಣ್ಣು ಮಗು ಜನಿಸಿತ್ತು. ಇದಕ್ಕಾಗಿ ಆಸ್ಪತ್ರೆಯವರು ನನಗೆ 30 ಸಾವಿರ ಚಾರ್ಜ್ ಮಾಡಿದ್ದರು ಎಂದು ದಿವಸ್ ರೈ ಹೇಳಿದ್ದಾರೆ.
ಹೆರಿಗೆ ಬಳಿಕ ಸ್ವಸ್ತಿಕಾರಿಗೆ ಹೊಟ್ಟೆ ನೋವು ಆರಂಭವಾಗಿತ್ತು. ಹೊಟ್ಟೆ ಊದಿಕೊಂಡಿದ್ದು ಮಾತ್ರವಲ್ಲದೇ ಕೆಂಪಾದ ಕಲೆಗಳು ಕಾಣಿಸತೊಡಗಿದವು. ಕೂಡಲೇ ಪತ್ನಿಯನ್ನು ಅದೇ ಆಸ್ಪತ್ರೆಗೆ ಕರೆದುಕೊಂಡು ಹೋದೆವು. ಅಲ್ಲಿ ಸ್ವಸ್ತಿಕಾರಿಗೆ ಕೆಲವು ವಿಟಾಮಿನ್ ಮಾತ್ರೆಗಳನ್ನು ನೀಡಿ ವಾಪಸ್ ಕಳುಹಿಸಿದ್ದರು.
ಆದರೆ ಶಿವ ಆಸ್ಪತ್ರೆಯಲ್ಲಿ ನೀಡಿದ ಯಾವುದೇ ಮಾತ್ರೆಗಳು ಕೆಲಸ ಮಾಡಲೇ ಇಲ್ಲ. ಹೀಗಾಗಿ ರೈ ತನ್ನ ಪತ್ನಿಯನ್ನು ಮತ್ತೊಂದು ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದರು. ಅಲ್ಲಿ ಸಿಟಿ ಸ್ಕ್ಯಾನ್ ಮಾಡಿಸಿದ್ದ ವೇಳೆಯಲ್ಲಿ ಸ್ವಸ್ತಿಕಾ ಹೊಟ್ಟೆಯಲ್ಲಿ ವೈದ್ಯರು ಹತ್ತಿಯನ್ನು ಹಾಗೆಯೇ ಬಿಟ್ಟಿದ್ದಾರೆ ಎಂದು ತಿಳಿದುಬಂದಿತ್ತು
Loading ...