ಮದುವೆ ಮಂಟಪದಿಂದ ಡೈರೆಕ್ಟ್ ಮತಗಟ್ಟೆಗೆ ಬಂದ ನವವಧು: ಯುವತಿ ಕೆಲಸಕ್ಕೆ ಮೆಚ್ಚುಗೆ ಸೂಚಿಸಿದ ನೆಟ್ಟಿಗರು

ಮದುವೆ ಮನೆ ಅಂದ್ರೆ ಸಾಕು ಅಲ್ಲಿ ವಾತಾವರಣ ಹೇಗಿರುತ್ತೆ ಅನ್ನೋದು ಎಲ್ಲರಿಗೂ ಚಿರಪರಿಚಿತ. ಒಂದು ಕಡೆ ಸೇರಿರೋ ಅತಿಥಿಗಳ ಮಾತು ನಗು ಎಲ್ಲೆಲ್ಲೂ ಕೇಳಿ ಬರ್ತಿದ್ರೆ, ಇನ್ನೊಂದೆಡೆ ನವವಧು, ವರರು ಅರಿಶಿನ, ಮೆಹಂದಿ, ಪೂಜೆ ಹೀಗೆ ಬೇರೆ-ಬೇರೆ ಕಾರ್ಯದಲ್ಲಿ ಬ್ಯುಸಿಯಾಗಿರ್ತಾರೆ. ಹಿರಿಯರು ಹೇಳುವ ಪ್ರಕಾರ ಎಲ್ಲ ಪದ್ಧತಿಗಳು ಪೂರ್ಣಗೊಳ್ಳುವ ತನಕವೂ ಮನೆಯಿಂದ ಹೊರಗೆ ಹೋಗಬಾರದು.

ಈಗ ಕಾಲ ಬದಲಾಗಿದೆ. ವಿದ್ಯಾವಂತರು ಈ ಆಚರಣೆಗಳನ್ನ ಸಂಪೂರ್ಣವಾಗಿ ನಂಬುವುದಿಲ್ಲ. ಅವರಿಗೆ ಅವರವರ ಜವಾಬ್ದಾರಿಗಳು ಮುಖ್ಯವಾಗಿರುತ್ತೆ. ಗುಜರಾತ್ ನವವಧು ಒಬ್ಬಳು ಮದುವೆಗಿಂತ ಮುಖ್ಯ ಮತ ಚಲಾಯಿಸುವುದು ಎಂದು, ಮತಗಟ್ಟೆಗೆ ಹೋಗಿ ಮತ ಚಲಾಯಿಸಿದ್ದಾಳೆ. ಈ ವಿಡಿಯೋ ಸದ್ಯಕ್ಕೆ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.

ಗುಜರಾತ್‌ನಲ್ಲಿ ಈಗ 2022 ಅಸೆಂಬ್ಲಿ ಚುನಾವಣಾ ಕಾವು ಹೆಚ್ಚಾಗಿದ್ದು, ಸೌರಾಷ್ಟ್ರ, ಕಚ್ ಮತ್ತು ದಕ್ಷಿಣ ಪ್ರದೇಶಗಳ 19 ಜಿಲ್ಲೆಗಳ 89 ಸ್ಥಾನಗಳಲ್ಲಿ ಇತ್ತಿಚೆಗೆ ಮತದಾನ ನಡೆದಿದೆ. ಈ ಸಂದರ್ಭದಲ್ಲಿ ವಲ್ಸಾದ್ ಜಿಲ್ಲೆಯಲ್ಲಿ ಉಬರ್ಗಾಂವ್ ವಿಧಾನಸಭಾ ಕ್ಷೇತ್ರದ ಮತಗಟ್ಟೆಗೆ ನವವಧು ಒಬ್ಬಳು, ತನ್ನ ಮದುವೆ ಕಾರ್ಯವನ್ನ ಮಧ್ಯದಲ್ಲೇ ಬಿಟ್ಟು ಬಂದು ಮತ ಚಲಾಯಿಸಿದ್ದು, ಎಲ್ಲರ ಗಮನ ಸೆಳೆದಿದೆ. ಹೀಗೆ ಮತ ಹಾಕಲು ಬಂದ ನವವಧುವಿನ ಹೆಸರು ಕಾಮುಬೆನ್ ಪಟೇಲ್.

ಈ ವಿಡಿಯೋವನ್ನ ಚುನಾವಣಾ ಆಯೋಗ ತನ್ನ ಟ್ವಿಟ್ಟರ್ ಅಕೌಂಟ್‌‌ನಲ್ಲಿ ಹಂಚಿಕೊಂಡಿದ್ದು, ಈ ವಿಡಿಯೋದಲ್ಲಿ ಕಾಮುಬೇನ್ ಗುಲಾಬಿ ಬಣ್ಣದ ಲೆಹೆಂಗಾ ಧರಿಸಿರೊದನ್ನ ಗಮನಿಸಬಹುದು. ಟ್ವಿಟ್ಟರ್‌ನಲ್ಲಿ ಈ ವಿಡಿಯೋ ಸದ್ಯಕ್ಕೆ ವೈರಲ್ ಆಗಿದ್ದು, ಸಾವಿರಾರು ಜನ ಈ ವಿಡಿಯೋವನ್ನ ವೀಕ್ಷಿಸಿದ್ದಾರೆ. ನೆಟ್ಟಿಗರು ಈ ವಿಡಿಯೋ ನೋಡಿ ಈಕೆ ಅನೇಕರಿಗೆ ಮಾದರಿಯಾಗಿದ್ದಾರೆ ಎಂದು ಕಾಮೆಂಟ್ ಬಾಕ್ಸ್‌ನಲ್ಲಿ ಅಭಿಪ್ರಾಯ ಪಟ್ಟಿದ್ಧಾರೆ.