ಸೇಡು ತೀರಿಸಿಕೊಳ್ಳುವುದು ಅಂದರೆ ಬರಿ ಕಿರುಚಾಟವಲ್ಲ ಎದುರಾಳಿಯ ಅಂಗಳದಲ್ಲೇ ಗೆದ್ದು ನಮ್ಮ ಬಾವುಟ ಹಾರಿಸುವುದು ಈ ಮಾತನ್ನು ನಟ ಕಿಚ್ಚ ಸುದೀಪ್ ಅಕ್ಷರಶಃ ನಿಜ ಮಾಡಿ ತೋರಿಸಿದ್ದಾರೆ. ಇತ್ತೀಚೆಗೆ ತಮಿಳುನಾಡಿನ ಈರೋಡ್‌ನಲ್ಲಿ ಕನ್ನಡದ ಬಾವುಟಕ್ಕೆ ನಡೆದ ಅವಮಾನಕ್ಕೆ ಸುದೀಪ್ ಅದೇ ತಮಿಳುನಾಡಿನ ಮಣ್ಣಿನಲ್ಲಿ ಕನ್ನಡದ ಪತಾಕೆ ಹಾರಿಸುವ ಮೂಲಕ ಸೈಲೆಂಟ್ ಆಗಿಯೇ ಖಡಕ್ ಉತ್ತರ ನೀಡಿದ್ದಾರೆ.
ವಿವಾದದ ಹಿನ್ನೆಲೆ:
ಕೆಲವೇ ದಿನಗಳ ಹಿಂದೆ ಶಬರಿಮಲೆಗೆ ತೆರಳುತ್ತಿದ್ದ ಕನ್ನಡಿಗ ಮಾಲಾಧಾರಿಗಳನ್ನು ತಮಿಳುನಾಡಿನ ಈರೋಡ್ ಬಳಿ ಅಡ್ಡಗಟ್ಟಲಾಗಿತ್ತು. ವಾಹನಗಳ ಮೇಲಿದ್ದ ಕನ್ನಡದ ಬಾವುಟಗಳನ್ನು ಬಲವಂತವಾಗಿ ತೆರವುಗೊಳಿಸಿ, ಕನ್ನಡಿಗರಿಗೆ ಕಿರುಕುಳ ನೀಡಲಾಗಿತ್ತು. ಈ ಘಟನೆ ಇಡೀ ಕರ್ನಾಟಕದಾದ್ಯಂತ ಭಾರೀ ಆಕ್ರೋಶಕ್ಕೆ ಕಾರಣವಾಗಿತ್ತು.
ಮೈದಾನದಲ್ಲಿ ಕಿಚ್ಚನ ಬುಲ್ಡೋಜರ್ ಅಬ್ಬರ
ಈ ಕಹಿ ಘಟನೆ ಮಾಸುವ ಮುನ್ನವೇ, ಜನವರಿ 25ರಂದು ತಮಿಳುನಾಡಿನ ಕೊಯಮತ್ತೂರಿನಲ್ಲಿ ಸಿಸಿಎಲ್ (CCL) ಪಂದ್ಯಾವಳಿ ನಡೆಯಿತು. ಕರ್ನಾಟಕ ಬುಲ್ಡೋಜರ್ಸ್ ಮತ್ತು ಭೋಜ್‌ಪುರಿ ದಬಾಂಗ್ಸ್ ನಡುವಿನ ಈ ಹೈ-ವೋಲ್ಟೇಜ್ ಪಂದ್ಯದಲ್ಲಿ ಕಿಚ್ಚನ ಪಡೆ ರೋಷದಿಂದ ಕಣಕ್ಕಿಳಿಯಿತು.
ಬ್ಯಾಟಿಂಗ್ ಪವರ್: ಮೊದಲು ಬ್ಯಾಟ್ ಮಾಡಿದ ಕರ್ನಾಟಕ ತಂಡ 20 ಓವರ್‌ಗಳಲ್ಲಿ 202 ರನ್‌ಗಳ ಬೃಹತ್ ಮೊತ್ತ ಪೇರಿಸಿತು.
ಬೌಲಿಂಗ್ ಮ್ಯಾಜಿಕ್: ಈ ಗುರಿ ಬೆನ್ನಟ್ಟಿದ ಭೋಜ್‌ಪುರಿ ತಂಡ ಕರ್ನಾಟಕದ ಬೌಲಿಂಗ್ ದಾಳಿಗೆ ತತ್ತರಿಸಿ 184 ರನ್‌ಗಳಿಗೆ ಆಲೌಟ್ ಆಯಿತು.
ಈ ಭರ್ಜರಿ ಗೆಲುವಿನೊಂದಿಗೆ ಸುದೀಪ್ ತಂಡ ಸತತ ಮೂರನೇ ಜಯ ದಾಖಲಿಸಿ ಅಂಕಪಟ್ಟಿಯಲ್ಲಿ ‘ಟಾಪ್’ ಸ್ಥಾನಕ್ಕೇರಿತು.
ಅವಮಾನವಾದ ನೆಲದಲ್ಲೇ ಅಸ್ಮಿತೆಯ ವಿಜಯೋತ್ಸವ
ಪಂದ್ಯ ಗೆಲ್ಲುತ್ತಿದ್ದಂತೆ ಇಡೀ ಮೈದಾನವೇ ಸ್ತಬ್ಧವಾಗುವಂತಹ ದೃಶ್ಯವೊಂದು ಅಲ್ಲಿ ಅನಾವರಣಗೊಂಡಿತು. ಕಿಚ್ಚ ಸುದೀಪ್ ಅವರು ಮೈದಾನದ ಮಧ್ಯೆ ನಿಂತು ಕನ್ನಡದ ಹಳದಿ-ಕೆಂಪು ಬಾವುಟವನ್ನು ಹೆಮ್ಮೆಯಿಂದ ಬೀಸಿದರು. ಎಲ್ಲಿ ಕನ್ನಡದ ಬಾವುಟಕ್ಕೆ ಅವಮಾನವಾಗಿತ್ತೋ ಅದೇ ರಾಜ್ಯದ ಮೈದಾನದಲ್ಲಿ ಸಾವಿರಾರು ಜನರ ಸಮ್ಮುಖದಲ್ಲಿ ನಮ್ಮ ಬಾವುಟ ರಾರಾಜಿಸುವಂತೆ ಮಾಡಿದರು. ಇದು ಬರಿ ಗೆಲುವಿನ ಸಂಭ್ರಮವಾಗಿರಲಿಲ್ಲ ಬದಲಿಗೆ ಕನ್ನಡಿಗರ ಅಸ್ಮಿತೆಯ ವಿಚಾರದಲ್ಲಿ ತಾವೆಂದೂ ಹಿಂದೆ ಸರಿಯುವುದಿಲ್ಲ ಎಂಬ ಖಡಕ್ ಸಂದೇಶವಾಗಿತ್ತು.
ಕಿಚ್ಚನ ಈ ನಡೆಗೆ ನೆಟ್ಟಿಗರು ಫಿದಾ
ಸಾಮಾಜಿಕ ಜಾಲತಾಣಗಳಲ್ಲಿ ಸುದೀಪ್ ಅವರ ಈ ವಿಡಿಯೋ ಮತ್ತು ಫೋಟೋಗಳು ಕಾಳ್ಗಿಚ್ಚಿನಂತೆ ಹಬ್ಬಿವೆ. ಸುದೀಪ್ ಅವರ ಈ ದಿಟ್ಟ ನಡೆಯನ್ನು ನೋಡಿ ಅಭಿಮಾನಿಗಳು ಅಕ್ಷರಶಃ ಪುಳಕಿತರಾಗಿದ್ದಾರೆ. ಇದು ನಮ್ಮ ಕಿಚ್ಚ ಬಾಸ್ ಅಂದ್ರೆ, ಅಪಮಾನವಾದ ಜಾಗದಲ್ಲೇ ಅಸ್ಮಿತೆ ಪ್ರದರ್ಶಿಸಿದ ಅಪ್ಪಟ ಕನ್ನಡಿಗ ಎಂಬ ಕಾಮೆಂಟ್‌ಗಳು ಹರಿದುಬರುತ್ತಿವೆ.
ಸುದೀಪ್ ಅವರಿಗೆ ಭಾಷಾ ಅಭಿಮಾನ ಹೊಸತೇನಲ್ಲ. ಈ ಹಿಂದೆ ಹಿಂದಿ ರಾಷ್ಟ್ರಭಾಷೆ ವಿವಾದದ ಸಮಯದಲ್ಲೂ ಬಾಲಿವುಡ್ ದಿಗ್ಗಜರಿಗೆ ಕನ್ನಡದ ಶಕ್ತಿ ಏನೆಂಬುದನ್ನು ಖಡಕ್ ಆಗಿ ನೆನಪಿಸಿದ್ದರು. ಈಗ ತಮಿಳುನಾಡಿನಲ್ಲಿ ಅವರು ಮಾಡಿರುವ ಈ ಸಾಹಸದ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ‘ಕಾಳ್ಗಿಚ್ಚಿನಂತೆ’ ಹಬ್ಬುತ್ತಿವೆ.
ನೆಟ್ಟಿಗರ ಪ್ರತಿಕ್ರಿಯೆ:
“ಎಲ್ಲಿ ಅಪಮಾನವಾಗುತ್ತದೋ, ಅಲ್ಲಿಯೇ ಕನ್ನಡದ ಪತಾಕೆ ಹಾರಿಸಿದ ಕಿಚ್ಚ ಬಾಸ್ ಗೆ ಜೈ,” ಎಂದು ಅಭಿಮಾನಿಗಳು ಕಮೆಂಟ್ ಮಾಡುತ್ತಿದ್ದಾರೆ.
“ಇದು ಬರೀ ವಿಡಿಯೋ ಅಲ್ಲ, ಕನ್ನಡಿಗರ ಸ್ವಾಭಿಮಾನದ ಎಚ್ಚರಿಕೆ, ಎಂಬ ಮಾತುಗಳು ಕೇಳಿಬರುತ್ತಿವೆ.
