ಭೂ ಪರಿವರ್ತನೆ ಎಂದರೇನು ?ಭೂ ಪರಿವರ್ತನೆ ಮತ್ತು ಭೂ ಬಳಕೆ ಬದಲಾವಣೆಗೆ ಇರುವ ವ್ಯತ್ಯಾಸ ಏನು ?

ಬೆಂಗಳೂರು: ನೀವು ಕೃಷಿ ಭೂಮಿಯನ್ನು ಖರೀದಿಸಿ ಅಲ್ಲಿ ಮನೆ ಕಟ್ಟಲು ಅಥವಾ ವಾಣಿಜ್ಯ ಮಳಿಗೆ ತೆರೆಯಲು ಪ್ಲಾನ್ ಮಾಡಿದ್ದೀರಾ? ಹಾಗಿದ್ದರೆ ಬರೀ ಜಮೀನು ಇದ್ದರೆ ಸಾಲದು, ಅದು ಕಡ್ಡಾಯವಾಗಿ ಭೂ ಪರಿವರ್ತನೆ (Land Conversion) ಆಗಿರಬೇಕು. ಇಲ್ಲವಾದಲ್ಲಿ ನಿಮ್ಮ ಆಸ್ತಿ ಕಾನೂನುಬಾಹಿರ ಎನಿಸಿಕೊಳ್ಳಬಹುದು

ಏನಿದು ಭೂ ಪರಿವರ್ತನೆ? ಡಿಸಿ ಕನ್ವರ್ಷನ್ (DC Conversion) ಮತ್ತು ಭೂ ಬಳಕೆ ಬದಲಾವಣೆ (Change of Land Use) ನಡುವಿನ ವ್ಯತ್ಯಾಸವೇನು? ಈ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.

ಭೂ ಪರಿವರ್ತನೆ ಎಂದರೇನು?

ಸರಳವಾಗಿ ಹೇಳುವುದಾದರೆ, ಕೃಷಿ ಉದ್ದೇಶಕ್ಕಾಗಿ ಇರುವ ಭೂಮಿಯನ್ನು ವಸತಿ, ವಾಣಿಜ್ಯ ಅಥವಾ ಕೈಗಾರಿಕಾ ಉದ್ದೇಶಗಳಿಗಾಗಿ ಬಳಸಲು ಕಾನೂನುಬದ್ಧವಾಗಿ ಅನುಮತಿ ಪಡೆಯುವುದೇ ಭೂ ಪರಿವರ್ತನೆ. ಕರ್ನಾಟಕ ಭೂ ಕಂದಾಯ ಕಾಯ್ದೆ 1964ರ ಸೆಕ್ಷನ್ 95 ರ ಪ್ರಕಾರ, ಜಿಲ್ಲಾಧಿಕಾರಿಗಳಿಂದ (DC) ಈ ಅನುಮತಿ ಪಡೆಯುವುದು ಕಡ್ಡಾಯ.

ಭೂ ಪರಿವರ್ತನೆ vs ಭೂ ಬಳಕೆ ಬದಲಾವಣೆ: ವ್ಯತ್ಯಾಸವೇನು?

ನಗರಾಭಿವೃದ್ಧಿ ಪ್ರಾಧಿಕಾರಗಳು (BDA, MUDA ಇತ್ಯಾದಿ) ನಗರದ ಮಾಸ್ಟರ್ ಪ್ಲಾನ್ ಅಥವಾ ಸಿಡಿಪಿ (CDP) ಸಿದ್ಧಪಡಿಸುವಾಗ ಭೂಮಿಯನ್ನು ವಿವಿಧ ವಲಯಗಳಾಗಿ ವಿಂಗಡಿಸಿರುತ್ತವೆ:

ಹಳದಿ ವಲಯ (Yellow Zone): ಇದು ವಸತಿ ಅಥವಾ ಆರ್ಥಿಕ ಚಟುವಟಿಕೆಗೆ ಮೀಸಲಿಟ್ಟ ಜಾಗ. ಇಲ್ಲಿರುವ ಕೃಷಿ ಭೂಮಿಯನ್ನು ಕೃಷಿಯೇತರ ಉದ್ದೇಶಕ್ಕೆ ಬಳಸಲು ಜಿಲ್ಲಾಧಿಕಾರಿಗಳು ನೇರವಾಗಿ ಅನುಮತಿ ನೀಡಬಹುದು. ಇದನ್ನು ಡಿಸಿ ಕನ್ವರ್ಷನ್ ಎನ್ನಲಾಗುತ್ತದೆ.

ಹಸಿರು ವಲಯ (Green Zone): ಇದು ಕೃಷಿ, ಅರಣ್ಯ ಅಥವಾ ಪರಿಸರಕ್ಕೆ ಮೀಸಲಾದ ಜಾಗ. ಇಲ್ಲಿರುವ ಭೂಮಿಯನ್ನು ಜಿಲ್ಲಾಧಿಕಾರಿಗಳು ನೇರವಾಗಿ ಪರಿವರ್ತಿಸಲು ಸಾಧ್ಯವಿಲ್ಲ. ಮೊದಲು ಸರ್ಕಾರಕ್ಕೆ ಅರ್ಜಿ ಸಲ್ಲಿಸಿ, ಮುಖ್ಯಮಂತ್ರಿಗಳ ಅನುಮತಿ ಪಡೆದು ಭೂ ಬಳಕೆ ಬದಲಾವಣೆ ಆದೇಶ ಪಡೆಯಬೇಕು. ಆ ಬಳಿಕವಷ್ಟೇ ಜಿಲ್ಲಾಧಿಕಾರಿಗಳು ಭೂ ಪರಿವರ್ತನೆ ಮಾಡಿಕೊಡುತ್ತಾರೆ.

ಭೂ ಪರಿವರ್ತನೆಗೆ ಬೇಕಾಗುವ ಮುಖ್ಯ ದಾಖಲೆಗಳು:

ನಿಮ್ಮ ಭೂಮಿಯನ್ನು ಪರಿವರ್ತಿಸಲು ಜಿಲ್ಲಾಧಿಕಾರಿಗಳಿಗೆ ಅರ್ಜಿ ಸಲ್ಲಿಸುವಾಗ ಈ ಕೆಳಗಿನ ದಾಖಲೆಗಳು ಅತ್ಯಗತ್ಯ:

RTC (ಪಹಣಿ): 3 ಪ್ರತಿಗಳು.

ಜಮೀನಿನ ನಕ್ಷೆ (Sketch): 3 ಪ್ರತಿಗಳು.

ವಲಯ ಪ್ರಮಾಣಪತ್ರ (Zone Certificate): ನಗರಾಭಿವೃದ್ಧಿ ಪ್ರಾಧಿಕಾರದಿಂದ ಪಡೆದದ್ದು.

ಬಾಕಿಯಿಲ್ಲದ ಪ್ರಮಾಣಪತ್ರ (No Due Certificate): ಗ್ರಾಮ ಲೆಕ್ಕಿಗರಿಂದ ಪಡೆಯಬೇಕು.

MR ಆದೇಶದ ಪ್ರತಿ (Mutation Record).

NOC (ನಿರಾಪೇಕ್ಷಣಾ ಪತ್ರ): ಒಂದು ವೇಳೆ ಜಮೀನು ಸಮುದ್ರ ತೀರ ಅಥವಾ ನದಿ ದಡದಲ್ಲಿದ್ದರೆ CRZ ನಿಂದ ಅನುಮತಿ ಬೇಕು.