ಮುಂಬೈ: ರಿಲಯನ್ಸ್ ಇಂಡಸ್ಟ್ರೀಸ್ ಮುಖ್ಯಸ್ಥ ಮುಖೇಶ್ ಅಂಬಾನಿ ಪುತ್ರಿ ಇಶಾ ಅಂಬಾನಿ ತಮ್ಮ ವಿಭಿನ್ನ ಹಾಗೂ ಶ್ರೀಮಂತ ಫ್ಯಾಷನ್ ಆಯ್ಕೆಗಳಿಂದಲೇ ಸದಾ ಸುದ್ದಿಯಲ್ಲಿರುತ್ತಾರೆ. ಇದೀಗ ಇಶಾ ಅಂಬಾನಿ ಅವರ ಹೊಸ ಲುಕ್ ಸಾಮಾಜಿಕ ಜಾಲತಾಣಗಳಲ್ಲಿ ಹಾಗೂ ಫ್ಯಾಷನ್ ಲೋಕದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದೆ. ಜಾಗತಿಕ ಮಟ್ಟದ ಪ್ರಸಿದ್ಧ ಬ್ರ್ಯಾಂಡ್ ‘ಶನೆಲ್’ (Chanel) ನ ಅಪರೂಪದ ಹಳೆಯ ಕಲೆಕ್ಷನ್‌ನ ಚಿನ್ನದ ಬಣ್ಣದ ಪ್ಯಾಂಟ್‌ಸೂಟ್ ಧರಿಸಿ ಇಶಾ ಅಂಬಾನಿ ಜಗಮಗಿಸಿದ್ದಾರೆ.
ಇಶಾ ಅಂಬಾನಿ ಧರಿಸಿರುವ ಈ ವಿಶೇಷ ಉಡುಪು ಪ್ರಸಿದ್ಧ ಡಿಸೈನರ್ ಕಾರ್ಲ್ ಲಾಗರ್‌ಫೆಲ್ಡ್ ಅವರ 1996ರ ಶರತ್ಕಾಲ/ಚಳಿಗಾಲದ (Autumn/Winter 1996) ಹೌಟ್ ಕೌಚರ್ ಕಲೆಕ್ಷನ್‌ನದ್ದಾಗಿದೆ. ‘ಟ್ಯಾಬ್ ವಿಂಟೇಜ್’ನಿಂದ ಕ್ಯುರೇಟ್ ಮಾಡಲಾದ ಈ ಅಪರೂಪದ ‘ಲೆಸೇಜ್’ ಕ್ವಿಲ್ಟೆಡ್ ಪ್ಯಾಂಟ್‌ಸೂಟ್ ಮತ್ತು ಐಕಾನಿಕ್ ಗ್ರಿಪೊಯಿಕ್ಸ್ ಬೆಲ್ಟ್ ಒಳಗೊಂಡಿರುವ ಈ ಉಡುಪಿನ ಅಂದಾಜು ಬೆಲೆ ಬರೋಬ್ಬರಿ 31.5 ಲಕ್ಷ ರೂಪಾಯಿ ಎಂದು ವರದಿಯಾಗಿದೆ.
ಫ್ರೆಂಚ್ ಕರಕುಶಲತೆಯ ಭವ್ಯತೆ: ಈ ಔಟ್‌ಫಿಟ್‌ನ ಮೇಲಿರುವ ಅತ್ಯಂತ ನಿಖರವಾದ ಹಾಗೂ ಸೂಕ್ಷ್ಮವಾದ ಕಸೂತಿ ಕೆಲಸವನ್ನು ಫ್ರಾನ್ಸ್‌ನ ಪ್ರಸಿದ್ಧ ಕೌಚರ್ ಕರಕುಶಲ ಸಂಸ್ಥೆಯಾದ ‘ಮೈಸನ್ ಲೆಸೇಜ್’ ವಿನ್ಯಾಸಗೊಳಿಸಿದೆ. ಈ ಸೂಟ್‌ನ ವಿನ್ಯಾಸ, ಅದರ ಮೇಲಿರುವ ರತ್ನದ ಬಣ್ಣಗಳ ಅಲಂಕಾರ ಮತ್ತು ಬ್ರೊಕೇಡ್ ಫಿನಿಶಿಂಗ್ ನೋಡುಗರಿಗೆ ರಾಜಮನೆತನದ ಸಾಂಪ್ರದಾಯಿಕ ಉಡುಪನ್ನು ನೆನಪಿಸುವಂತಿದೆ.
ಮಾಡರ್ನ್ ಲುಕ್ ನೀಡಿದ ಸ್ಟೈಲಿಂಗ್: ಭಾರಿ ಮೌಲ್ಯದ ಈ ವಿಂಟೇಜ್ ಸೂಟ್‌ಗೆ ಇಶಾ ಅಂಬಾನಿ ಅವರು ಅತ್ಯಂತ ಸರಳ ಹಾಗೂ ಮಾಡರ್ನ್ ಆಗಿ ಸ್ಟೈಲಿಂಗ್ ಮಾಡಿಕೊಂಡಿದ್ದರು. ಯಾವುದೇ ಹೆವಿ ಜ್ಯುವೆಲ್ಲರಿ ಬಳಸದೆ, ಶನೆಲ್ ಬ್ರ್ಯಾಂಡ್‌ನದ್ದೇ ಕಪ್ಪು ಬಣ್ಣದ ಸ್ಯೂಡ್ ಮಿನಿ ಪೌಚ್ ಹಿಡಿದು ಕಾಂಟ್ರಾಸ್ಟ್ ಲುಕ್ ನೀಡಿದ್ದರು. ಇದರೊಂದಿಗೆ ಸಾಯಿಂಟ್ ಲಾರೆಂಟ್ (Saint Laurent) ಬ್ರ್ಯಾಂಡ್‌ನ ಸಣ್ಣ ಸನ್‌ಗ್ಲಾಸ್ ಹಾಗೂ ಮನೋಲೋ ಬ್ಲಾನಿಕ್ (Manolo Blahnik) ಸ್ಯಾಂಡಲ್ಸ್ ಧರಿಸಿ ಕಂಪ್ಲೀಟ್ ಸ್ಟೈಲಿಶ್ ಆಗಿ ಕಾಣಿಸಿಕೊಂಡಿದ್ದಾರೆ.
ಖ್ಯಾತ ಸ್ಟೈಲಿಸ್ಟ್ ಜೇಮಿ ಮಿಜ್ರಾಹಿ ಅವರು ಇಶಾ ಅಂಬಾನಿ ಅವರ ಈ ರಾಯಲ್ ಮತ್ತು ಮಾಡರ್ನ್ ಲುಕ್ ಅನ್ನು ವಿನ್ಯಾಸಗೊಳಿಸಿದ್ದಾರೆ. ಪ್ರಸ್ತುತ ಫ್ಯಾಷನ್ ಜಗತ್ತಿನಲ್ಲಿ ಸಿಂಪ್ಲಿಸಿಟಿ ಅಥವಾ ಕ್ವಯಟ್ ಲಕ್ಸುರಿ ಬಗ್ಗೆ ಚರ್ಚೆ ನಡೆಯುತ್ತಿರುವಾಗ, ಇಶಾ ಅಂಬಾನಿ ಮಾತ್ರ ಇತಿಹಾಸ ಮತ್ತು ಅದ್ಭುತ ಕರಕುಶಲತೆಯುಳ್ಳ ಈ ಉಡುಪಿನ ಮೂಲಕ ‘ಥಾಟ್‌ಫುಲ್ ಮ್ಯಾಕ್ಸಿಮಲಿಸಂ’ಗೆ ಹೊಸ ಮರುಜೀವ ನೀಡಿದ್ದಾರೆ. ಇಶಾ ಅವರ ಈ ಲುಕ್ ಮಾಡರ್ನ್ ಮಹಾರಾಣಿಯಂತೆ ಕಂಗೊಳಿಸುತ್ತಿದೆ ಎಂದು ಫ್ಯಾಷನ್ ಪ್ರಿಯರು ಕೊಂಡಾಡುತ್ತಿದ್ದಾರೆ.
