ಕೋವಿಡ್ ಲಾಕ್‌ಡೌನ್ ಮಧ್ಯೆ ತಮ್ಮ ಮನೆಗಳಿಂದ ಕಿರುಚುತ್ತಿದ್ದಾರೆ ಶಾಂಘೈ ನಿವಾಸಿಗಳು

ಶಾಂಘೈ: ಚೀನಾದಲ್ಲಿ ಮತ್ತೆ ಕೋವಿಡ್-19 ಪ್ರಕರಣಗಳು ಹೆಚ್ಚುತ್ತಿದ್ದು, ಅಲ್ಲಿನ ಸರ್ಕಾರ ಕಠಿಣ ನಿಯಮಗಳನ್ನು ಜಾರಿಗೊಳಿಸಿವೆ. ಈಗಾಗಲೇ ದೇಶದೆಲ್ಲೆಡೆ ಲಾಕ್ಡೌನ್ ಹೇರಲಾಗಿದ್ದು, ಕಟ್ಟುನಿಟ್ಟಿನ ನಿಯಮಗಳನ್ನು ಹೊರಡಿಸಲಾಗಿದೆ.

ಇದೀಗ ಟ್ವಿಟ್ಟರ್‌ನಲ್ಲಿ ಪೋಸ್ಟ್ ಮಾಡಿದ ವಿಡಿಯೋಗಳಲ್ಲಿ ಚೀನಾದ ಶಾಂಘೈ ನಿವಾಸಿಗಳು ತಮ್ಮ ಮನೆಗಳಿಂದ ಕಿರುಚುತ್ತಿರುವುದನ್ನು ಕೇಳಿದ್ದಾರೆ. ಟ್ವಿಟ್ಟರ್ ಬಳಕೆದಾರ ಪ್ಯಾಟ್ರಿಕ್ ಮ್ಯಾಡ್ರಿಡ್ ಹಂಚಿಕೊಂಡ ಕ್ಲಿಪ್‌ಗಳಲ್ಲಿ, ಜನರು ಕಿರುಚುವುದನ್ನು ಕೇಳುತ್ತಿದ್ದಂತೆ ಹಲವಾರು ಅಪಾರ್ಟ್‌ಮೆಂಟ್‌ಗಳು ವಿದ್ಯುತ್ ದೀಪಗಳಿಂದ ಬೆಳಗುತ್ತಿವೆ.

ಲಾಕ್‌ಡೌನ್‌ನ ಒಂದು ವಾರದ ನಂತರ ಜನರು ತಮ್ಮ ಕಿಟಕಿಗಳಿಂದ ಕಿರುಚುತ್ತಿದ್ದಾರೆ. ಶಾಂಘೈನಲ್ಲಿ ಎಲ್ಲರೂ ಕಿರುಚುತ್ತಿದ್ದಾರೆ. ಮೊದಲಿಗೆ ಒಂದೆರಡು ಮಂದಿಯಿಂದ ಪ್ರಾರಂಭವಾಯಿತು. ಈಗ ಎಲ್ಲರೂ ಕಿರುಚುತ್ತಿದ್ದಾರೆ. ಒಂದು ವಾರದ ಲಾಕ್‌ಡೌನ್ ನಂತರ, ಏನಾದರೂ ಆಗಲಿದೆ, ಇದು ಯಾವಾಗ ಕೊನೆಗೊಳ್ಳುತ್ತದೆ ಎಂಬುದು ಯಾರಿಗೂ ತಿಳಿದಿಲ್ಲ ಎಂದು ವಿಡಿಯೋ ಸಹಿತ ಪೋಸ್ಟ್ ಮಾಡಿದ್ದಾರೆ.

ಈ ವಿಡಿಯೋ ವೈರಲ್ ಆಗಿದ್ದು, 4.9 ಮಿಲಿಯನ್ ವೀಕ್ಷಣೆಗಳನ್ನು ಗಳಿಸಿದೆ. ಇತರೆ ಬಳಕೆದಾರರು ಕೂಡ ತಮ್ಮ ಮನೆಗಳಿಂದ ಜನರು ಕಿರುಚುತ್ತಿರುವ ವಿಡಿಯೊಗಳನ್ನು ಹಂಚಿಕೊಂಡಿದ್ದಾರೆ. ಬಳಕೆದಾರರು ಕೋವಿಡ್ ನಿರ್ಬಂಧಗಳನ್ನು ಅನುಸರಿಸಲು ಮತ್ತು ಅವರ ಕಿಟಕಿಗಳನ್ನು ತೆರೆಯದಂತೆ ನಿರ್ದೇಶಿಸುವ ದೃಶ್ಯಗಳನ್ನು ಸಹ ಹಂಚಿಕೊಂಡಿದ್ದಾರೆ.

ಮೂರು ವಾರಗಳ ಹಿಂದೆ ಲಾಕ್‌ಡೌನ್ ವಿಧಿಸಿದಾಗಿನಿಂದ, ಶಾಂಘೈ ನಗರದ 25 ಮಿಲಿಯನ್ ನಿವಾಸಿಗಳು ಆಹಾರ ಮತ್ತು ಔಷಧವನ್ನು ಹುಡುಕಲು ಕಷ್ಟಪಡುತ್ತಿದ್ದಾರೆ ಎನ್ನಲಾಗಿದೆ. ಸೋಮವಾರದಿಂದ ಶಾಂಘೈನ ಕೆಲವು ಪ್ರದೇಶಗಳಲ್ಲಿ ಲಾಕ್‌ಡೌನ್ ಅನ್ನು ತೆಗೆದುಹಾಕುವುದಾಗಿ ಅಧಿಕಾರಿಗಳು ಘೋಷಿಸಿದ್ದಾರೆ.