ಎನ್​​ಸಿಸಿ ರ್ಯಾಲಿಯಲ್ಲಿ ಸಿಖ್​ ಕೆಡೆಟ್​ ಟೋಪಿ ಧರಿಸಿದ ಪ್ರಧಾನಿ ಮೋದಿ

ದೆಹಲಿಯ ಕರಿಯಪ್ಪ ಮೈದಾನದಲ್ಲಿ ನಡೆದ ರಾಷ್ಟ್ರೀಯ ಕೆಡೆಟ್​ ಕಾರ್ಪ್ಸ್​ (ಎನ್​ಸಿಸಿ) ರ್ಯಾಲಿಯಲ್ಲಿ ಭಾಗಿಯಾಗಿದ್ದ ಪ್ರಧಾನಿ ನರೇಂದ್ರ ಮೋದಿ ಸಿಖ್​​ ಕೆಡೆಟ್​ ಪೇಟವನ್ನು ಧರಿಸಿದ್ದರು.

ಪ್ರಧಾನಿ ನರೇಂದ್ರ ಮೋದಿ ದೆಹಲಿಯಲ್ಲಿ ಎನ್​ಸಿಸಿ ತುಕಡಿಗಳಿಂದ ಗಾರ್ಡ್ ಆಫ್​ ಆನರ್​ ಸ್ವೀಕರಿಸಿದರು. ಇದಾದ ಬಳಿಕ ಮಾರ್ಚ್​ಪಾಸ್ಟ್​ ವೀಕ್ಷಿಸಿದರು. ಕಾರ್ಯಕ್ರಮದಲ್ಲಿ ಉತ್ತಮ ಕೆಡೆಟ್​ಗಳಿಗೆ ಪದಕ ಹಾಗೂ ಲಾಠಿ ನೀಡಿ ಗೌರವಿಸಲಾಯ್ತು.

ಸೋಶಿಯಲ್​ ಮೀಡಿಯಾಗಳಲ್ಲಿ ವೈರಲ್​​ ಆಗಿರುವ ಫೋಟೋಗಳಲ್ಲಿ ಪ್ರಧಾನಿ ಮೋದಿ ರೈಫಲ್​ ಹಸಿರು ಪೇಟವನ್ನು ಧರಿಸಿದ್ದು ಅದರಲ್ಲಿ ಕೆಂಪು ಬಣ್ಣದ ಗರಿಯನ್ನು ಕಾಣಬಹುದಾಗಿದೆ.

ಇನ್ನು ಕಾರ್ಯಕ್ರಮದಲ್ಲಿ ಮಾತನಾಡಿದ ಪ್ರಧಾನಿ ಮೋದಿ ನಾನು ಕೂಡ ನಿಮ್ಮಂತೆ ಎನ್​ಸಿಸಿಯ ಸಕ್ರಿಯ ಸದಸ್ಯನಾಗಿದ್ದ ಎಂದು ಹೇಳಲು ನನಗೆ ಹೆಮ್ಮೆ ಎನಿಸುತ್ತಿದೆ. ಎನ್​ಸಿಸಿಯನ್ನು ಬಲಪಡಿಸಲು ಕೇಂದ್ರ ಸರ್ಕಾರವು ಹಲವಾರು ಕ್ರಮಗಳನ್ನು ತೆಗೆದುಕೊಳ್ಳುತ್ತಿದೆ. ಹೆಚ್ಚಿನ ಸಂಖ್ಯೆಯಲ್ಲಿ ಬಾಲಕಿಯರ ಕ್ಯಾಡೆಟ್​ಗಳು ರ್ಯಾಲಿಯಲ್ಲಿ ಭಾಗವಹಿಸಿದ್ದಾರೆ. ಇದು ಬದಲಾಗುತ್ತಿರುವ ಭಾರತದ ಸಂಕೇತವಾಗಿದೆ ಎಂದು ಪ್ರಧಾನಿ ಮೋದಿ ಹೇಳಿದ್ದಾರೆ.

ಇನ್ನು ಈ ವರ್ಷದ ಗಣರಾಜ್ಯೋತ್ಸವ ಸಂದರ್ಭದಲ್ಲಿ ಪ್ರಧಾನಿ ಮೋದಿ ತಮ್ಮ ಸಾಂಪ್ರದಾಯಿಕ ಪೇಟವನ್ನು ತೊರೆದು ಬ್ರಹ್ಮಕಮಲ ಚಿತ್ರವಿರುವ ಉತ್ತರಾಖಂಡದ ಸಾಂಪ್ರದಾಯಿಕ ಕ್ಯಾಪ್​ ಧರಿಸಿದ್ದರು. ಬ್ರಹ್ಮಕಮಲ ಉತ್ತರಾಖಂಡ್​​ನ ರಾಜ್ಯ ಪುಷ್ಪವಾಗಿದೆ.