ಜೈಲಿನಲ್ಲಿ ಬಂಧಿಯಾಗಿರುವ ಖೈದಿಗಳು ತಪ್ಪಿಸಿಕೊಳ್ಳಲು ಸಾಕಷ್ಟು ಪ್ರಯತ್ನಗಳನ್ನು ಮಾಡಿ ಅದರಲ್ಲಿ ಯಶಸ್ವಿಯಾಗಿರುವ ನಿದರ್ಶನಗಳಿವೆ. ಇದೀಗ ಜೈಲಿನಲ್ಲಿದ್ದ ಖೈದಿಯೊಬ್ಬ ಯಾವ ರೀತಿ ಪರಾರಿಯಾಗಲು ಪ್ಲಾಮ್ ಮಾಡಿದ ಎಂಬುದನ್ನು ತೋರಿಸುವ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿದೆ.
ಅಂತಹ ಒಂದು ಪ್ರಕರಣದಲ್ಲಿ, ಮಹಾರಾಷ್ಟ್ರದ ಪಿಂಪ್ರಿ-ಚಿಂಚ್‌ವಾಡ್‌ನ ಚಕನ್ ಪೊಲೀಸ್ ಠಾಣೆಯಿಂದ ಖೈದಿಯೊಬ್ಬ ಲಾಕ್‌ಅಪ್‌ನಿಂದ ತಪ್ಪಿಸಿಕೊಂಡಿದ್ದಾನೆ. ಗೇಟ್‌ಗೆ ಬೀಗ ಹಾಕಿದ್ದರೂ ಖೈದಿ ಅದು ಹೇಗೆ ತಪ್ಪಿಸಿ ಪರಾರಿಯಾಗಿದ್ದಾನೆ ಎಂಬುದು ಪೊಲೀಸರಿಗೆ ಅಚ್ಚರಿ ಮೂಡಿಸಿದೆ. ಪರಾರಿಯಾದ ಆರೋಪಿ ಪತ್ತೆಗೆ ಬಲೆ ಬೀಸಿದ ಪೊಲೀಸರು ಮತ್ತೆ ಆತನನ್ನು ಹಿಡಿದು ಕೋಳ ತೊಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಅದು ಹೇಗೆ ಲಾಕ್ ಅಪ್ ನಿಂದ ತಪ್ಪಿಸಿಕೊಂಡೆ ಎಂದು ಪೊಲೀಸರು ಖೈದಿಗೆ ಪ್ರಶ್ನಿಸಿದಾಗ ಆತ ಡೆಮೊ ತೋರಿಸಿದ್ದಾನೆ. ಖೈದಿ ತುಂಬಾ ತೆಳ್ಳಗೆ ಇರುವುದರಿಂದ ಆತ ಸುಲಭವಾಗಿ ಜೈಲಿನ ಕಂಬಿಗಳ ನಡುವೆ ಹೊರಗೆ ಬಂದಿದ್ದಾನೆ. ಕೆಲವೇ ಸೆಕೆಂಡ್‌ಗಳಲ್ಲಿ ಆರೋಪಿ ಕಂಬಿಯಿಂದ ಹೊರಗೆ ಬಂದಿದ್ದನ್ನು ನೋಡಿ ಪೊಲೀಸರು ಬೆಚ್ಚಿಬಿದ್ದಿದ್ದಾರೆ. ಈ ದೃಶ್ಯದ ವಿಡಿಯೋ ಚಿತ್ರೀಕರಣ ಮಾಡಿದ್ದು, ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಳ್ಳಲಾಗಿದೆ. ಸದ್ಯ, ಈ ವಿಡಿಯೋ ಭಾರಿ ವೈರಲ್ ಆಗಿದೆ.
ಪೊಲೀಸ್ ಅಧಿಕಾರಿಗಳಿಗೆ ಘಟನೆಯ ವಿವರವನ್ನು ತಿಳಿಸಲಾಗಿದ್ದು, ಎಚ್ಚರವಾಗಿರುವಂತೆ ಎಲ್ಲಾ ಪೊಲೀಸ್ ಠಾಣೆಗಳಿಗೆ ಮಾಹಿತಿ ನೀಡಲಾಗಿದೆ.
Loading ...