ಏಕಾಂಗಿಯಾಗಿ ಉಕ್ರೇನ್​ ಗಡಿ ದಾಟಿದ 11 ವರ್ಷದ ಬಾಲಕ….!

ಉಕ್ರೇನ್​ ದೇಶವನ್ನು ರಷ್ಯಾ ಆಕ್ರಮಿಸಿದಾಗಿನಿಂದ ಪ್ರತಿದಿನವೂ ಸಾಮಾಜಿಕ ಮಾಧ್ಯಮಗಳಲ್ಲಿ ದಿನಕ್ಕೊಂದು ಹೃದಯ ವಿದ್ರಾವಕ ಘಟನೆಗಳು ವರದಿಯಾಗುತ್ತಲೇ ಇದೆ.

ಕಳೆದ ವಾರ ಸ್ಲೋವಾಕಿಯಾದ ಪೊಲೀಸರು 11 ವರ್ಷದ ಬಾಲಕನೊಬ್ಬ ಏಕಾಂಗಿಯಾಗಿ ಗಡಿ ದಾಟಿದಂತಹ ಮನಮುಟ್ಟುವ ಕತೆಯೊಂದನ್ನು ವಿವರಿಸಿದರು. ಬೆನ್ನಲ್ಲಿ ಒಂದು ಬ್ಯಾಗ್​ ಬಿಟ್ಟರೆ ಆತನ ಕೈ ಹಿಂಭಾಗದಲ್ಲಿ ಫೋನ್​ ಸಂಖ್ಯೆಯನ್ನು ಮಾತ್ರ ಬರೆಯಲಾಗಿತ್ತು.

ಉಕ್ರೇನ್​ನ ಝಪೊರಿಝಿಯಾ ಪ್ರದೇಶದಿಂದ ಗಡಿಗೆ ಏಕಾಂಗಿಯಾಗಿ ಪ್ರಯಾಣಿಸಿದ ನಂತರ ಬಾಲಕ ಸ್ಲೋವಾಕಿಯಾವನ್ನು ಪ್ರವೇಶಿಸಿದ್ದಾನೆ ಎನ್ನಲಾಗಿದೆ.
ಫೇಸ್​​ಬುಕ್​​ನಲ್ಲಿ ಸ್ಲೋವಾಕಿಯಾದ ಪೊಲೀಸ್​ ಪಡೆಯು ಬೆನ್ನಿಗೆ ಬ್ಯಾಗ್​ ಧರಿಸಿ ಕೈಯಲ್ಲಿ ಮೊಬೈಲ್​ ಸಂಖ್ಯೆಯನ್ನು ಬರೆದುಕೊಂಡ ಬಾಲಕನ ಫೋಟೋವನ್ನು ಫೇಸ್​ಬುಕ್​ನಲ್ಲಿ ಶೇರ್​ ಮಾಡಿದೆ.

ಸ್ಲೋವಾಕಿಯಾಕ್ಕೆ ತೆರಳಿದ ನಂತರ ಸ್ವಯಂಸೇವಕರು ಈ ಬಾಲಕನನ್ನು ನೋಡಿಕೊಂಡಿದ್ದಾರೆ ಎಂದು ಫೇಸ್​ಬುಕ್​ ಪೋಸ್ಟ್​ನಲ್ಲಿ ಮಾಹಿತಿ ನೀಡಲಾಗಿದೆ. ಬಾಲಕನಿಗೆ ಆಹಾರ ಹಾಗೂ ಪಾನೀಯಗಳನ್ನು ನೀಡಲಾಗಿದೆ.

ಕೇವಲ 11 ವರ್ಷದ ಬಾಲಕ ಏಕಾಂಗಿಯಾಗಿ ಜಪೊರೊಝೈನಿಂದ ಉಕ್ರೇನ್​ನ ಗಡಿಯುದ್ದಕ್ಕೂ ಸ್ಲೋವಾಕಿಯಾಗೆ ಬಂದನು. ಪಾಸ್​ಪೋರ್ಟ್​ ಹಾಗೂ ಫೋನ್​​ ಸಂಖ್ಯೆಯನ್ನು ಆತನ ಕೈ ಮೇಲೆ ಬರೆಯಲಾಗಿತ್ತು . ಆತನ ಬಳಿ ಒಂದು ಬ್ಯಾಗ್​ ಮಾತ್ರವಿತ್ತು. ಆತ ತನ್ನ ನಗು, ಧೈರ್ಯ ಹಾಗೂ ಶ್ರದ್ಧೆಯ ಮೂಲಕ ನಮ್ಮ ಮನಸ್ಸನ್ನು ಗೆದ್ದಿದ್ದಾನೆ ಎಂದು ಪೋಸ್ಟ್​ನಲ್ಲಿ ಬರೆಯಲಾಗಿದೆ.