ನಮ್ಮಲ್ಲಿ ಹಲವರು ಕೆಲಸಕ್ಕೆ ಹೋಗುವಾಗ, ಶಾಲೆಗಳಿಗೆ, ಪ್ರಯಾಣ ಸೇರಿದಂತೆ ಎಲ್ಲೇ ಹೋದ್ರೂ ಜೊತೆಗೆ ನೀರಿನ ಬಾಟಲಿಯನ್ನು ಕೂಡ ತೆಗೆದುಕೊಂಡು ಹೋಗುವುದು ಸಾಮಾನ್ಯ. ಹೆಚ್ಚಿನವರು ಮರುಬಳಕೆ ಮಾಡಬಹುದಾದಂತಹ ಪ್ಲಾಸ್ಟಿಕ್ ಬಾಟಲಿಗಳನ್ನು ಬಳಸುತ್ತಾರೆ. ಆದರೆ, ಇದು ಆರೋಗ್ಯಕ್ಕೆ ಹಿತಕರವಲ್ಲ ಎಂಬ ಬಗ್ಗೆ ಅಧ್ಯಯನವು ಮಾಹಿತಿ ನೀಡಿದೆ.
ಕೋಪನ್ ಹ್ಯಾಗನ್ ವಿಶ್ವವಿದ್ಯಾನಿಲಯದ ಇಬ್ಬರು ರಸಾಯನಶಾಸ್ತ್ರಜ್ಞರು, ಮರುಬಳಕೆ ಮಾಡಬಹುದಾದ ಪ್ಲಾಸ್ಟಿಕ್ ಬಾಟಲಿಗಳಲ್ಲಿ ಸಂಗ್ರಹಿಸಲಾದ ಟ್ಯಾಪ್ ನೀರಿನಲ್ಲಿ ನೂರಾರು ರಾಸಾಯನಿಕ ಪದಾರ್ಥಗಳನ್ನು ಕಂಡುಹಿಡಿದಿದ್ದಾರೆ. ಅವುಗಳಲ್ಲಿ ಹೆಚ್ಚಿನವು ಮಾನವನ ಆರೋಗ್ಯಕ್ಕೆ ಹಾನಿಕಾರಕವಾಗಿದೆ. ಈ ಕೆಲವು ರಾಸಾಯನಿಕಗಳನ್ನು ಎಂಡೋಕ್ರೈನ್ ಡಿಸ್ರಪ್ಟರ್ಸ್ ಮತ್ತು ಕಾರ್ಸಿನೋಜೆನ್ಸ್ ಎಂದು ಕರೆಯಲಾಗುತ್ತದೆ.
ಪ್ಲಾಸ್ಟಿಕ್‌ನಲ್ಲಿ ಹಿಂದೆಂದೂ ಕಂಡುಬರದ ಪದಾರ್ಥಗಳೂ ಇವೆ ಎಂಬುದು ಕೂಡ ಅಧ್ಯಯನದಲ್ಲಿ ತಿಳಿದು ಬಂದಿದೆ. ಬಾಟಲಿಯ ಪ್ಲಾಸ್ಟಿಕ್‌ನಿಂದ 400 ಕ್ಕೂ ಹೆಚ್ಚು ವಿಭಿನ್ನ ವಸ್ತುಗಳನ್ನು ಪತ್ತೆ ಮಾಡಲಾಗಿದೆ.
ನೀರಿನಲ್ಲಿ ಕಂಡುಬರುವ ವಿಷಕಾರಿ ವಸ್ತುಗಳು:
ನೀರಿನಲ್ಲಿ ಕಂಡುಬರುವ ವಿಷಕಾರಿ ವಸ್ತುಗಳ ಪೈಕಿ, ಫೋಟೋ-ಇನಿಶಿಯೇಟರ್‌ಗಳು ಹೆಚ್ಚು ತೊಂದರೆಗೊಳಿಸುತ್ತವೆ. ಈ ಪದಾರ್ಥಗಳನ್ನು ಅಂತಃಸ್ರಾವಕ ಅಡ್ಡಿಗಳು ಮತ್ತು ಕಾರ್ಸಿನೋಜೆನ್ಸ್ ಎಂದು ಕರೆಯಲಾಗುತ್ತದೆ. ಸಂಶೋಧಕರು ಪ್ಲಾಸ್ಟಿಕ್ ತಯಾರಿಕೆಯಲ್ಲಿ ಬಳಸಲಾಗುವ ವಿವಿಧ ಪ್ಲಾಸ್ಟಿಕ್ ಸಾಫ್ಟ್ನರ್‌ಗಳು, ಆಂಟಿಆಕ್ಸಿಡೆಂಟ್‌ಗಳನ್ನು ಕಂಡುಕೊಂಡಿದ್ದಾರೆ. ಜೊತೆಗೆ ಡೈಥೈಲ್ಟೋಲುಅಮೈಡ್ ಅನ್ನು ಸಾಮಾನ್ಯವಾಗಿ ಸೊಳ್ಳೆ ಸ್ಪ್ರೇನಲ್ಲಿ ಸಕ್ರಿಯ ವಸ್ತು ಎಂದು ಕರೆಯಲಾಗುತ್ತದೆ.
ಸಾಧ್ಯವಾದಷ್ಟು ಗಾಜು ಅಥವಾ ಸ್ಟೇನ್ಲೆಸ್ ಸ್ಟೀಲ್ ಬಾಟಲಿಯನ್ನು ಬಳಸಿ:
ಭವಿಷ್ಯದಲ್ಲಿ ಗಾಜಿನ ಅಥವಾ ಗುಣಮಟ್ಟದ ಸ್ಟೇನ್ಲೆಸ್ ಸ್ಟೀಲ್ ಬಾಟಲಿಯನ್ನು ಬಳಸುವಂತೆ ಪ್ರೊಫೆಸರ್ ಕ್ರಿಸ್ಟೇನ್ಸನ್ ಮತ್ತು ಸಹ ಸಂಶೋಧಕ ಟಿಸ್ಲರ್ ಸೂಚಿಸಿದ್ದಾರೆ. ನಮ್ಮ ಕುಡಿಯುವ ನೀರಿನಲ್ಲಿ ಕಡಿಮೆ ಮಟ್ಟದ ಕೀಟನಾಶಕಗಳ ಬಗ್ಗೆ ನಾವು ತುಂಬಾ ಕಾಳಜಿ ವಹಿಸುತ್ತೇವೆ. ಆದರೆ, ನೀರನ್ನು ಕುಡಿಯಲು ಪಾತ್ರೆಯಲ್ಲಿ ಸುರಿಯುವಾಗ, ನಾವೇ ನೂರಾರು ಅಥವಾ ಸಾವಿರಾರು ಪದಾರ್ಥಗಳನ್ನು ನೀರಿಗೆ ಸೇರಿಸುತ್ತೇವೆ ಎಂದು ಕ್ರಿಸ್ಟೇನ್ಸನ್ ಉಲ್ಲೇಖಿಸಿದ್ದಾರೆ.
ಅಂದಹಾಗೆ, ಮರುಬಳಕೆ ಮಾಡಬಹುದಾದ ಪ್ಲಾಸ್ಟಿಕ್ ಬಾಟಲಿಗಳ ತಯಾರಕರಿಗೆ ಉತ್ತಮ ನಿಯಂತ್ರಣ ಮತ್ತು ಉತ್ಪಾದನಾ ಮಾನದಂಡಗಳ ಅಗತ್ಯವನ್ನು ಸಂಶೋಧಕರು ಎತ್ತಿ ತೋರಿಸಿದ್ದಾರೆ.
Loading ...