SBI ಗ್ರಾಹಕರಿಗೆ ಮುಖ್ಯ ಮಾಹಿತಿ: ಚೆಕ್ ವ್ಯವಹಾರದ ನಿಯಮದಲ್ಲಿ ಬದಲಾವಣೆ

ದೇಶದ ಅತಿದೊಡ್ಡ ಬ್ಯಾಂಕ್​ ಆಗಿರುವ ಸ್ಟೇಟ್​ ಬ್ಯಾಂಕ್​ ಆಫ್​ ಇಂಡಿಯಾ(ಎಸ್.ಬಿ.ಐ.) ತನ್ನ ಚೆಕ್​ಗಳಿಗೆ ಸಕಾರಾತ್ಮಕ ವೇತನ ವ್ಯವಸ್ಥೆ ರೂಪಿಸಲು ಸಜ್ಜಾಗಿದೆ. ಹೊಸ ನಿಯಮದ ಪ್ರಕಾರ, 50 ಸಾವಿರ ರೂಪಾಯಿಗಿಂತಲೂ ಹೆಚ್ಚಿನ ಪಾವತಿಗೆ ಪ್ರಮುಖ ವಿವರಗಳನ್ನ ಬ್ಯಾಂಕ್​​ಗೆ ನೀಡುವ ಅಗತ್ಯ ಬೀಳಬಹುದು. ಈ ಹೊಸ ಚೆಕ್​ ಪಾವತಿ ನಿಯಮವು ಜನವರಿ 1 ರಿಂದ ಜಾರಿಗೆ ಬರಲಿದೆ ಎಂದು ಹೇಳಲಾಗಿದೆ.

ಭಾರತೀಯ ರಿಸರ್ವ್ ಬ್ಯಾಂಕ್ ಮಾರ್ಗಸೂಚಿಗಳ ಪ್ರಕಾರ, ಚೆಕ್​ ನೀಡುವುವರಿಂದ ಹೆಚ್ಚಿನ ವಿವರಗಳನ್ನ ಪಡೆಯುವ ಮೂಲಕ ವ್ಯವಹಾರ ಸುರಕ್ಷತೆಯನ್ನ ಇನ್ನಷ್ಟು ಹೆಚ್ಚಿಸಲಿದ್ದೇವೆ. ಖಾತೆ ಸಂಖ್ಯೆ, ಚೆಕ್​ ಸಂಖ್ಯೆ, ಚೆಕ್​ ಮೊತ್ತ, ಚೆಕ್​​​ ಪಾವತಿಗೆ ಸಂಬಂಧಿಸಿದ ವಿವರಗಳನ್ನ ವೆಬ್​ಸೈಟ್​ನಲ್ಲಿ ಉಲ್ಲೇಖಿಸಲಾಗಿದೆ. ಇನ್ನಷ್ಟು ಮಾಹಿತಿ ಬೇಕಿದ್ದಲ್ಲಿ ನೀವು ಹತ್ತಿರದ ಶಾಖೆಯನ್ನ ಭೇಟಿ ಮಾಡಬಹುದಾಗಿದೆ.

ಕೆಲ ತಿಂಗಳ ಹಿಂದೆಯಷ್ಟೇ ರಿಸರ್ವ್ ಬ್ಯಾಂಕ್​​ ಪಾಸಿಟಿವ್​ ಪೇ ವ್ಯವಸ್ಥೆಯನ್ನ ಪರಿಚಯಿಸಿತ್ತು. ಗ್ರಾಹಕರ ಸುರಕ್ಷೆ ಹಾಗೂ ಮೋಸದ ಜಾಲದಿಂದ ತಪ್ಪಿಸಿಕೊಳ್ಳಲು ಈ ವ್ಯವಸ್ಥೆ ಬ್ಯಾಂಕ್​​ಗಳಲ್ಲಿ ಜಾರಿಗೆ ಬರಲಿದೆ ಎಂದು ಆರ್​​ಬಿಐ ಗವರ್ನರ್​​ ಶಕ್ತಿಕಾಂತ್​ ದಾಸ್​ ಹೇಳಿದ್ದರು.

ಭಾರೀ ಮೊತ್ತದ ಚೆಕ್​ಗಳನ್ನ ನೀಡುವ ಗ್ರಾಹಕರ ದಾಖಲೆಯನ್ನ ಮತ್ತೊಮ್ಮೆ ಪರಿಶೀಲನೆ ಮಾಡುವ ವ್ಯವಸ್ಥೆಯೇ ಪಾಸಿಟಿವ್​ ಪೇ. ಈ ವ್ಯವಸ್ಥೆಯಡಿಯಲ್ಲಿ ಚೆಕ್​ ನೀಡುವವರು ಬ್ಯಾಂಕ್​ಗೆ ದಿನಾಂಕ, ಚೆಕ್​ ಪಾವತಿದಾರರ ವಿವರ, ಸ್ವೀಕರಿಸುವವರ ವಿವರ, ಮೊತ್ತ ಇತ್ಯಾದಿಗಳ ಬಗ್ಗೆ ಕೆಲ ದಾಖಲೆಗಳನ್ನ ಸಲ್ಲಿಸಬೇಕಾಗುತ್ತದೆ.