ಸಾಲಗಾರರಿಗೆ ಬಂಪರ್: ಬಡ್ಡಿ ಮನ್ನಾ ಜೊತೆಗೆ ಕ್ಯಾಶ್ ಬ್ಯಾಕ್ ನೀಡಲು ಮುಂದಾದ ಸರ್ಕಾರ

ನವದೆಹಲಿ: ಲಾಕ್ ಡೌನ್ ಅವಧಿಯಲ್ಲಿ ಸಾಲದ ಕಂತು ಪಾವತಿಸದವರ ಚಕ್ರಬಡ್ಡಿಯನ್ನು ಮನ್ನಾ ಮಾಡಲಾಗಿದ್ದು, ಇಎಂಐ ಪಾವತಿಸಿದವರಿಗೆ ಕ್ಯಾಶ್ ಬ್ಯಾಕ್ ಸೌಲಭ್ಯ ನೀಡಲು ಸರ್ಕಾರ ಚಿಂತನೆ ನಡೆಸಿದೆ.

ಮಾರ್ಚ್ 31 ರಿಂದ ಆಗಸ್ಟ್ ​ವರೆಗೆ ಇಎಂಐ ಪಾವತಿಗೆ ಆರ್​ಬಿಐ ವಿನಾಯಿತಿ ನೀಡಿತ್ತು. ಬಳಿಕ ಮೊರಾಟೋರಿಯಂ​ ಅವಧಿಯಲ್ಲಿ ಬಡ್ಡಿ ಮೇಲಿನ ಬಡ್ಡಿ ಪಾವತಿ ವಿಚಾರ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿತ್ತು. ಸುಪ್ರೀಂ ಕೋರ್ಟ್​ ಬಡ್ಡಿಯ ಮೇಲಿನ ಬಡ್ಡಿ ವಸೂಲಿ ಮಾಡದಂತೆ ಸೂಚನೆ ನೀಡಿತ್ತು. ಇದರಿಂದ ಸರ್ಕಾರದ ಖಜಾನೆಗೆ ಸರಿಸುಮಾರು 7000 ಕೋಟಿ ರೂಪಾಯಿ ಹೊರೆ ಬಿದ್ದಿತ್ತು.

ಆದರೆ ಲಾಕ್​ಡೌನ್​ನಂತಹ ಕಠಿಣ ಪರಿಸ್ಥಿತಿಯಲ್ಲೂ ಮೊರಟೋರಿಯಂ ಲಾಭ ಪಡೆಯದ ಅನೇಕ ಸಾಲಗಾರರು ಬ್ಯಾಂಕ್​ ಗೆ ಸರಿಯಾದ ಸಮಯದಲ್ಲಿ ಬಡ್ಡಿ ಪಾವತಿ ಮಾಡಿದ್ದರು.

ಇದೀಗ ಇಂತಹ ಸಾಲಗಾರರಿಗೆ ಕ್ಯಾಶ್ ​ಬ್ಯಾಕ್​ ಸೌಕರ್ಯ ನೀಡಲು ಕೇಂದ್ರ ಹಣಕಾಸು ಸಚಿವಾಲಯ ನಿರ್ಧರಿಸಿದೆ. ಇದರಿಂದ ಸರಿಯಾದ ಕಂತುಗಳಲ್ಲಿ ಬಡ್ಡಿ ಪಾವತಿಸಿದ ಸಾಲಗಾರರಿಗೆ 6 ತಿಂಗಳ ಸಿಂಪಲ್​ ಲೋನ್​ ಇಂಟರೆಸ್ಟ್‌ ನ ಡಿಫರೆನ್ಸ್ ಲಾಭ ಸಿಗಲಿದೆ.