ಬೆಂಗಳೂರು: ಈಶಾನ್ಯ ಭಾರತದ ವಿಶಿಷ್ಟ ಹಾಗೂ ರುಚಿಕರವಾದ ಕೃಷಿ ಉತ್ಪನ್ನಗಳು ಇದೀಗ ದಕ್ಷಿಣ ಮತ್ತು ಪಶ್ಚಿಮ ಭಾರತದ ಗ್ರಾಹಕರಿಗೂ ಸುಲಭವಾಗಿ ಲಭ್ಯವಾಗಲಿವೆ. ಪ್ರಮುಖ ಕ್ವಿಕ್ ಕಾಮರ್ಸ್ ವೇದಿಕೆಯಾದ ಇನ್ಸ್ಟಾಮಾರ್ಟ್, ಈಶಾನ್ಯ ರಾಜ್ಯಗಳ ರೈತರು ಬೆಳೆಯುವ ಅಪರೂಪದ ಹಣ್ಣು ಮತ್ತು ತರಕಾರಿಗಳನ್ನು ದೇಶದ ವಿವಿಧ ಭಾಗಗಳಿಗೆ ತಲುಪಿಸುವ ಮಹತ್ವದ ಹೆಜ್ಜೆ ಇಟ್ಟಿದೆ.
ಬೆಂಗಳೂರಿಗೆ ತಲುಪಿದ ಮೇಘಾಲಯದ ಅನಾನಸ್
ಈ ಯೋಜನೆಯ ಮೊದಲ ಹಂತದಲ್ಲಿ ಮೇಘಾಲಯದ ಪ್ರೀಮಿಯಂ ಗುಣಮಟ್ಟದ ಅನಾನಸ್ಗಳನ್ನು ವಿಮಾನದ ಮೂಲಕ ಬೆಂಗಳೂರಿಗೆ ತರಲಾಗುತ್ತಿದೆ. ಜಿರಾಂಗ್ ಆರ್ಗ್ಯಾನಿಕ್ ಆಗ್ರೋ ಫಾರ್ಮರ್ ಪ್ರೊಡ್ಯೂಸರ್ ಕಂಪನಿ (FPO) ಮೂಲಕ ರೈತರಿಂದ ನೇರವಾಗಿ ಈ ಅನಾನಸ್ಗಳನ್ನು ಖರೀದಿಸಿ ಗ್ರಾಹಕರಿಗೆ ಪೂರೈಸಲಾಗುತ್ತಿದೆ.
ಇದುವರೆಗೆ ಮೇಘಾಲಯದ ಹಲವು ರೈತರು ಸ್ಥಳೀಯ ಮಾರುಕಟ್ಟೆ ಅಥವಾ ದೆಹಲಿಯ ಸಗಟು ಮಾರುಕಟ್ಟೆಯನ್ನೇ ಹೆಚ್ಚಾಗಿ ಅವಲಂಬಿಸಿದ್ದರು. ಇದೀಗ ಬೆಂಗಳೂರಿನಂತಹ ದೊಡ್ಡ ನಗರಗಳಿಗೂ ನೇರ ಮಾರುಕಟ್ಟೆ ದೊರೆಯುತ್ತಿರುವುದು ರೈತರಿಗೆ ಹೊಸ ಅವಕಾಶವನ್ನು ಸೃಷ್ಟಿಸಿದೆ.
ಈಶಾನ್ಯ ಭಾರತದ ಕೃಷಿ ಉತ್ಪನ್ನಗಳಿಗೆ ಹೊಸ ಮಾರುಕಟ್ಟೆ ಕಲ್ಪಿಸುವ ಇನ್ಸ್ಟಾಮಾರ್ಟ್ನ ಪ್ರಯತ್ನಕ್ಕೆ ಮೇಘಾಲಯದ ಮುಖ್ಯಮಂತ್ರಿ ಕೊನ್ರಾಡ್ ಕೆ. ಸಂಗ್ಮಾ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ರೈತರಿಗೆ ಉತ್ತಮ ಮಾರುಕಟ್ಟೆ ಸಂಪರ್ಕ ಕಲ್ಪಿಸುವುದರ ಜೊತೆಗೆ ಮೇಘಾಲಯದ ಕೃಷಿ ಉತ್ಪನ್ನಗಳನ್ನು ದೇಶದಾದ್ಯಂತ ಪರಿಚಯಿಸಲು ಈ ಯೋಜನೆ ಸಹಕಾರಿಯಾಗಲಿದೆ ಎಂದು ಅವರು ಹೇಳಿದ್ದಾರೆ.
ಮುಂದಿನ ದಿನಗಳಲ್ಲಿ ಮತ್ತಷ್ಟು ವಿಶೇಷ ಉತ್ಪನ್ನಗಳು
ಅನಾನಸ್ಗೆ ಸೀಮಿತವಾಗದೆ ಮುಂದಿನ 12ರಿಂದ 24 ತಿಂಗಳಲ್ಲಿ ಈಶಾನ್ಯ ಭಾರತದ ಹಲವು ವಿಶಿಷ್ಟ ಹಾಗೂ ಭೌಗೋಳಿಕ ಸೂಚ್ಯಂಕ (GI) ಮಾನ್ಯತೆ ಪಡೆದ ಉತ್ಪನ್ನಗಳನ್ನು ದೇಶದ ವಿವಿಧ ನಗರಗಳಿಗೆ ತಲುಪಿಸುವ ಗುರಿಯನ್ನು ಇನ್ಸ್ಟಾಮಾರ್ಟ್ ಹೊಂದಿದೆ.
ಮೇಘಾಲಯದ ಖಾಸಿ ಮ್ಯಾಂಡರಿನ್ ಕಿತ್ತಳೆ, ಅಸ್ಸಾಂನ ಕರ್ಬಿ ಆಂಗ್ಲಾಂಗ್ ಶುಂಠಿ, ತೇಜ್ಪುರ ಲಿಚಿ, ಮಣಿಪುರದ ಕಚಾಯ್ ನಿಂಬೆ ಸೇರಿದಂತೆ ಕಿವಿ ಹಣ್ಣು ಮತ್ತು ಬೆಳ್ಳುಳ್ಳಿಯಂತಹ ಉತ್ಪನ್ನಗಳನ್ನೂ ರೈತರಿಂದ ನೇರವಾಗಿ ಖರೀದಿಸಿ ಪೂರೈಸುವ ಯೋಜನೆ ಇದೆ.
ರೈತರಿಗೆ ಸಿಗಲಿದೆ ಪ್ರೀಮಿಯಂ ಮಾರುಕಟ್ಟೆ
ಇನ್ಸ್ಟಾಮಾರ್ಟ್ನ ಚೀಫ್ ಬಿಸಿನೆಸ್ ಆಫೀಸರ್ ಗೌತಮ್ ಸ್ವರೂಪ್ ಮಾತನಾಡಿ, ಈಶಾನ್ಯ ಭಾರತವು ಉತ್ತಮ ಗುಣಮಟ್ಟದ ಹಣ್ಣು ಮತ್ತು ತರಕಾರಿಗಳಿಗೆ ಹೆಸರುವಾಸಿಯಾಗಿದೆ. ಆದರೆ ಹಲವು ಉತ್ಪನ್ನಗಳು ಇದುವರೆಗೆ ಸ್ಥಳೀಯ ಮಾರುಕಟ್ಟೆಗಳಿಗೆ ಮಾತ್ರ ಸೀಮಿತವಾಗಿದ್ದವು. ಇದೀಗ ತನ್ನ ವಿತರಣಾ ಜಾಲದ ಮೂಲಕ ರೈತರಿಗೆ ದೇಶದ ದೊಡ್ಡ ನಗರಗಳಲ್ಲಿ ಹೊಸ ಮಾರುಕಟ್ಟೆ ಒದಗಿಸುವ ಪ್ರಯತ್ನ ಮಾಡಲಾಗುತ್ತಿದೆ ಎಂದು ತಿಳಿಸಿದ್ದಾರೆ.
ಜಿರಾಂಗ್ ಎಫ್ಪಿಒ ಸಿಇಒ ಇಬಾ ತಂಗ್ಖೀವ್ ಕೂಡ ಈ ಯೋಜನೆಯಿಂದ ಗ್ರಾಮೀಣ ಭಾಗದ ರೈತರಿಗೆ ಪ್ರೀಮಿಯಂ ಮಾರುಕಟ್ಟೆಯ ಸಂಪರ್ಕ ದೊರೆಯಲಿದೆ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ. ತಮ್ಮ ಉತ್ಪನ್ನಗಳಿಗೆ ಉತ್ತಮ ಬೆಲೆ ಸಿಗುವುದರಿಂದ ರೈತರಲ್ಲಿ ಹೊಸ ಆತ್ಮವಿಶ್ವಾಸ ಮೂಡಿದೆ ಎಂದಿದ್ದಾರೆ.
10 ಸಾವಿರಕ್ಕೂ ಹೆಚ್ಚು ರೈತರಿಂದ ನೇರ ಖರೀದಿ
ಇನ್ಸ್ಟಾಮಾರ್ಟ್ ಈಗಾಗಲೇ ದೇಶಾದ್ಯಂತ 430ಕ್ಕೂ ಹೆಚ್ಚು ರೈತ ಉತ್ಪಾದಕ ಸಂಸ್ಥೆಗಳೊಂದಿಗೆ (FPO) ಕೈಜೋಡಿಸಿದೆ. 10,000ಕ್ಕೂ ಹೆಚ್ಚು ರೈತರಿಂದ ನೇರವಾಗಿ ತಾಜಾ ಹಣ್ಣು ಮತ್ತು ತರಕಾರಿಗಳನ್ನು ಖರೀದಿಸುತ್ತಿದೆ.
ಈಶಾನ್ಯ ರಾಜ್ಯಗಳ ವಿಶಿಷ್ಟ ಬೆಳೆಗಳನ್ನೂ ಇದೇ ಮಾದರಿಯಲ್ಲಿ ದೇಶದ ವಿವಿಧ ಮಾರುಕಟ್ಟೆಗಳಿಗೆ ತಲುಪಿಸುವುದರಿಂದ ಮಧ್ಯವರ್ತಿಗಳ ಅವಲಂಬನೆ ಕಡಿಮೆಯಾಗುವ ನಿರೀಕ್ಷೆಯಿದೆ. ಇದರ ಮೂಲಕ ರೈತರಿಗೆ ಉತ್ತಮ ಮಾರುಕಟ್ಟೆ ಮತ್ತು ಉತ್ಪನ್ನಗಳಿಗೆ ಸೂಕ್ತ ಬೆಲೆ ದೊರೆಯುವ ಅವಕಾಶ ಹೆಚ್ಚಾಗಲಿದೆ.
