ಗ್ರಾಹಕನ ಖಾತೆಯಲ್ಲಿ ಹಣವಿದ್ದರೂ ಚೆಕ್ ಬೌನ್ಸ್; ಬ್ಯಾಂಕ್ ಗೆ ಗ್ರಾಹಕ ನ್ಯಾಯಾಲಯದಿಂದ ದಂಡ

ಗ್ರಾಹಕನ ಖಾತೆಯಲ್ಲಿ ಹಣವಿದ್ದರೂ ಸಹ ಆತ ನೀಡಿದ ಚೆಕ್ ಬೌನ್ಸ್ ಮಾಡಿದ್ದಲ್ಲದೆ, ಹಣವಿಲ್ಲದೆ ಚೆಕ್ ನೀಡಿದ್ದಾರೆಂದು ದಂಡವನ್ನೂ ವಿಧಿಸಿದ್ದ ಬ್ಯಾಂಕಿಗೆ ಗ್ರಾಹಕ ವ್ಯಾಜ್ಯಗಳ ಪರಿಹಾರ ಆಯೋಗ ದಂಡ ವಿಧಿಸಿದೆ. ಇಂಥದೊಂದು ಘಟನೆ ದಾವಣಗೆರೆಯಲ್ಲಿ ನಡೆದಿದೆ.

ಪ್ರಕರಣದ ವಿವರ: ದಾವಣಗೆರೆ ಸುಬ್ರಹ್ಮಣ್ಯ ನಗರದ ಮಂಜುನಾಥ್ ಎಂಬವರು ಡಿಸಿಬಿ ಬ್ಯಾಂಕ್ ನಲ್ಲಿ ಉಳಿತಾಯ ಖಾತೆ ಹೊಂದಿದ್ದು, 2020ರ ಸೆಪ್ಟೆಂಬರ್ 30ರಂದು ಇಂಡಸ್ ಇಂಡ್ ಬ್ಯಾಂಕಿಗೆ 11,220 ರೂಪಾಯಿಗಳಿಗೆ ಚೆಕ್ ನೀಡಿದ್ದರು.

ಈ ಚೆಕ್ ಕಲೆಕ್ಷನ್ ಗಾಗಿ ಡಿಸಿಬಿ ಬ್ಯಾಂಕಿಗೆ ಬಂದ ವೇಳೆ ಮಂಜುನಾಥ್ ಅವರ ಖಾತೆಯಲ್ಲಿ ಈ ಚೆಕ್ ಗೆ ಪೂರಕವಾಗಿ ಹಣವಿದ್ದರೂ ಸಹ ಚೆಕ್ ಬೌನ್ಸ್ ಮಾಡಲಾಗಿತ್ತು. ಅಲ್ಲದೆ ಅವರಿಗೆ 1,390 ರೂಪಾಯಿಗಳ ಶುಲ್ಕವನ್ನು ಸಹ ವಿಧಿಸಲಾಗಿತ್ತು.

ಇದನ್ನು ಪ್ರಶ್ನಿಸಿ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗದ ಮೊರೆ ಹೋಗಿದ್ದ ಮಂಜುನಾಥ್, ತಮ್ಮ ಪ್ರತಿಷ್ಠೆಗೆ ಧಕ್ಕೆ ತಂದಿರುವುದಕ್ಕೆ 2 ಲಕ್ಷ ರೂಪಾಯಿ ದಂಡ ವಿಧಿಸಲು ಮನವಿ ಮಾಡಿದ್ದರಲ್ಲದೆ, ಸೇವೆಯ ಕೊರತೆಗಾಗಿ 50,000 ರೂ. ನೀಡುವಂತೆ ಮನವಿ ಮಾಡಿದ್ದರು.

ಈ ಪ್ರಕರಣದ ವಿಚಾರಣೆ ನಡೆಸಿದ್ದ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗ, ಅರ್ಜಿದಾರರಿಗೆ ಆದ ಮಾನಸಿಕ ನೋವಿಗಾಗಿ 5,000 ರೂಪಾಯಿ ದಂಡ ಹಾಗೂ ಪ್ರಕರಣದ ಶುಲ್ಕ 5,000 ರೂಪಾಯಿಗಳನ್ನು ನೀಡುವಂತೆ ಸೂಚಿಸಿದೆ. ಹಣ ಪಾವತಿಯಲ್ಲಿ ವಿಳಂಬವಾದರೆ ಅದಕ್ಕೆ ಬಡ್ಡಿಯನ್ನು ನೀಡಲು ಸಹ ತಿಳಿಸಿದೆ.