ಖಾತೆ ಸ್ಥಗಿತವಾಗಿದ್ರೂ ಮರುಬಳಕೆಗೆ ಅವಕಾಶ: ಪ್ರಮುಖ ಹೂಡಿಕೆ ಯೋಜನೆಯಾದ PPF ಬಗ್ಗೆ ಇಲ್ಲಿದೆ ಮುಖ್ಯ ಮಾಹಿತಿ

ಸಾರ್ವಜನಿಕ ಭವಿಷ್ಯ ನಿಧಿ(PPF) 15 ವರ್ಷಗಳ ಹೂಡಿಕೆ ಯೋಜನೆಯಾಗಿದ್ದು, ಪಿಪಿಎಫ್​​ ಕುರಿತಾಗಿ ಸಾಮಾನ್ಯವಾಗಿ ಎಲ್ಲರಿಗೂ ಮಾಹಿತಿ ಇರುತ್ತೆ.

ತೆರಿಗೆ ವಿನಾಯಿತಿ ಪಡೆಯಲು ಪಿಪಿಎಫ್​​ನಲ್ಲಿ ಠೇವಣಿ ಹೂಡುವ ಗ್ರಾಹಕರು ಬಡ್ಡಿ ಸಂಪಾದನೆ, ಮೊತ್ತ ವಾಪಸ್ಸಾತಿ ಸೇರಿದಂತೆ ಅನೇಕ ಪ್ರಯೋಜನಗಳನ್ನ ಪಡೆಯುತ್ತಾರೆ. ಪಿಪಿಎಫ್​ 15 ವರ್ಷಗಳ ಹೂಡಿಕೆ ಯೋಜನೆಯಾಗಿದ್ದರೂ 20, 25 ಹಾಗೂ 30 ವರ್ಷಗಳ ಅವಧಿಗೆ ಈ ಯೋಜನೆಯನ್ನ ವಿಸ್ತರಣೆ ಮಾಡಬಹುದಾಗಿದೆ.

ಯಾವುದೇ ಹಣಕಾಸು ವರ್ಷದಲ್ಲಿ ಕನಿಷ್ಟ 500 ರೂಪಾಯಿ ನಿಮ್ಮ ಪಿಪಿಎಫ್​ ಖಾತೆಯಲ್ಲಿ ಠೇವಣಿ ಇಡದೇ ಹೋದಲ್ಲಿ ನಿಮ್ಮ ಪಿಪಿಎಫ್​ ಖಾತೆ ಸ್ಥಗಿತಗೊಳ್ಳುತ್ತೆ. ಸ್ಥಗಿತಗೊಂಡ ಪಿಪಿಎಫ್​ ಖಾತೆಯಲ್ಲಿ ಸಾಲ ಸೌಲಭ್ಯವಾಗಲಿ ಅಥವಾ ಇನ್ಯಾವುದೇ ಸೌಲಭ್ಯಗಳು ಸಿಗೋದಿಲ್ಲ. ಆದರೆ, ಸ್ಥಗಿತಗೊಂಡ ಖಾತೆಯನ್ನ ಬಹಳ ಸುಲಭವಾಗಿ ಮರುಬಳಕೆ ಮಾಡಬಹುದಾಗಿದೆ.

1968 ರಲ್ಲಿ ರಾಷ್ಟ್ರೀಯ ಉಳಿತಾಯ ಸಂಸ್ಥೆ ಪರಿಚಯಿಸಿದ ಪಿಪಿಎಫ್​ ಯೋಜನೆ ಸಣ್ಣ ಉಳಿತಾಯದ ಮೊತ್ತವನ್ನ ಠೇವಣಿ ಇಡುವ ಮೂಲಕ ಗ್ರಾಹಕರಿಗೆ ಲಾಭದಾಯಕ ಮೊತ್ತ ನೀಡುವ ಗುರಿಯನ್ನ ಹೊಂದಿದೆ. ಪ್ರಸ್ತುತ ಪಿಪಿಎಫ್​ ಖಾತೆಯಲ್ಲಿ ಪ್ರತಿವರ್ಷ ಕನಿಷ್ಟ 500 ರೂಪಾಯಿ ಹಾಗೂ ಗರಿಷ್ಠ 1.5 ಲಕ್ಷ ರೂಪಾಯಿ ವಹಿವಾಟು ನಡೆಸಬಹುದಾಗಿದೆ. ನೀವೇನಾದರೂ ನಿಮ್ಮ ಪಿಪಿಎಫ್​ ಖಾತೆಯಲ್ಲಿ 1.5 ಲಕ್ಷ ರೂಪಾಯಿಗಿಂತ ಹೆಚ್ಚು ಹಣವನ್ನ ಠೇವಣಿ ಇಟ್ಟರೆ, ನಿಮಗೆ ಹೆಚ್ಚುವರಿ ಬಡ್ಡಿ ಸಿಗಲ್ಲ. ಅಥವಾ ತೆರಿಗೆ ಕಾಯ್ದೆಯಡಿಯಲ್ಲಿ ರಿಯಾಯಿತಿಯೂ ಸಿಗುವುದಿಲ್ಲ ಎನ್ನಲಾಗಿದೆ.