ತನ್ನ ಅಭಿನಯದ ಚಿತ್ರ ಬಿಡುಗಡೆಯ ದಿನದಂದೇ ಸಾವನ್ನಪ್ಪಿದ ಹಿರಿಯ ನಟ…!

ಹಿರಿಯ ಬಾಲಿವುಡ್ ನಟ ಅರುಣ್ ಬಾಲಿ ಇಂದು ವಿಧಿವಶರಾಗಿದ್ದಾರೆ. ಕಾಕತಾಳೀಯ ಸಂಗತಿ ಎಂದರೆ ಅಮಿತಾಬ್ ಬಚ್ಚನ್, ರಶ್ಮಿಕಾ ಮಂದಣ್ಣ ಅವರೊಂದಿಗೆ ಅರುಣ್ ಬಾಲಿ ನಟಿಸಿದ ಕೊನೆಯ ಚಿತ್ರ ‘ಗುಡ್ ಬೈ’ ಇಂದೇ ಚಿತ್ರಮಂದಿರಗಳಲ್ಲಿ ತೆರೆ ಕಂಡಿದೆ.

79 ವರ್ಷದ ಅರುಣ ಬಾಲಿ ಕಳೆದ ಕೆಲವು ದಿನಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದರು ಎನ್ನಲಾಗಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಇಂದು ಬೆಳಗ್ಗೆ ವಾಶ್ ರೂಮಿಗೆ ಹೋಗಿ ಬರುವುದಾಗಿ ಸಹಾಯಕನಿಗೆ ಹೇಳಿದ ಅವರು ವಾಪಸ್ ಬಂದು ಕುರ್ಚಿ ಮೇಲೆ ಕುಳಿತ ಸಂದರ್ಭದಲ್ಲಿಯೇ ಬೆಳಗಿನ ಜಾವ 4:30 ರ ಸುಮಾರಿಗೆ ಇಹಲೋಕ ತ್ಯಜಿಸಿದ್ದಾರೆ.

ಅರುಣ್ ಬಾಲಿ ಸ್ವಾಭಿಮಾನ್ ಸೇರಿದಂತೆ ಹಲವು ಕಿರುತೆರೆ ಧಾರವಾಹಿಗಳಲ್ಲಿ ಕಾಣಿಸಿಕೊಂಡಿದ್ದು, ಬಾಲಿವುಡ್ ಚಿತ್ರರಂಗದಲ್ಲಿ ಸೌಗಂಧ್, ರಾಜು ಬನ್ಗಯಾ ಜೆಂಟಲ್ಮನ್, ಖಳನಾಯಕ್, ಸತ್ಯ, ಹೇ ರಾಮ್, ಲಗೇ ರಹೋ ಮುನ್ನಾಭಾಯ್, ತ್ರೀ ಈಡಿಯಟ್ಸ್, ರೆಡಿ, ಬರ್ಫಿ ಸೇರಿದಂತೆ ಹಲವು ಚಿತ್ರಗಳಲ್ಲಿ ಅಭಿನಯಿಸಿದ್ದರು.