ದೇಶದಲ್ಲಿ ಕೋವಿಡ್‌ನ ಎರಡನೇ ಅಲೆ ಆತಂಕ ಸೃಷ್ಟಿಸಿರುವ ಹಿನ್ನೆಲೆಯಲ್ಲಿ ಕಾರ್ಮಿಕರ ಭವಿಷ್ಯ ನಿಧಿ ಸಂಸ್ಥೆ (ಇಪಿಎಫ್‌ಓ) ತನ್ನ ಐದು ಕೋಟಿ ಚಂದಾದಾರರಿಗೆ ಕೋವಿಡ್-19 ಮುಂಗಡ ಹಿಂಪಡೆದುಕೊಂಡು ಸಾಂಕ್ರಮಿಕದ ಸಂಕಷ್ಟದ ದಿನಗಳಲ್ಲಿ ಬಳಸಿಕೊಳ್ಳಲು ಅವಕಾಶ ಮಾಡಿಕೊಟ್ಟಿದೆ.
ಹೆಚ್ಚು ಹಣವನ್ನು ಹಿಂಪಡೆಯಲು ಅವಕಾಶ ಕೊಡುವುದನ್ನು 2020ರ ಮಾರ್ಚ್‌ನಲ್ಲಿ ಪ್ರಧಾನ ಮಂತ್ರಿ ಗರೀಬ್ ಕಲ್ಯಾಣ ಯೋಜನೆಯಡಿ ಕೋವಿಡ್-19 ನೆರವಿನ ಪ್ಯಾಕೇಜ್ ರೂಪದಲ್ಲಿ ನೀಡಲಾಗಿತ್ತು.
“ಕೋವಿಡ್ ಎರಡನೇ ಅಲೆಯ ಸಂದರ್ಭದಲ್ಲಿ ಇಪಿಎಫ್‌ಓ ತನ್ನ ಚಂದಾದಾರರಿಗೆ ಮುಂಗಡವಾಗಿ ನಾನ್‌-ರೀಫಂಡಬಲ್ ಹಣವನ್ನು ಹಿಂಪಡೆಯಲು ಅವಕಾಶ ನೀಡಲಾಗಿದೆ” ಎಂದು ಕಾರ್ಮಿಕ ಸಚಿವಾಲಯ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.
ಈ ಸಂಬಂಧ ಕಾರ್ಮಿಕ ಹಾಗೂ ನೌಕರರ ಭವಿಷ್ಯನಿಧಿ ಯೋಜನೆ, 1952 ಕಾಯಿದೆಗೆ ತಿದ್ದುಪಡಿ ತರಲಾಗಿದ್ದು, ಸಬ್‌-ಪ್ಯಾರಾ (3) ಪ್ಯಾರಾಗ್ರಾಫ್ 68ಎಲ್‌, ನೋಟಿಫಿಕೇಷನ್ ಮೂಲಕ ಅಧಿಕೃತ ಗೆಜೆಟ್‌ನಲ್ಲಿ ಸೇರಿಸಲಾಗಿದೆ.
ಈ ಯೋಜನೆಯಡಿ, ನಾನ್‌-ರೀಫಂಡಬಲ್ ಹಿಂಪಡೆತವನ್ನು ಮೂರು ತಿಂಗಳ ಮೂಲ ವೇತನ ಹಾಗೂ ತುಟ್ಟಿ ಭತ್ಯೆ (ಮೂಲ ವೇತನದ ಭಾಗ) ಅಥವಾ ಸದಸ್ಯರ ಇಪಿಎಫ್ ಖಾತೆಯಲ್ಲಿ ಕ್ರೆಡಿಟ್ ಆಗಿರುವ ಹಣದ 75%ದಷ್ಟು ಹಣವನ್ನು ತೆಗೆದುಕೊಳ್ಳಬಹುದಾಗಿದೆ.
ಮಾಸಿಕ 15,000 ಕ್ಕಿಂತ ಕಡಿಮೆ ವೇತನ ಪಡೆಯುತ್ತಿರುವ ಮಂದಿಗೆ ಈ ನಡೆಯು ಬಹಳ ಅನುಕೂಲವಾಗಲಿದೆ. ಇದುವರೆಗೂ ಇಪಿಎಫ್ 76.31 ಲಕ್ಷ ಕೋವಿಡ್-19 ಮುಂಗಡ ಕ್ಲೇಮ್‌ಗಳನ್ನು ಕ್ಲಿಯರ್‌ ಮಾಡಿ ಒಟ್ಟಾರೆ 18,698.15 ಕೋಟಿ ರೂ.ಗಳನ್ನು ವಿತರಿಸಿದೆ.
Loading ...