ಕಾರು ಪ್ರಿಯರಿಗೆ ರೆನಾಲ್ಟ್​ ಕಂಪನಿಯಿಂದ ಶಾಕಿಂಗ್​ ನ್ಯೂಸ್​..!

ಪ್ರಸಿದ್ಧ ಕಾರು ತಯಾರಿಕಾ ಕಂಪನಿಗಳಲ್ಲೊಂದಾದ ರೆನಾಲ್ಟ್​ ತನ್ನ ಸಂಪೂರ್ಣ ಮಾಡೆಲ್​ ರೇಂಜ್​​ನ ಬೆಲೆಯಲ್ಲಿ 28 ಸಾವಿರ ರೂಪಾಯಿ ಏರಿಕೆ ಮಾಡೋದಾಗಿ ಹೇಳಿದೆ. ಮುಂದಿನ ವರ್ಷದ ಜನವರಿಯಿಂದ ಈ ಹೊಸ ಬೆಲೆ ಅನ್ವಯವಾಗಲಿದೆ. ಕ್ವಿಡ್​, ಡಸ್ಟರ್​, ಟ್ರೈಬರ್​​ ಸೇರಿದಂತೆ ಸಾಕಷ್ಟು ಪ್ರಸಿದ್ದ ಕಾರುಗಳನ್ನ ರೆನಾಲ್ಟ್ ಮಾರುಕಟ್ಟೆಗೆ ಪರಿಚಯಿಸಿದೆ.

ಕಾರು ತಯಾರಿಕೆಗೆ ಬಳಕೆ ಮಾಡಲಾಗುವ ಸ್ಟೀಲ್​, ಆಲ್ಯಮಿನಿಯಂ, ಪ್ಲಾಸ್ಟಿಕ್​ ಸೇರಿದಂತೆ ವಿವಿಧ ವಸ್ತುಗಳ ಬೆಲೆ ಏರಿಕೆಯಾಗಿರೋದ್ರಿಂದ ಕಾರಿನ ಬೆಲೆ ಏರಿಕೆ ಮಾಡೋದು ಅನಿವಾರ್ಯವಾಗಿದೆ ಅಂತಾ ರೆನಾಲ್ಟ್ ಇಂಡಿಯಾ ಮಾಹಿತಿ ನೀಡಿದೆ.

ವಾಹನ ತಯಾರಿಸಲು ಬೇಕಾದ ಕಚ್ಚಾ ವಸ್ತುಗಳ ಬೆಲೆ ಏರಿಕೆಯಾದ್ದರಿಂದ ಮಾರುತಿ ಸುಜುಕಿ, ಫೋರ್ಡ್ ಇಂಡಿಯಾ ಹಾಗೂ ಮಹೀಂದ್ರಾ & ಮಹೀಂದ್ರಾ ಮುಂದಿನ ವರ್ಷದಿಂದ ತಮ್ಮ ಉತ್ಪನ್ನಗಳ ಮೇಲೆ ಬೆಲೆ ಹೆಚ್ಚಿಸೋದಾಗಿ ಈಗಾಗಲೇ ಘೋಷಣೆ ಮಾಡಿವೆ.

ಇದೀಗ ಈ ಸಾಲಿಗೆ ರೆನಾಲ್ಟ್ ಕಂಪನಿ ಕೂಡ ಸೇರಿದೆ. ಈ ವಾರದ ಆರಂಭದಲ್ಲಿ ದ್ವಿಚಕ್ರ ವಾಹನ ತಯಾರಿಕ ಕಂಪನಿಯಾದ ಹೀರೋ ಮೋಟೋಕಾರ್ಪ್​ ಜನವರಿ 1 ರಿಂದ ತನ್ನ ವಾಹನಗಳ ಬೆಲೆಯಲ್ಲಿ 1500 ರೂಪಾಯಿ ಏರಿಕೆ ಮಾಡೋದಾಗಿ ಹೇಳಿತ್ತು.