ದೇಶದ ಜನತೆಗೆ ಗುಡ್ ನ್ಯೂಸ್: ಇನ್ಮುಂದೆ ಪ್ಯಾಕೆಟ್ ನೋಡಿದ್ರೆ ತಿಳಿಯುತ್ತೆ ಆಹಾರ ಎಷ್ಟು ಆರೋಗ್ಯಕರ ಅನ್ನೋದು

ನವದೆಹಲಿ: ಪ್ಯಾಕ್ ಮಾಡಿದ ಆಹಾರದ ಗುಣಮಟ್ಟದ ಬಗ್ಗೆ ಜನಸಾಮಾನ್ಯರಷ್ಟೇ ಅಲ್ಲ, ಸರ್ಕಾರವೂ ಚಿಂತಿಸುತ್ತಿದ್ದು, ಪ್ಯಾಕೇಜ್ ಮಾಡಿದ ಸರಕುಗಳಿಗೆ ಆರೋಗ್ಯ ಸ್ಟಾರ್ ರೇಟಿಂಗ್ ಶೀಘ್ರದಲ್ಲೇ ಪ್ರಾರಂಭವಾಗುತ್ತದೆ.

ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ(FSSAI) ಎಲ್ಲಾ ಪ್ಯಾಕೇಜ್ ಮಾಡಲಾದ ಉತ್ಪನ್ನಗಳ ಆರೋಗ್ಯದ ರೇಟಿಂಗ್‌ ಗಳನ್ನು ಮಾಡುತ್ತದೆ, ಇದರಿಂದ ಗ್ರಾಹಕರು ಖರೀದಿಸಿದ ಉತ್ಪನ್ನ ಆರೋಗ್ಯಕ್ಕೆ ಎಷ್ಟು ಹಾನಿಕಾರಕವಾಗಿದೆ ಎಂಬುದನ್ನು ತಿಳಿದುಕೊಳ್ಳಬಹುದು. ಎಫ್‌ಎಸ್‌ಎಸ್‌ಎಐ ಉನ್ನತ ಅಧಿಕಾರಿಯೊಬ್ಬರು, ಆರೋಗ್ಯ ಸ್ಟಾರ್ ರೇಟಿಂಗ್‌ನ(ಹೆಚ್‌ಎಸ್‌ಆರ್) ಉದ್ದೇಶವು ಗ್ರಾಹಕರನ್ನು ಆರೋಗ್ಯಕರ ಆಹಾರದ ಕಡೆಗೆ ತರುವುದಾಗಿದೆ, ಇದರಿಂದಾಗಿ ಭಾರತೀಯರು ಕಳಪೆ ಜೀವನಶೈಲಿಯಿಂದ ಅನಾರೋಗ್ಯಕ್ಕೆ ಒಳಗಾಗುವುದನ್ನು ಉಳಿಸಬಹುದು ಎಂದು ಹೇಳಿದ್ದಾರೆ.

ರೇಟಿಂಗ್

ಉತ್ಪನ್ನಗಳಲ್ಲಿನ ಉಪ್ಪು, ಸಕ್ಕರೆ ಮತ್ತು ಕೊಬ್ಬಿನ ಪ್ರಮಾಣವನ್ನು ಆಧರಿಸಿ ಉತ್ಪನ್ನಗಳ ಆರೋಗ್ಯ ರೇಟಿಂಗ್ ಅನ್ನು ನಿರ್ಧರಿಸಲಾಗುತ್ತದೆ ಎಂದು FSSAI ಅಧಿಕಾರಿ ತಿಳಿಸಿದ್ದಾರೆ. ಅದರ ಮಾಹಿತಿಯನ್ನು ಪ್ಯಾಕೆಟ್‌ ನ ಮೇಲೆಯೇ ನೀಡಲಾಗುತ್ತದೆ. ಐಐಎಂ ಅಹಮದಾಬಾದ್‌ನ ಸಂಶೋಧನಾ ವರದಿಯ ನಂತರ ಈ ಸಿದ್ಧತೆಯನ್ನು ಮಾಡಲಾಗುತ್ತಿದ್ದು, ಪ್ಯಾಕೆಟ್‌ ನ ಮೊದಲ ಪುಟದಲ್ಲಿ ಮಾಹಿತಿಯನ್ನು ನೀಡುವುದರಿಂದ ಗ್ರಾಹಕರ ಮೇಲೆ ಹೆಚ್ಚಿನ ಪರಿಣಾಮ ಬೀರುತ್ತದೆ ಎಂದು ಹೇಳಲಾಗಿದೆ.

20 ಸಾವಿರ ಜನರ ಸಮೀಕ್ಷೆ

ಎಫ್‌ಎಸ್‌ಎಸ್‌ಎಐ ಸಿಇಒ ಅರುಣ್ ಸಿಂಘಾಲ್ ಮಾತನಾಡಿ, ಐಐಎಂ ಅಹಮದಾಬಾದ್ ದೇಶಾದ್ಯಂತ ಸುಮಾರು 20 ಸಾವಿರ ಜನರೊಂದಿಗೆ ಸಮೀಕ್ಷೆ ನಡೆಸಿದ್ದು, ಸಮಾಜವನ್ನು ಆರೋಗ್ಯಕರ ಆಹಾರದತ್ತ ಹೇಗೆ ತಿರುಗಿಸಬಹುದು ಎಂಬುದನ್ನು ಕಂಡುಕೊಂಡಿದೆ. ಈ ಬದಲಾವಣೆಯ ಮೂಲಕ ಮಧುಮೇಹ, ಬಿಪಿ ಮುಂತಾದ ಸಾಂಕ್ರಾಮಿಕವಲ್ಲದ ರೋಗಗಳು(ಎನ್.ಸಿ.ಡಿ.) ಬರದಂತೆ ತಡೆಯಲಾಗುವುದು ಎಂದರು.

ಪ್ಯಾಕೆಟ್‌ ಮಾಹಿತಿ

ಉತ್ಪನ್ನಗಳಲ್ಲಿರುವ ಪೌಷ್ಟಿಕಾಂಶದ ಮಾಹಿತಿಯನ್ನು ನೀಡಲು FSSAI ಈಗಾಗಲೇ ಸೂಚನೆಗಳನ್ನು ನೀಡಿದೆ, ಆದರೆ ಕಂಪನಿಗಳು ಅದನ್ನು ಪ್ಯಾಕೆಟ್‌ನ ಹಿಂಭಾಗದಲ್ಲಿ ನೀಡುತ್ತವೆ. ಐಐಎಂ ಅಹಮದಾಬಾದ್ (ಐಐಎಂ-ಎ) ಮುಖಪುಟದಲ್ಲಿ ಮಾಹಿತಿ ನೀಡಿದರೆ ಹೆಚ್ಚಿನ ಪರಿಣಾಮ ಬೀರುತ್ತದೆ ಎಂದು ಸಲಹೆ ನೀಡಿದೆ. ಬ್ರಿಟನ್, ಚಿಲಿ, ಮೆಕ್ಸಿಕೋ, ನ್ಯೂಜಿಲೆಂಡ್ ಮತ್ತು ಆಸ್ಟ್ರೇಲಿಯಾದಂತಹ ದೇಶಗಳಲ್ಲಿ ಈ ಮಾನದಂಡವನ್ನು ಅನುಸರಿಸಲಾಗುತ್ತದೆ.