ಇಲಿ ಬೋನಿನಲ್ಲಿ 2 ಸಾವಿರ ರೂ. ಇಟ್ಟುಕೊಂಡು ನಾಮಪತ್ರ ಸಲ್ಲಿಸಲು ಬಂದ ಅಭ್ಯರ್ಥಿ…!

ಸ್ಥಳೀಯ ಸಂಸ್ಥೆಗಳ ಚುನಾವಣೆಗೆ ನಾಮಪತ್ರ ಸಲ್ಲಿಸಲು ಮಧುರೈನಲ್ಲಿ ಅಭ್ಯರ್ಥಿಯೊಬ್ಬರು ಇಲಿಯ ಬೋನಿನಲ್ಲಿ 2000 ರೂಪಾಯಿಯನ್ನು ಇಟ್ಟುಕೊಂಡು ಬರುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.

ಮಧುರೈನ ವಾರ್ಡ್​ ಸಂಖ್ಯೆ ಮೂರರಲ್ಲಿ ಸ್ಪರ್ಧಿಸಲು ಜಾಫರ್​ ಷರೀಫ್​​ ನಾಮಪತ್ರ ಸಲ್ಲಿಕೆ ಮಾಡಿದ್ದಾರೆ. ತಮಿಳುನಾಡಿನಲ್ಲಿ ಮತಕ್ಕಾಗಿ ನಗದು ವಿಚಾರದಲ್ಲಿ ಜನರಿಗೆ ಜಾಗೃತಿ ಮೂಡಿಸುವ ಸಲುವಾಗಿ ತಾವು ಇಲಿಯ ಬೋನಿನಲ್ಲಿ ಹಣವನ್ನು ಇಟ್ಟುಕೊಂಡು ಬಂದಿರುವುದಾಗಿ ಶೆರೀಫ್​ ಹೇಳಿದ್ದಾರೆ.

ತಮಿಳುನಾಡಿನಲ್ಲಿ ಮತಕ್ಕಾಗಿ ಹಣದ ದಂಧೆ ವ್ಯಾಪಕವಾಗಿ ನಡೆಯುತ್ತಿದೆ. ಮತಕ್ಕಾಗಿ ಹಣ ತೆಗೆದುಕೊಳ್ಳುವುದು ಅಂದರೆ ನೀವು ಐದು ವರ್ಷಗಳ ಕಾಲ ಇಲಿಯ ಬೋನಿನಲ್ಲಿ ಸಿಲುಕಿಕೊಂಡಂತೆ ಎಂದು ಜಾಫರ್​ ಷರೀಫ್​ ಹೇಳಿದ್ದಾರೆ.

ನಾನು ನನ್ನ ವಾರ್ಡ್​ನ್ನು ಸ್ವಚ್ಛತೆಗೆ ಮಾದರಿ ಎಂಬಂತೆ ಪರಿವರ್ತಿಸಲು ಬಯಸುತ್ತೇನೆ. ಮತ್ತೆ ಜನರು ಮತವನ್ನು ಮಾರಿಕೊಳ್ಳಲು ಮುಂದಾದಾಗ ಹೇಗೆ ಬಲೆಗೆ ಬೀಳುತ್ತಾರೆ ಎಂಬುದನ್ನು ತೋರಿಸಲು ಈ ಇಲಿಯ ಬೋನನ್ನು ತಂದಿದ್ದೇನೆ. ನಾನು ಉತ್ತಮ ಉದ್ಯೋಗವನ್ನು ಹೊಂದಿದ್ದೇನೆ. ನನ್ನ ಆದಾಯದಿಂದ ನಾನು ಉತ್ತಮ ಜೀವನವನ್ನು ನಡೆಸಬಲ್ಲೆ. ಆದರೆ ವಿದ್ಯಾವಂತ ನಾಗರಿಕರು ದೇಶದ ಅಭಿವೃದ್ಧಿಗಾಗಿ ಹಿಂದಿರುಗುವ ಸಮಯ ಬಂದಿದೆ. ಇದಕ್ಕಾಗಿಯೇ ನಾನು ಚುನಾವಣೆಯಲ್ಲಿ ಸ್ಪರ್ಧಿಸಲು ನಿರ್ಧರಿಸಿದ್ದೇನೆ ಎಂದು ಜಾಫರ್ ಹೇಳಿದರು.