ಬೆಂಗಳೂರು: ಶಾಲಾ ಶಿಕ್ಷಣ ಎನ್ನುವುದು ಈಗ ಕೇವಲ ಜ್ಞಾನಾರ್ಜನೆಯ ಕೇಂದ್ರವಾಗಿ ಉಳಿದಿಲ್ಲ, ಬದಲಾಗಿ ಒಂದು ದೊಡ್ಡ ಉದ್ಯಮವಾಗಿ ಮಾರ್ಪಟ್ಟಿದೆ ಎಂಬ ಆರೋಪಕ್ಕೆ ಈ ವೈರಲ್ ಪೋಸ್ಟ್ ಸಾಕ್ಷಿಯಾಗಿದೆ. ಕಿಂಡರ್ಗಾರ್ಟನ್ (LKG/UKG) ಓದುತ್ತಿರುವ ಮಗುವಿನ ವಾರ್ಷಿಕ ಫೀಸ್ ಬರೋಬ್ಬರಿ 2.5 ಲಕ್ಷ ರೂಪಾಯಿಗೂ ಅಧಿಕ ಎಂಬ ಮಾಹಿತಿ ಹೊರಬರುತ್ತಿದ್ದಂತೆ ಅಂತರಾಷ್ಟ್ರೀಯ ಶಾಲೆಗಳ ಫೀಸ್ ದಂಧೆಯ ವಿರುದ್ಧ ನೆಟ್ಟಿಗರು ಕೆಂಡಾಮಂಡಲವಾಗಿದ್ದಾರೆ.
ಸಾಕ್ಷಿ ಎಂಬುವವರು ‘X’ (ಟ್ವಿಟ್ಟರ್) ನಲ್ಲಿ ಹಂಚಿಕೊಂಡಿರುವ ಈ ಪೋಸ್ಟ್ನಲ್ಲಿ ಶಾಲೆಯ ಫೀಸ್ ಚಾರ್ಟ್ ಅನ್ನು ಲಗತ್ತಿಸಿ, ಟ್ವಿಂಕಲ್ ಟ್ವಿಂಕಲ್ ಲಿಟಲ್ ಸ್ಟಾರ್ ಕಲಿಯಲು 2.5 ಲಕ್ಷ ಫೀಸ್ ಎಂದು ವ್ಯಂಗ್ಯವಾಡಿದ್ದಾರೆ.
ಫೀಸ್ ಚಾರ್ಟ್ನಲ್ಲಿ ಏನಿದೆ?
ವೈರಲ್ ಆಗಿರುವ ದಾಖಲೆಯ ಪ್ರಕಾರ, ಪೋಷಕರು ಪಾವತಿಸಬೇಕಾದ ಮೊತ್ತ ಹೀಗಿದೆ:
ಒಟ್ಟು ವಾರ್ಷಿಕ ಫೀಸ್: ಸುಮಾರು 2,24,718 ರೂಪಾಯಿ.
ಒಂದು ಬಾರಿಯ ಪ್ರವೇಶ ಶುಲ್ಕ (Admission Charge): 48,000 ರೂಪಾಯಿ (ಇದರಲ್ಲಿ 15,000 ರೂ. ಅಡ್ಮಿಷನ್ ಫೀಸ್ ಮತ್ತು 33,000 ರೂ. ಮರುಪಾವತಿಸಬಹುದಾದ ಠೇವಣಿ ಸೇರಿದೆ).
ಇತರ ವೆಚ್ಚಗಳು: ಈ ಶುಲ್ಕದಲ್ಲಿ ಟ್ರಾನ್ಸ್ಪೋರ್ಟ್ (ಬಸ್), ಯೂನಿಫಾರ್ಮ್, ಶೂಗಳು, ಸಾಕ್ಸ್ ಮತ್ತು ಕೆಫೆಟೇರಿಯಾ ವೆಚ್ಚಗಳು ಸೇರಿಲ್ಲ! ಇವೆಲ್ಲವನ್ನೂ ಸೇರಿಸಿದರೆ ವರ್ಷಕ್ಕೆ ಲಕ್ಷಾಂತರ ರೂಪಾಯಿ ಹೆಚ್ಚುವರಿ ಹೊರೆ ಬೀಳುವುದು ಖಚಿತ.
ಇಷ್ಟೊಂದು ಫೀಸ್ ಯಾಕೆ? ಶಾಲೆಗಳ ವಾದವೇನು?
ಇಷ್ಟು ದೊಡ್ಡ ಮೊತ್ತವನ್ನು ಸಮರ್ಥಿಸಿಕೊಳ್ಳುವ ಇಂತಹ ಪ್ರೀಮಿಯಂ ಶಾಲೆಗಳು ನೀಡುವ ಕಾರಣಗಳು ಹೀಗಿವೆ:
ಎಸಿ ಕ್ಲಾಸ್ರೂಮ್ಗಳು ಮತ್ತು ಅತ್ಯಾಧುನಿಕ ಮೂಲಭೂತ ಸೌಕರ್ಯ.
ಸ್ಕೇಟಿಂಗ್ ರಿಂಕ್, ಸ್ವಿಮ್ಮಿಂಗ್ ಪೂಲ್ ಮತ್ತು ಜಿಮ್ಖಾನಾ ಸೌಲಭ್ಯಗಳು.
ಪ್ರತಿ ಮಗುವಿನ ಮೇಲೆ ಹೆಚ್ಚಿನ ಗಮನ ಹರಿಸಲು ಸಣ್ಣ ತರಗತಿಗಳು (Small Class Size).
ಆಕ್ಟಿವಿಟಿ ಝೋನ್ ಮತ್ತು ಪೌಷ್ಟಿಕ ಆಹಾರ ಯೋಜನೆಗಳು.
ನೆಟ್ಟಿಗರ ಆಕ್ರೋಶದ ನುಡಿಗಳು:
ಈ ಪೋಸ್ಟ್ ಕೆಳಗೆ ಹರಿದು ಬಂದಿರುವ ಕಾಮೆಂಟ್ಗಳು ಹೀಗಿವೆ:
ಸರ್ಕಾರ ಏನು ಮಾಡುತ್ತಿದೆ? ಖಾಸಗಿ ಶಾಲೆಗಳ ಈ ದಂಧೆಯನ್ನು ನಿಯಂತ್ರಿಸಲು ಯಾವುದೇ ನಿಯಮಗಳಿಲ್ಲವೇ? ಎಂದು ಒಬ್ಬರು ಪ್ರಶ್ನಿಸಿದ್ದಾರೆ.
“ಇಷ್ಟು ದೊಡ್ಡ ಮೊತ್ತಕ್ಕೆ ಮಗುವಿಗೆ ಟ್ವಿಂಕಲ್ ಟ್ವಿಂಕಲ್ ರೈಮ್ಸ್ ಅನ್ನು ಎಸಿ ಕ್ಲಾಸ್ರೂಮ್ನಲ್ಲಿ ಹೇಳಿಕೊಡುತ್ತಾರೋ ಅಥವಾ ಚಂದಿರನ ಬಳಿಯೇ ಕರೆದುಕೊಂಡು ಹೋಗುತ್ತಾರೋ?” ಎಂದು ನೆಟ್ಟಿಗರು ಲೇವಡಿ ಮಾಡಿದ್ದಾರೆ.
ಪೋಷಕರು ಕೂಡ ಅಷ್ಟೇ, ಶಾಲೆಯ ಹೆಸರಿನ ಮುಂದೆ ಇಂಟರ್ನ್ಯಾಷನಲ್ ಅಥವಾ ರಾಯಲ್ ಎಂದು ಇದ್ದರೆ ಸಾಕು, ಕಣ್ಣು ಮುಚ್ಚಿ ಲಕ್ಷಾಂತರ ರೂಪಾಯಿ ಸುರಿಯುತ್ತಾರೆ ಎಂದು ಕೆಲವರು ಟೀಕಿಸಿದ್ದಾರೆ.
