6 ಏರ್ ಬ್ಯಾಗ್ ನಿಯಮ ಜಾರಿಗೆ ಒಂದೇ ವಾರ: ಅ. 1 ರ ಗಡುವು ಮುಂದೂಡಿಕೆ ಸಾಧ್ಯತೆ

ಕಾರ್ ಗಳಲ್ಲಿ ಆರು ಏರ್‌ ಬ್ಯಾಗ್ ನಿಯಮವನ್ನು ಜಾರಿಗೆ ತರಲು ಕೇಂದ್ರ ಸರ್ಕಾರ ಮುಂದಾಗಿದ್ದು, ಇದಕ್ಕಾಗಿ ನಿಗದಿ ಮಾಡಿದ್ದ ಅಕ್ಟೋಬರ್ 1 ರ ಗಡುವನ್ನು ಮುಂದೂಡುವ ಸಾಧ್ಯತೆಯಿದೆ ಎಂದು ಮೂಲಗಳು ತಿಳಿಸಿವೆ.

ಸಾರಿಗೆ ಸಚಿವ ನಿತಿನ್ ಗಡ್ಕರಿ ಅವರು, ಪ್ರಯಾಣಿಕರ ಸುರಕ್ಷತೆಗಾಗಿ ಕಾರ್ ತಯಾರಕರು ಎಲ್ಲಾ ಕಾರ್ ಗಳಲ್ಲಿ ಆರು ಏರ್‌ ಬ್ಯಾಗ್‌ಗಳನ್ನು ಒದಗಿಸುವುದನ್ನು ಕಡ್ಡಾಯಗೊಳಿಸಲು ಕೇಂದ್ರ ಪ್ರಯತ್ನಿಸುತ್ತಿದೆ. ನಾವು ಇನ್ನೂ ಮಧ್ಯಸ್ಥಗಾರರೊಂದಿಗೆ ಮಾತುಕತೆ ನಡೆಸುತ್ತಿದ್ದೇವೆ ಮತ್ತು ಸಾಧ್ಯವಾದಷ್ಟು ಬೇಗ ರಸ್ತೆಗಳಲ್ಲಿ ಸುರಕ್ಷಿತ ಕಾರುಗಳನ್ನು ಬಯಸುತ್ತೇವೆ ಎಂದು ಹೇಳಿದ್ದರು.

ಜನವರಿ 2022 ರಲ್ಲಿ ರಸ್ತೆ ಸಾರಿಗೆ ಮತ್ತು ಹೆದ್ದಾರಿಗಳ ಸಚಿವಾಲಯ ಕರಡು ಅಧಿಸೂಚನೆಯಲ್ಲಿ, ಅಕ್ಟೋಬರ್ 1, 2022 ರ ನಂತರ ತಯಾರಿಸಲಾದ M1 ವರ್ಗದ ವಾಹನಗಳಿಗೆ ಎರಡು ಬದಿ ಏರ್ ಬ್ಯಾಗ್‌ ಗಳನ್ನು ಅಳವಡಿಸಬೇಕು ಎಂದು ಪ್ರಸ್ತಾಪಿಸಿದೆ. ಮುಂಭಾಗದ ಸಾಲಿನ ಔಟ್‌ಬೋರ್ಡ್ ಆಸನ ಸ್ಥಾನಗಳು ಮತ್ತು ಎರಡು ಬದಿಯ ಕರ್ಟನ್/ಟ್ಯೂಬ್ ಏರ್ ಬ್ಯಾಗ್‌ ಗಳು, ಔಟ್‌ಬೋರ್ಡ್ ಆಸನ ಸ್ಥಾನಗಳನ್ನು ಹೊಂದಿರುವ ವ್ಯಕ್ತಿಗಳಿಗೆ ತಲಾ ಒಂದು, ಇದು ಒಟ್ಟಾರೆಯಾಗಿ ಪ್ರತಿ ಕಾರ್ ಗೆ ಆರು ಏರ್‌ ಬ್ಯಾಗ್‌ ಗಳನ್ನು ಒಳಗೊಂಡಿದೆ.

ಏರ್‌ ಬ್ಯಾಗ್ ವಾಹನದ ಪ್ರಯಾಣಿಕರ ರಕ್ಷಣೆ ವ್ಯವಸ್ಥೆಯಾಗಿದ್ದು, ಘರ್ಷಣೆಯ ಸಮಯದಲ್ಲಿ ಚಾಲಕ ಮತ್ತು ವಾಹನದ ಡ್ಯಾಶ್‌ ಬೋರ್ಡ್ ನಡುವೆ ಮಧ್ಯಪ್ರವೇಶಿಸುತ್ತದೆ. ಇದರಿಂದಾಗಿ ಗಂಭೀರವಾದ ಗಾಯಗಳನ್ನು ತಡೆಯುತ್ತದೆ.