ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದ (KIA) ಟರ್ಮಿನಲ್ 1 ರಲ್ಲಿ ಪ್ರಯಾಣಿಕರಿಗಾಗಿ ಹೊಸ ‘ಪ್ರೀಮಿಯಂ ಪಿಕಪ್ ಝೋನ್’ ಅನ್ನು ಪರಿಚಯಿಸಲಾಗಿದೆ. ಆದರೆ, ಈ ಸೌಲಭ್ಯಕ್ಕಾಗಿ ನಿಗದಿಪಡಿಸಿರುವ ಅತಿ ಹೆಚ್ಚಿನ ಶುಲ್ಕ ಈಗ ಪ್ರಯಾಣಿಕರು ಮತ್ತು ಟ್ಯಾಕ್ಸಿ ಚಾಲಕರ ಕೆಂಗಣ್ಣಿಗೆ ಗುರಿಯಾಗಿದೆ.
ಏನಿದು ಹೊಸ ನಿಯಮ? ವಿಮಾನ ನಿಲ್ದಾಣದಿಂದ ಹೊರಬರುವ ಪ್ರಯಾಣಿಕರು ಲಗೇಜ್ಗಳೊಂದಿಗೆ ದೂರದ ಪಾರ್ಕಿಂಗ್ ವಲಯಕ್ಕೆ (P3 ಅಥವಾ P4) ನಡೆಯುವ ಬದಲು, ಅರೈವಲ್ ಗೇಟ್ನ ಐದನೇ ಲೇನ್ನಲ್ಲಿಯೇ ಕ್ಯಾಬ್ ಹತ್ತಲು ಈ ಪ್ರೀಮಿಯಂ ವಲಯ ಅವಕಾಶ ನೀಡುತ್ತದೆ.
- ಶುಲ್ಕ: ಇಲ್ಲಿ ಟ್ಯಾಕ್ಸಿ ನಿಲ್ಲಿಸಲು ಮೊದಲ 10 ನಿಮಿಷಕ್ಕೆ ₹275 ನಿಗದಿಪಡಿಸಲಾಗಿದೆ.
- ಹೆಚ್ಚುವರಿ ಶುಲ್ಕ: 10 ನಿಮಿಷ ಮೀರಿದರೆ ಪ್ರತಿ ಒಂದು ನಿಮಿಷಕ್ಕೆ ₹150 ದಂಡ ಪಾವತಿಸಬೇಕಾಗುತ್ತದೆ.
- ಉದಾಹರಣೆಗೆ, ಒಂದು ಕ್ಯಾಬ್ ಇಲ್ಲಿ 15 ನಿಮಿಷ ನಿಂತರೆ ಒಟ್ಟು ₹425 ಪಾವತಿಸಬೇಕಾಗುತ್ತದೆ.
ಕಟ್ಟುನಿಟ್ಟಿನ ಕ್ರಮ: ಈ ವಲಯದಲ್ಲಿ ಯಾವುದೇ ವಾಹನವು 15 ನಿಮಿಷಗಳಿಗಿಂತ ಹೆಚ್ಚು ಕಾಲ ಚಾಲಕನಿಲ್ಲದೆ ನಿಂತಿದ್ದರೆ ಅಥವಾ ಸಮಯ ಮೀರಿದರೆ, ಅಂತಹ ವಾಹನಗಳನ್ನು ಮಾಲೀಕರ ಖರ್ಚಿನಲ್ಲೇ ಹತ್ತಿರದ ಪೊಲೀಸ್ ಠಾಣೆಗೆ ಟೋಯಿಂಗ್ ಮಾಡಲಾಗುವುದು ಎಂದು ವಿಮಾನ ನಿಲ್ದಾಣದ ಅಧಿಕಾರಿಗಳು ಎಚ್ಚರಿಕೆ ಫಲಕ ಹಾಕಿದ್ದಾರೆ.
ಟ್ಯಾಕ್ಸಿ ಚಾಲಕರ ಮತ್ತು ಪ್ರಯಾಣಿಕರ ಆಕ್ರೋಶ: ಈ ಹೊಸ ನಿಯಮವು ಕ್ಯಾಬ್ ಚಾಲಕರ ಜೀವನೋಪಾಯದ ಮೇಲೆ ತೀವ್ರ ಪರಿಣಾಮ ಬೀರಿದೆ. “ಇಷ್ಟು ಹೆಚ್ಚಿನ ಹಣವನ್ನು ಯಾವ ಪ್ರಯಾಣಿಕರೂ ನೀಡಲು ಸಿದ್ಧರಿಲ್ಲ. ವಿಮಾನ ನಿಲ್ದಾಣದ ಅಧಿಕಾರಿಗಳು ನಮ್ಮ ಪರಿಸ್ಥಿತಿಯನ್ನು ಅರ್ಥಮಾಡಿಕೊಳ್ಳುತ್ತಿಲ್ಲ” ಎಂದು ಚಾಲಕರು ಅಳಲು ತೋಡಿಕೊಂಡಿದ್ದಾರೆ. ಇತ್ತ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಯಾಣಿಕರು ಕೂಡ ಈ ದುಬಾರಿ ಶುಲ್ಕದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಈ ನಿಯಮವನ್ನು ಹಿಂಪಡೆಯುವಂತೆ ಆಗ್ರಹಿಸಿ ಈಗಾಗಲೇ ಆನ್ಲೈನ್ ಅಭಿಯಾನ ಆರಂಭವಾಗಿದ್ದು, ಸಾವಿರಾರು ಜನರು ಸಹಿ ಹಾಕಿದ್ದಾರೆ.
ಬೆಂಗಳೂರು ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ ನಿಯಮಿತ (BIAL) ಮೊದಲು ಈ ಪ್ರಸ್ತಾವನೆಯನ್ನು ಹಿಂಪಡೆದಂತೆ ಮಾಡಿ, ಈಗ ಸದ್ದಿಲ್ಲದೆ ಜಾರಿಗೆ ತಂದಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಮುಖ್ಯ ಕಾರಣವಾಗಿದೆ. ಸದ್ಯ ಈ ನಿಯಮವನ್ನು 30 ದಿನಗಳ ಕಾಲ ಪ್ರಾಯೋಗಿಕವಾಗಿ ಗಮನಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
