ಬರೋಬ್ಬರಿ 1.10 ಕೋಟಿ ರೂ. ಪ್ಯಾಕೇಜ್​​ನ ಉದ್ಯೋಗ ಪಡೆದ 21 ವರ್ಷದ ಯುವತಿ..!

ಪ್ರಸ್ತುತ ಇಂಜಿನಿಯರಿಂಗ್​ ಪದವೀಧರರಿಗೆ ಆಫರ್​ಗಳ ಸುರಿಮಳೆಯೇ ದೊರಕುತ್ತಿದೆ. ಐಐಟಿ ವಿದ್ಯಾರ್ಥಿನಿ, ಬಿಹಾರದ ಹುಡುಗಿ ಸಂಪ್ರೀತಿ ಯಾದವ್​​ ಗೂಗಲ್​ನಲ್ಲಿ 1.10 ಕೋಟಿ ರೂಪಾಯಿ ವಾರ್ಷಿಕ ಪ್ಯಾಕೇಜ್​​ಗಳ ಕೆಲಸವನ್ನು ಪಡೆಯುವ ಮೂಲಕ ಸುದ್ದಿಯಾಗಿದ್ದಾರೆ. ಇವರು ಫೆಬ್ರವರಿ 14ರಂದು ಗೂಗಲ್​ ಕಂಪನಿಗೆ ಸೇರಲಿದ್ದಾರೆ.

ಸಂಪ್ರೀತಿ 2014ರಲ್ಲಿ ನೊಟ್ರೆಡೇಮ್​ ಅಕಾಡೆಮಿಯಲ್ಲಿ 10ನೇ ತರಗತಿಯನ್ನು ಪೂರೈಸಿದರು. ಬಳಿಕ ದೆಹಲಿಯ ಇಂಟರ್​ನ್ಯಾಷನಲ್​ ಸ್ಕೂಲ್​​ನಲ್ಲಿ 12ನೇ ತರಗತಿ ವ್ಯಾಸಂಗ ಮಾಡಿದ್ದಾರೆ. ಇದಾದ ಬಳಿಕ 2016ರಲ್ಲಿ ಜೆಇಇ ಮೇನ್ಸ್​​ನಲ್ಲಿ ಉತ್ತೀರ್ಣರಾದರು. ಕಳೆದ ವರ್ಷ ಮೇ ತಿಂಗಳಲ್ಲಿ ಸಂಪ್ರೀತಿ ದೆಹಲಿ ತಾಂತ್ರಿಕ ವಿಶ್ವವಿದ್ಯಾಲಯದಿಂದ ಕಂಪ್ಯೂಟರ್​ ಸೈನ್ಸ್​ ಬಿ ಟೆಕ್​ ಪದವಿ ಪೂರ್ಣಗೊಳಿಸಿದ್ದಾರೆ. ಪ್ರಸ್ತುತ ಇವರು 44 ಲಕ್ಷ ರೂಪಾಯಿ ವಾರ್ಷಿಕ ಪ್ಯಾಕೇಜ್​​ನಲ್ಲಿ ಮೈಕ್ರೋಸಾಫ್ಟ್​ನಲ್ಲಿ ಕೆಲಸ ಮಾಡುತ್ತಿದ್ದಾರೆ.

ಪಾಟ್ನಾದ ನೆಹರೂ ನಗರದ ನಿವಾಸಿಯಾದ ಬ್ಯಾಂಕ್​ ಅಧಿಕಾರಿ ರಾಮಶಂಕರ್​ ಯಾದವ್​​ ಹಾಗೂ ಯೋಜನೆ ಮತ್ತು ಅಭಿವೃದ್ಧಿ ಇಲಾಖೆಯ ಸಹಾಯಕ ನಿರ್ದೇಶಕಿ ಶಶಿಪ್ರಭಾ ದಂಪತಿಯ ಪುತ್ರಿ ಸಂಪ್ರೀತಿ ಅಡೋಬೆ, ಫ್ಲಿಪ್​ಕಾರ್ಟ್​ ಸೇರಿದಂತೆ ಇನ್ನಿತರ ಉನ್ನತ ಶ್ರೇಣಿಯ ಕಂಪನಿಗಳಿಂದ ಉದ್ಯೋಗದ ಆಫರ್​​ಗಳನ್ನು ಪಡೆದಿದ್ದರು.

ಗೂಗಲ್​​ ಆನ್​ಲೈನ್​​ನಲ್ಲಿ 9 ಸುತ್ತುಗಳಲ್ಲಿ ಸಂದರ್ಶನಗಳನ್ನು ನಡೆಸಿತ್ತು. ಕಂಪನಿಯು 9 ಸುತ್ತುಗಳಲ್ಲಿ ನಡೆದ ಸಂದರ್ಶನದಲ್ಲಿ ನನ್ನ ಉತ್ತರಗಳಿಂದ ತೃಪ್ತವಾಯಿತು. ಹೀಗಾಗಿ ನಾನು ಈ ಕೆಲಸಕ್ಕೆ ಆಯ್ಕೆಯಾದೆ ಎಂದು ಸಂಪ್ರೀತಿ ಹೇಳಿದ್ದಾರೆ.