ಆಂಡ್ರಾಯ್ಡ್​​ ಫೋನ್ ಸೆಟ್ಟಿಂಗ್ಸ್ ​​ನಲ್ಲಿ ಕೂಡಲೇ ಮಾಡಿ ಈ ಬದಲಾವಣೆ

ಸ್ಮಾರ್ಟ್​ಫೋನ್​ಗಳನ್ನು ಸೆಟ್​ ಮಾಡುವಾಗ ನೀವು ಸಾಕಷ್ಟು ಆಯ್ಕೆಗಳನ್ನು ಮೊಬೈಲ್​ನಲ್ಲಿ ಕಾಣುತ್ತೀರಾ. ಐಓಎಸ್​ ಸಾಧನಗಳಿಗೆ ಹೋಲಿಕೆ ಮಾಡಿದರೆ ಆಂಡ್ರಾಯ್ಡ್​ ಫೋನ್​ಗಳು ಹೆಚ್ಚಿನ ಆಯ್ಕೆಗಳನ್ನು ಬಳಕೆದಾರರಿಗೆ ನೀಡುತ್ತದೆ.

ಇದರಲ್ಲಿ ಅನೇಕ ಆಯ್ಕೆಗಳನ್ನು ನೀವು ಬೇಕಾದ ರೀತಿಯಲ್ಲಿ ಬಳಕೆ ಮಾಡಬಹುದು. ಆದರೆ ಆಂಡ್ರಾಯ್ಡ್​ ಫೋನ್​ಗಳಲ್ಲಿ ಇರುವ ಬಹುತೇಕ ಆಯ್ಕೆಗಳು ನಿಮ್ಮ ಮೊಬೈಲ್​​ನ ಸೆಕ್ಯೂರಿಟಿ ಹಾಗೂ ಪರ್ಫಾಮೆನ್ಸ್​ ಮೇಲೆ ಪ್ರಭಾವ ಬೀರುತ್ತದೆ. ಹಾಗಾದರೆ ಸ್ಮಾರ್ಟ್​ ಫೋನ್​ನ ಸೆಟ್ಟಿಂಗ್ಸ್​ನಲ್ಲಿ ನೀವು ಮಾಡಬೇಕಾದ ಬದಲಾವಣೆಗಳು ಯಾವುದು ಎಂಬುದಕ್ಕೆ ಇಲ್ಲಿದೆ ಮಾಹಿತಿ.

ಆ್ಯಡ್​ ಪರ್ಸನಾಲೈಸೇಷನ್​​ನ್ನು ಆಫ್​ ಮಾಡಿ:

ಗೂಗಲ್​ ನಿಮ್ಮ ಆನ್​ಲೈನ್​​ ಆ್ಯಕ್ಟಿವಿಟಿಗಳನ್ನು ಟ್ರ್ಯಾಕ್​ ಮಾಡುವ ಮೂಲಕ ನಿಮ್ಮ ಮೊಬೈಲ್​ ಫೋನ್​​ಗಳಲ್ಲಿ ನೀವು ಆಸಕ್ತಿ ತೋರಿಸಿದ ಉತ್ಪನ್ನಗಳ ಬಗ್ಗೆಯೇ ಹೆಚ್ಚು ಜಾಹೀರಾತುಗಳನ್ನು ತೋರಿಸಲು ಯತ್ನಿಸುತ್ತದೆ. ನಿಮಗೆ ಈಗಾಗಲೇ ಈ ರೀತಿಯ ಅನುಭವಾಗಿರಬಹುದು.

ಆನ್​ಲೈನ್​ ಶಾಪಿಂಗ್​ ಸೈಟ್​ಗಳಲ್ಲಿ ನೀವು ಯಾವ ಉತ್ಪನ್ನಗಳನ್ನು ಹೆಚ್ಚಾಗಿ ಹುಡುಕಾಟ ನಡೆಸಿರುತ್ತಿರೋ ಅದೇ ನಿಮ್ಮ ಮೊಬೈಲ್​ನಲ್ಲಿ ಹೆಚ್ಚು ಜಾಹೀರಾತಿನ ರೂಪದಲ್ಲಿ ಕಾಣ ಸಿಗುತ್ತದೆ. ಇದು ಒಂದು ಲೆಕ್ಕದಲ್ಲಿ ಒಳ್ಳೆಯದೇ ಆಗಿದ್ದರೂ ಸಹ ಸ್ಮಾರ್ಟ್​ಫೋನ್​ಗಳಲ್ಲಿ ಸಾಕಷ್ಟು ಮಾಹಿತಿಗಳನ್ನು ಇನ್ನೊಬ್ಬರಿಗೆ ಶೇರ್​ ಮಾಡುತ್ತಿದ್ದೀರಿ ಎಂಬುದನ್ನು ಮರೆಯುವಂತಿಲ್ಲ. ಇದನ್ನು ತಪ್ಪಿಸಬೇಕು ಅಂದರೆ ಸೆಟ್ಟಿಂಗ್ಸ್​- ಗೂಗಲ್​ -ಆ್ಯಡ್ಸ್​ ಗೆ ಹೋಗಿ ಇಲ್ಲಿ Opt out of Ads Personalization ಎಂಬ ಆಯ್ಕೆ ಮೇಲೆ ಕ್ಲಿಕ್​ ಮಾಡಿ.

ಲಾಕ್​ ಸ್ಕ್ರೀನ್​​ನಲ್ಲಿ ಸೂಕ್ಷ್ಮ ಮಾಹಿತಿಗಳನ್ನು ಹೈಡ್​ ಮಾಡಿ:

ಆಂಡ್ರಾಯ್ಡ್​ 5.0 ಬಳಿಕ ಲಾಕ್​ ಸ್ಕ್ರೀನ್​​ನಲ್ಲಿಯೇ ನೇರವಾಗಿ ಅಧಿಸೂಚನೆಗಳನ್ನು ನೋಡಲು ಹಾಗೂ ನೋಟಿಫಿಕೇಶನ್​ ಬಾರ್​ನಲ್ಲಿ ಸಂವಹನ ನಡೆಸುವ ವೈಶಿಷ್ಟ್ಯವನ್ನು ಗೂಗಲ್​ ನೀಡಿದೆ. ಈ ರೀತಿಯ ಆಯ್ಕೆಯನ್ನು ನೀವು ಬಂದ್​ ಮಾಡಲೇಬೇಕು. ಇದಕ್ಕಾಗಿ ನೀವು ಸೆಟ್ಟಿಂಗ್ಸ್​ – ಅಪ್ಲಿಕೇಶನ್​ ಹಾಗೂ ನೋಟಿಫಿಕೇಶನ್​- ನೋಟಿಫಿಕೇಶನ್​​ ಗೆ ಅಲ್ಲಿ Sensitive notifications ಆಯ್ಕೆಯನ್ನು ಆಫ್​ ಮಾಡಿ.

ಆ್ಯಪ್​​ ಪಮಿರ್ಷನ್​​ನ್ನು ಬದಲಾಯಿಸಿ:

ಕೆಲವು ಅಪ್ಲಿಕೇಶನ್​ಗಳು ಸರಿಯಾಗಿ ಕಾರ್ಯನಿರ್ವಹಿಸಲು ನಿಮ್ಮ ಬಳಿ ಸೂಕ್ಷ್ಮ ಮಾಹಿತಿಗಳನ್ನು ಹಂಚಿಕೊಳ್ಳಲು ಅನುಮತಿಯನ್ನು ಕೇಳುತ್ತದೆ. ಕೆಲವೊಂದು ಬಾರಿ ನಿಮ್ಮ ಬ್ಲೂಟೂತ್​, ಫೋನ್ ಕಾಂಟ್ಯಾಕ್ಟ್​, ಮೈಕ್ರೋಫೋನ್​ ಸೇರಿದಂತೆ ವಿವಿಧ ಮಾಹಿತಿಯನ್ನು ಅಕ್ಸೆಸ್​ ಮಾಡುತ್ತವೆ. ಇದು ನಿಮ್ಮ ಗೌಪ್ಯತೆ ಹಾಗೂ ಭದ್ರತೆಗೆ ಹಾನಿ ಉಂಟು ಮಾಡಬಹುದು. ಇದನ್ನು ತಪ್ಪಿಸಲು ನೀವು ಸೆಟ್ಟಿಂಗ್ಸ್​ – ಆ್ಯಪ್ಸ್​ & ನೋಟಿಫಿಕೇಶನ್​ – ಇಲ್ಲಿ ನೀವು ಯಾವೆಲ್ಲ ಆ್ಯಪ್​ಗಳಿಗೆ ಅನುಮತಿ ನೀಡಿದ್ದೀರಿ ಎಂಬುದನ್ನು ಪರಿಶೀಲಿಸಿ ಅನಾವಶ್ಯಕ ಎನಿಸಿದ್ದನ್ನು ಆಫ್​ ಮಾಡಬಹುದಾಗಿದೆ.