ಕೆಲವೇ ಕೆಲವು ತಿಂಗಳ ಹಿಂದಿನ ಮಾತು, ಪಾಕಿಸ್ತಾನದ ಒಂದು ಬ್ರಿಡ್ಜ್ ಉದ್ಘಾಟನೆ ಆಗಿ ಕೆಲ ಕ್ಷಣಗಳ ನಂತರವೇ ಕುಸಿದು ಬಿದ್ದಿತ್ತು. ಅಂತಹ ಘಟನೆಗಳು ಭಾರತದಲ್ಲೂ ಆಗಾಗ ನೋಡಲು ಸಿಗ್ತಿರುತ್ತೆ. ಇದಕ್ಕೆ ಕಾರಣ ಭ್ರಷ್ಟಾಚಾರ. ಕಾಮಗಾರಿ ಹೆಸರಲ್ಲಿ ಕೋಟಿ ಕೋಟಿ ಕೊಳ್ಳೆ ಹೊಡೆವ ರಾಜಕಾರಣಿ, ಕಾಂಟ್ರ್ಯಾಕ್ಟರ್ ಗಳಿಂದ ಕೊನೆಗೆ ಕಳಪೆ ಗುಣಮಟ್ಟದ ಕೆಲಸವಾಗಿರುತ್ತದೆ.
ಹಾಗಂತ ಭ್ರಷ್ಟಾಚಾರ ಅನ್ನೋದು ಭಾರತ, ಪಾಕಿಸ್ತಾನದಲ್ಲಿ ಮಾತ್ರ ಇದೆ ಅಂತ ಅಂದ್ಕೊಳ್ಳೊಕೇನೆ ಹೋಗ್ಬೇಡಿ. ಯಾಕಂದ್ರೆ ದೂರದ ಮೆಕ್ಸಿಕೋನಲ್ಲಿಯೂ ಇತ್ತೀಚೆಗೆ ನಡೆದ ಘಟನೆ, ಅಲ್ಲಿಯೂ ಭ್ರಷ್ಟಾಚಾರ ಯಾವ ಮಟ್ಟದಲ್ಲಿದೆ ಅನ್ನೋದಕ್ಕೆ ಕನ್ನಡಿ ಹಿಡಿದ ಹಾಗಿತ್ತು.
ಅದು ತೂಗು ಸೇತುವೆ ಉದ್ಘಾಟನಾ ಕಾರ್ಯಕ್ರಮ. ಆ ಸೇತುವೆ ಉದ್ಘಾಟನೆಗೊಂಡ ನಂತರ ಕೆಲ ನಿಮಿಷಗಳ ನಂತರ ಮೇಯರ್ ಸೇರಿದಂತೆ ಕೆಲ ಅಧಿಕಾರಿಗಳು ಆ ಉಯ್ಯಾಲೆ ಮೇಲೆ ನಡೆಯಲು ಆರಂಭಿಸಿದ್ದಾರೆ. ಅವರು ಇನ್ನೇನು 10-15 ಹೆಜ್ಜೆ ಇಟ್ಟಿರಬೇಕು ಅಷ್ಟೇ, ಆಗಲೇ ಆ ತೂಗು ಉಯ್ಯಾಲೆ ಸೇತುವೆ ಒಮ್ಮೆಲೇ ದಿಢೀರನೇ ಕುಸಿದು ಬಿದ್ದಿತ್ತು. ಪರಿಣಾಮ ಆ ಸೇತುವೆ ಮೇಲಿದ್ದವರೆಲ್ಲ ಅಲ್ಲೇ ಕೆಳಗೆ ಇದ್ದ ಚರಂಡಿಯಲ್ಲಿ ಬಿದ್ದಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲಿ ಈ ವಿಡಿಯೋ ವೈರಲ್ ಆಗಿದ್ದು ಅಲ್ಲಿಯೂ ಭ್ರಷ್ಟಾಚಾರ ಏನೂ ಕಡಿಮೆ ಇಲ್ಲ ಅನ್ನೊ ಹಾಗಿದೆ.
ಮರದ ಹಲಗೆಗಳಿಂದ ನಿರ್ಮಿಸಲಾದ ಈ ನೇತಾಡುವ ಸೇತುವೆಯು 20 ಜನರ ತೂಕವನ್ನು ತಡೆದುಕೊಳ್ಳದಷ್ಟು ದುರ್ಬಲವಾಗಿತ್ತು. ಘಟನೆಯಲ್ಲಿ ಮೇಯರ್ ಸೇರಿದಂತೆ ಅನೇಕರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ಕೆಳಗಡೆ ಹರಿಯುತ್ತಿದ್ದ ಚರಂಡಿಯಲ್ಲಿ ಬಂಡೆಗಳು, ದೊಡ್ಡ ಕಲ್ಲುಗಳೂ ಇದ್ದವು. ಅದೃಷ್ಟವಶಾತ್ ಈ ದುರ್ಘಟನೆಯಲ್ಲಿ ಯಾರೂ ಗಂಭೀರವಾಗಿ ಗಾಯಗೊಂಡಿಲ್ಲ. ಈ ಸಂಪೂರ್ಣ ಘಟನೆಯು ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಶೇರ್ ಆದ ಬಳಿಕ ಈ ವಿಡಿಯೋವನ್ನು ಲಕ್ಷಾಂತರ ಜನರು ವೀಕ್ಷಿಸಿದ್ದಾರೆ.
Loading ...