ಇಂಥಾ ಕಾಯಿಲೆಯಿಂದಾಗಿ ಗಿನ್ನಿಸ್‌ ದಾಖಲೆ ಮಾಡಿದ್ದಾಳೆ ವಿಶ್ವದ ಅತಿ ಎತ್ತರದ ಮಹಿಳೆ…!

ಟರ್ಕಿಯ ರುಮೆಸಾ ಗೆಲ್ಗಿ ವಿಶ್ವದ ಅತಿ ಎತ್ತರದ ಮಹಿಳೆ ಎನಿಸಿಕೊಂಡಿದ್ದಾಳೆ. ಈಕೆ ಎತ್ತರ ಎತ್ತರ 7 ಅಡಿ 0.7 ಇಂಚುಗಳು. ಒಂದಲ್ಲ ಎರಡಲ್ಲ ಮೂರು ಗಿನ್ನಿಸ್ ದಾಖಲೆಗಳನ್ನು ಈಕೆ ಮುರಿದಿದ್ದಾಳೆ. ಅತ್ಯಂತ ಉದ್ದನೆಯ ಬೆರಳು ಹೊಂದಿರುವ ಮಹಿಳೆ ಎನಿಸಿಕೊಂಡಿದ್ದಾಳೆ.

ಈಕೆಯ ಬೆರಳಿನ ಉದ್ದ 4.40 ಇಂಚುಗಳು. ಉದ್ದನೆಯ ಬೆನ್ನು ಹೊಂದಿದ ಮಹಿಳೆ ಎಂಬ ದಾಖಲೆಯೂ ರುಮೆಸಾ ಪಾಲಾಗದೆ. ಈಕೆಯ ಬೆನ್ನಿನ ಉದ್ದ 23.58 ಇಂಚುಗಳಷ್ಟಿದೆ.

ಬಾಲಿವುಡ್‌ ನಟ ಅಮಿತಾಭ್‌ ಬಚ್ಚನ್‌ ಅವರ ಎತ್ತರ 6 ಅಡಿ 2 ಇಂಚುಗಳು. ಬಿಗ್‌ಬಿಗಿಂತಲೂ ರುಮೇಸಾ ಎತ್ತರವಾಗಿದ್ದಾಳೆ. ಈಕೆಗೆ ವೀವರ್ ಸಿಂಡ್ರೋಮ್ ಎಂಬ ಅಪರೂಪದ ಜೆನೆಟಿಕ್ ಡಿಸಾರ್ಡರ್ ಇದೆ.  ಇದು ತ್ವರಿತ ದೈಹಿಕ ಬೆಳವಣಿಗೆಗೆ ಕಾರಣವಾಗಿದೆ. ಇಂಟ್ರೆಸ್ಟಿಂಗ್‌ ಸಂಗತಿ ಅಂದ್ರೆ ವಿಶ್ವದ ಅತಿ ಉದ್ದದ ವ್ಯಕ್ತಿ ಕೂಡ ಟರ್ಕಿಯ ಪ್ರಜೆ ಸುಲ್ತಾನ್ ಕೊಸೆನ್ ಹೆಸರಿನಲ್ಲಿ ದಾಖಲಾಗಿದೆ. ಆತನ ಎತ್ತರ 8 ಅಡಿ 2.8 ಇಂಚುಗಳು.

 

ವೀವರ್ ಸಿಂಡ್ರೋಮ್ ಎಂದರೇನು ?

ವೀವರ್ ಸಿಂಡ್ರೋಮ್ ಒಂದು ಕಾಯಿಲೆ. ತಲೆಯ ಗಾತ್ರ ದೊಡ್ಡದಾಗಬಹುದು ಅಥವಾ ಎತ್ತರ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ. ಈ ಕಾಯಿಲೆ ಬೌದ್ಧಿಕ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರುತ್ತದೆ. ಮುಖವು ಸಾಮಾನ್ಯಕ್ಕಿಂತ ಭಿನ್ನವಾಗಿ ಕಾಣುವಂತೆ ಮಾಡುತ್ತದೆ. ಹಿಗ್ಗಿದ ಕಣ್ಣುಗಳು, ದೊಡ್ಡ ಕಿವಿಗಳು, ಗುಳಿಬಿದ್ದ ಗಲ್ಲ, ಸಣ್ಣ ಕೆಳಗಿನ ದವಡೆ ಇವೆಲ್ಲ ಈ ಕಾಯಿಲೆಯ ಲಕ್ಷಣಗಳು. ವಂಶವಾಹಿಗಳು ರೂಪಾಂತರಗೊಂಡಾಗ ಈ ಆನುವಂಶಿಕ ಕಾಯಿಲೆ ಕಾಣಿಸಿಕೊಳ್ಳುತ್ತದೆ.

ವಂಶವಾಹಿಯ ರೂಪಾಂತರವು ಉಂಟಾದಾಗ ಮೂಳೆಯು ವೇಗವಾಗಿ ಬೆಳೆಯುತ್ತದೆ ಮತ್ತು ವ್ಯಕ್ತಿಯು ಸಾಮಾನ್ಯಕ್ಕಿಂತ ಎತ್ತರವಾಗುತ್ತಾನೆ.ವೀವರ್ ಸಿಂಡ್ರೋಮ್ ಕಾರಣ ರುಮೆಸಾ ಗೆಲ್ಗಿ ಸಾಮಾನ್ಯ ಜೀವನವನ್ನು ನಡೆಸಲು ಸಾಧ್ಯವಿಲ್ಲ. ನಡೆಯಲು ಗಾಲಿಕುರ್ಚಿ ಅಥವಾ ವಾಕಿಂಗ್ ಫ್ರೇಮ್ ಬಳಸಬೇಕು. ಅತಿಯಾದ ಎತ್ತರದಿಂದ ಆರಂಭದಲ್ಲಿ ರುಮೇಸಾ ಬೇಸರಗೊಂಡಿದ್ದರು. ಜನರು ಅವರನ್ನು ಗೇಲಿ ಮಾಡುತ್ತಿದ್ದರು. ಆದ್ರೀಗ ಎಲ್ಲವನ್ನೂ ಎದುರಿಸಿ ಬದುಕುವ ಛಲ ಅವರಲ್ಲಿ ಬಂದಿದೆ.