‘ದೀಪಾವಳಿ’ ಗೆ ಬೆಂಗಳೂರಿಂದ ಶಿವಮೊಗ್ಗಕ್ಕೆ ಆಗಮಿಸುವವರಿಗೆ ಇಲ್ಲಿದೆ ಒಂದು ಮುಖ್ಯ ಮಾಹಿತಿ

ಈ ಬಾರಿ ದೀಪಾವಳಿ ವಾರದ ಆರಂಭದ ದಿನ ಅಂದರೆ ಸೋಮವಾರದಿಂದ ಶುರುವಾಗುವುದರಿಂದ ಶುಕ್ರವಾರದಂದಲೇ ಜನ ತಮ್ಮ ತಮ್ಮ ಊರುಗಳಿಗೆ ತೆರಳಲು ಸಿದ್ಧತೆ ನಡೆಸಿದ್ದಾರೆ.

ಅಕ್ಟೋಬರ್ 24ರ ಸೋಮವಾರದಂದು ನರಕ ಚತುರ್ದಶಿ ಅಕ್ಟೋಬರ್ 25ರ ಮಂಗಳವಾರ ಅಮಾವಾಸ್ಯೆ ಹಾಗೂ ಅಕ್ಟೋಬರ್ 26ರ ಬುಧವಾರ ಬಲಿಪಾಡ್ಯಮಿ ಇರುವುದರಿಂದ ಉದ್ಯೋಗಿಗಳಿಗೆ ಸರಣಿ ರಜೆ ಸಿಕ್ಕಂತಾಗುತ್ತದೆ.

ಇದರ ಮಧ್ಯೆ ಬೆಂಗಳೂರಿನಿಂದ ಶಿವಮೊಗ್ಗಕ್ಕೆ ಆಗಮಿಸುವ ಪ್ರಯಾಣಿಕರ ಅನುಕೂಲಕ್ಕಾಗಿ ರೈಲ್ವೆ ಇಲಾಖೆ ಅಕ್ಟೋಬರ್ 22 ರ ಶನಿವಾರದಂದು ಯಶವಂತಪುರದಿಂದ ಶಿವಮೊಗ್ಗಕ್ಕೆ ವಿಶೇಷ ರೈಲು ಸೇವೆ ಒದಗಿಸುತ್ತಿದೆ.

ಅಂದು ಬೆಳಗ್ಗೆ 10:30ಕ್ಕೆ ಯಶವಂತಪುರ ನಿಲ್ದಾಣದಿಂದ ಹೊರಡುವ ಈ ರೈಲು, 11:15ಕ್ಕೆ ತುಮಕೂರು, 12:33ಕ್ಕೆ ಅರಸೀಕೆರೆ, 1:23ಕ್ಕೆ ಬೀರೂರು, 2:18ಕ್ಕೆ ಭದ್ರಾವತಿ ಹಾಗೂ ಮಧ್ಯಾಹ್ನ 3:30ಕ್ಕೆ ಶಿವಮೊಗ್ಗ ತಲುಪಲಿದೆ.