ಅನಂತನಾಗ್: ಜಮ್ಮು ಮತ್ತು ಕಾಶ್ಮೀರದ ಅನಂತನಾಗ್ ಜಿಲ್ಲೆಯಲ್ಲಿ ಉತ್ಖನನದ ಸಮಯದಲ್ಲಿ ಹಲವಾರು ಶಿವಲಿಂಗಗಳು ಸೇರಿದಂತೆ ಪ್ರಾಚೀನ ಹಿಂದೂ ವಿಗ್ರಹಗಳು ಪತ್ತೆಯಾಗಿವೆ. ಜಿಲ್ಲಾ ಕೇಂದ್ರದಿಂದ ಸುಮಾರು 16 ಕಿ.ಮೀ ದೂರದಲ್ಲಿರುವ ಐಶ್ಮುಖಂನ ಸಲಿಯಾ ಪ್ರದೇಶದ ಕಾರ್ಕೂಟ್ ನಾಗ್‌ನಲ್ಲಿರುವ ಬುಗ್ಗೆಯಲ್ಲಿ ಲೋಕೋಪಯೋಗಿ ಇಲಾಖೆ(ಪಿಡಬ್ಲ್ಯೂಡಿ) ನವೀಕರಣ ಕಾರ್ಯವನ್ನು ಕೈಗೊಳ್ಳುತ್ತಿದ್ದಾಗ ಕಲಾಕೃತಿಗಳು ಕಂಡುಬಂದಿವೆ.
ಸ್ಥಳದಲ್ಲಿರುವ ಕೊಳದಿಂದ ಹಿಂದೂ ದೇವತೆಗಳ ಕೆತ್ತನೆಗಳನ್ನು ಹೊಂದಿರುವ ಬಹು ಕಲ್ಲಿನ ವಿಗ್ರಹಗಳನ್ನು ಹೊರತೆಗೆಯಲಾಗಿದೆ. ಪುನಃಸ್ಥಾಪನೆ ಯೋಜನೆಯಲ್ಲಿ ಕೆಲಸ ಮಾಡುತ್ತಿರುವ ಸ್ಥಳೀಯ ಕಾರ್ಮಿಕರು ಅಗೆಯುವಾಗ ಅವಶೇಷಗಳನ್ನು ಹೊರತೆಗೆಯಲಾಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಜಮ್ಮು ಮತ್ತು ಕಾಶ್ಮೀರ ಆರ್ಕೈವ್ಸ್, ಪುರಾತತ್ವ ಮತ್ತು ವಸ್ತು ಸಂಗ್ರಹಾಲಯ ಇಲಾಖೆಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿದರು. ವಿಗ್ರಹಗಳ ಕಾಲ ಐತಿಹಾಸಿಕ ಸಂದರ್ಭನ್ನು ನಿರ್ಧರಿಸಲು ಅವನ್ನು ಶ್ರೀನಗರದ ಎಸ್‌ಪಿಎಸ್ ವಸ್ತುಸಂಗ್ರಹಾಲಯಕ್ಕೆ ವಸ್ತು ವಿಶ್ಲೇಷಣೆ ಮತ್ತು ಕಾರ್ಬನ್ ಡೇಟಿಂಗ್‌ಗಾಗಿ ಸಾಗಿಸಲಾಗುತ್ತದೆ,
ಈ ಸ್ಥಳವು ಕಾಶ್ಮೀರಿ ಪಂಡಿತ ಸಮುದಾಯಕ್ಕೆ ಸೇರಿತ್ತು. ಹಿಂದೆ ಪ್ರಾಚೀನ ಕರ್ಕೂಟ ರಾಜವಂಶ ಆಡಳಿತವಿತ್ತು. ಈ ಸ್ಥಳದಲ್ಲಿ ಒಂದು ಕಾಲದಲ್ಲಿ ದೇವಾಲಯ ಅಸ್ತಿತ್ವದಲ್ಲಿರಬಹುದು ಅಥವಾ ಕಲಾಕೃತಿಗಳನ್ನು ಅಲ್ಲಿ ಸಂರಕ್ಷಿಸಿರಬಹುದು ಎಂದು ಸ್ಥಳೀಯ ಪಂಡಿತರೊಬ್ಬರು ಹೇಳಿದ್ದಾರೆ.
ವಿಗ್ರಹ ಕಂಡು ಬಂದ ಸ್ಥಳದಲ್ಲಿ ಹೊಸ ದೇವಾಲಯವನ್ನು ನಿರ್ಮಿಸಲು ಮತ್ತು ಶಿವಲಿಂಗಗಳನ್ನು ಮರುಸ್ಥಾಪಿಸಲು ನಾವು ಸರ್ಕಾರವನ್ನು ಒತ್ತಾಯಿಸುತ್ತೇವೆ ಎಂದು ಸ್ಥಳೀಯ ಕಾಶ್ಮೀರಿ ಪಂಡಿತರೊಬ್ಬರು ಹೇಳಿದ್ದಾರೆ.
