ಸೋಷಿಯಲ್ ಮೀಡಿಯಾದಲ್ಲಿ ಹೊಸ ಹೊಸ ಫೋಟೋ ಟ್ರೆಂಡ್‌ಗಳು ವೈರಲ್ ಆಗುತ್ತಲೇ ಇರುತ್ತವೆ. ಇದೀಗ 1980ರ ದಶಕದ ರೆಟ್ರೋ ಲುಕ್‌ನ ಫೋಟೋಗಳು Instagramನಲ್ಲಿ ಸಖತ್ ಟ್ರೆಂಡ್ ಆಗಿವೆ. ಬಳಕೆದಾರರು ತಮ್ಮ ಈಗಿನ ಫೋಟೋಗಳನ್ನು ChatGPTಗೆ ಅಪ್‌ಲೋಡ್ ಮಾಡಿ, 80ರ ದಶಕದಲ್ಲಿ ತಾವು ಹೇಗೆ ಕಾಣಿಸುತ್ತಿದ್ದರು ಎಂಬುದನ್ನು ಫೋಟೋ ಮೂಲಕ ನೋಡುತ್ತಿದ್ದಾರೆ.
ಸಾಮಾನ್ಯ ವಿಂಟೇಜ್ ಫಿಲ್ಟರ್‌ಗಿಂತ ಈ ಟ್ರೆಂಡ್ ಸ್ವಲ್ಪ ವಿಭಿನ್ನವಾಗಿದೆ. ಫೋಟೋದಲ್ಲಿರುವ ಬಟ್ಟೆ, ಕೇಶವಿನ್ಯಾಸ, ಹಿನ್ನೆಲೆ, ಬೆಳಕು ಮತ್ತು ಒಟ್ಟಾರೆ ಫೋಟೋದ ಲುಕ್ ಅನ್ನೇ 1980ರ ದಶಕಕ್ಕೆ ತಕ್ಕಂತೆ ಬದಲಾಯಿಸಬಹುದು. ಹೀಗಾಗಿ ಹಳೆಯ ಕಾಲದ ಫ್ಯಾಮಿಲಿ ಆಲ್ಬಮ್ ಅಥವಾ ಸಿನಿಮಾ ಫೋಟೋ ನೋಡಿದ ಅನುಭವ ಸಿಗುತ್ತದೆ.
ಅನುಶ್ರೀ, ವಿರಾಟ್ ಕೊಹ್ಲಿ ಸೇರಿ ಹಲವರ ರೆಟ್ರೋ ಫೋಟೋ ವೈರಲ್
ಈ ಟ್ರೆಂಡ್‌ಗೆ ಸಾಮಾನ್ಯ Instagram ಬಳಕೆದಾರರು ಮಾತ್ರವಲ್ಲ, ಸೆಲೆಬ್ರಿಟಿಗಳೂ ಕೈಜೋಡಿಸಿದ್ದಾರೆ. ನಿರೂಪಕಿ ಅನುಶ್ರೀ, ಗಾಯಕ ಗಣೇಶ್ ಕಾರಂತ್, ವಿರಾಟ್ ಕೊಹ್ಲಿ ಸೇರಿದಂತೆ ಹಲವು ಕ್ರಿಕೆಟ್‌ ತಾರೆಯರ ರೆಟ್ರೋ ಶೈಲಿಯ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿವೆ.
ಅನುಶ್ರೀ ಅವರು ಪುನೀತ್ ರಾಜ್‌ಕುಮಾರ್ ಅವರ ಜೊತೆಗಿನ ಫೋಟೋವೊಂದನ್ನು ಹಂಚಿಕೊಂಡು, ತಾವು ಅಪ್ಪು ಸರ್ ಅವರ ಅಭಿಮಾನಿಯಾಗಿದ್ದ ಕ್ಷಣಗಳನ್ನು ನೆನಪಿಸಿಕೊಂಡಿದ್ದಾರೆ. ಮತ್ತೊಂದು ಫೋಟೋದಲ್ಲಿ MTR ದೋಸೆಗಾಗಿ ಕಾರಿನಲ್ಲಿ ಹೋಗುತ್ತಿರುವಂತೆ ಹಾಗೂ ಇನ್ನೊಂದರಲ್ಲಿ ಸಿನಿಮಾ ಟಿಕೆಟ್‌ಗಾಗಿ ಥಿಯೇಟರ್‌ ಹೊರಗೆ ಕಾಯುತ್ತಿರುವಂತೆ ಹಳೆಯ ಕಾಲದ ನೆನಪುಗಳನ್ನು ಕಟ್ಟಿಕೊಟ್ಟಿದ್ದಾರೆ.
https://www.instagram.com/p/DdA3HDNj-dA/?utm_source=ig_web_copy_link&stkn=NTc4MTIwNjQ2YQ==
ವಿಂಟೇಜ್ ಫಿಲ್ಟರ್‌ಗಿಂತ ಈ ಟ್ರೆಂಡ್ ಹೇಗೆ ಭಿನ್ನ?
ಸಾಮಾನ್ಯ ವಿಂಟೇಜ್ ಫಿಲ್ಟರ್‌ಗಳು ಫೋಟೋದ ಬಣ್ಣ ಮತ್ತು ಬೆಳಕಿನಲ್ಲಿ ಮಾತ್ರ ಬದಲಾವಣೆ ಮಾಡುತ್ತವೆ. ಆದರೆ ChatGPTನಲ್ಲಿ ಫೋಟೋವನ್ನು ಮರುಸೃಷ್ಟಿಸುವಾಗ ಉಡುಗೆ, ಕೂದಲು, ಹಿನ್ನೆಲೆ, ಬೆಳಕು ಮತ್ತು ಕ್ಯಾಮೆರಾ ಲುಕ್‌ನಲ್ಲೂ ಬದಲಾವಣೆ ಮಾಡಬಹುದು.
ಮಹಿಳೆಯರಿಗೆ 80ರ ದಶಕದ ಸೀರೆ, ದೊಡ್ಡ ಕಿವಿಯೋಲೆಗಳು ಮತ್ತು ಆ ಕಾಲದ ಕೇಶವಿನ್ಯಾಸ ನೀಡಬಹುದು. ಪುರುಷರಿಗೆ ಲೂಸ್ ಶರ್ಟ್, ಹೈ-ವೇಸ್ಟ್ ಪ್ಯಾಂಟ್, ಮೀಸೆ ಹಾಗೂ ಆ ಕಾಲಕ್ಕೆ ಹೊಂದುವ ಹೇರ್‌ಸ್ಟೈಲ್‌ ಬಳಸಬಹುದು.
ಇಷ್ಟೇ ಅಲ್ಲದೆ, ಹಳೆಯ ಬಾಲಿವುಡ್ ಸಿನಿಮಾ ಸ್ಟಿಲ್, ಕುಟುಂಬದ ಆಲ್ಬಮ್, ಸ್ಟುಡಿಯೋ ಪೋರ್ಟ್ರೇಟ್ ಅಥವಾ 1980ರ ದಶಕದ ನಿಯತಕಾಲಿಕೆ ಮುಖಪುಟದ ರೀತಿಯಲ್ಲೂ ಫೋಟೋವನ್ನು ಸಿದ್ಧಪಡಿಸಬಹುದು.
ChatGPTನಲ್ಲಿ 80ರ ದಶಕದ ಫೋಟೋ ಮಾಡುವುದು ಹೇಗೆ?
ಹಂತ 1: ಮೊದಲು ಮುಖ ಸ್ಪಷ್ಟವಾಗಿ ಕಾಣುವ ನಿಮ್ಮ ಫೋಟೋವನ್ನು ChatGPTಗೆ ಅಪ್‌ಲೋಡ್ ಮಾಡಿ.
ಹಂತ 2: ಫೋಟೋವನ್ನು 1980ರ ದಶಕದ ಶೈಲಿಯಲ್ಲಿ ಬದಲಾಯಿಸುವಂತೆ ಪ್ರಾಂಪ್ಟ್ ನೀಡಿ.
ಹಂತ 3: ನಿಮಗೆ ಬೇಕಾದ ಬಟ್ಟೆ, ಕೇಶವಿನ್ಯಾಸ, ಹಿನ್ನೆಲೆ, ಬೆಳಕು ಮತ್ತು ಫೋಟೋದ ಲುಕ್ ಬಗ್ಗೆ ಸ್ಪಷ್ಟವಾಗಿ ತಿಳಿಸಿ.
ಹಂತ 4: ಮೊದಲ ಪ್ರಯತ್ನದಲ್ಲಿ ನಿರೀಕ್ಷಿಸಿದ ರೀತಿಯಲ್ಲಿ ಫೋಟೋ ಬರದಿದ್ದರೆ, ಅದೇ ಚಾಟ್‌ನಲ್ಲಿ ಬೇಕಾದ ಬದಲಾವಣೆಗಳನ್ನು ತಿಳಿಸಿ.
ಹಂತ 5: ಫೋಟೋ ಸಿದ್ಧವಾದ ನಂತರ ಅದನ್ನು Instagram Storyಯಲ್ಲಿ ಹಂಚಿಕೊಂಡು ನಿಮ್ಮ ಸ್ನೇಹಿತರನ್ನೂ ಈ ಟ್ರೆಂಡ್‌ಗೆ ಸೇರಿಸಬಹುದು.
ಬಳಸಬಹುದಾದ 80ರ ದಶಕದ ಕೆಲವು ಪ್ರಾಂಪ್ಟ್‌ಗಳು
1. 1980ರ ದಶಕದ ಭಾರತೀಯ ಮದುವೆ ಫೋಟೋ
ನಿಮ್ಮ ಫೋಟೋವನ್ನು 1980ರ ದಶಕದ ಭಾರತೀಯ ಮದುವೆಯ ಫೋಟೋದಂತೆ ಮಾಡಿಸಬಹುದು. ಆ ಕಾಲದ ಮದುವೆ ಉಡುಪು, ಆಭರಣ, ಕೇಶವಿನ್ಯಾಸ ಮತ್ತು ಹಳೆಯ ಅನಾಲಾಗ್ ಕ್ಯಾಮೆರಾದ ಫಿಲ್ಮ್ ಗ್ರೇನ್ ಇರುವಂತೆ ಕೇಳಬಹುದು.
2. ರೆಟ್ರೋ ಬೀದಿ ಫೋಟೋ
“ಈ ಫೋಟೋವನ್ನು 1987ರ ಭಾರತದ ಬೀದಿಯಲ್ಲಿ ತೆಗೆದಂತೆ ಬದಲಾಯಿಸಿ. ನನ್ನ ಮುಖದ ಗುರುತು ಬದಲಾಗಬಾರದು. ಹಿನ್ನೆಲೆಯಲ್ಲಿ 80ರ ದಶಕದ ವಾಹನಗಳು, ಹಳೆಯ ಅಂಗಡಿ ಬೋರ್ಡ್‌ಗಳು ಮತ್ತು ನೈಸರ್ಗಿಕ ಬೆಳಕು ಇರಲಿ. ಫೋಟೋ ಹಳೆಯ ಕ್ಯಾಮೆರಾದಲ್ಲಿ ತೆಗೆದಂತೆ ಕಾಣಬೇಕು” ಎಂದು ಪ್ರಾಂಪ್ಟ್ ನೀಡಬಹುದು.
3. ಹಳೆಯ ಕುಟುಂಬದ ಆಲ್ಬಮ್ ಫೋಟೋ
“ಈ ಫೋಟೋವನ್ನು 1980ರ ದಶಕದ ಭಾರತೀಯ ಕುಟುಂಬದ ಆಲ್ಬಮ್ ಫೋಟೋದಂತೆ ಬದಲಾಯಿಸಿ. ನೈಸರ್ಗಿಕ ಮುಖಭಾವ, ಸರಳ ಒಳಾಂಗಣ, ಮೃದುವಾದ ಬೆಳಕು ಮತ್ತು ಹಳೆಯ ಕ್ಯಾಮೆರಾದ ಫಿನಿಶಿಂಗ್ ಇರಲಿ. ಆಧುನಿಕ ಡಿಜಿಟಲ್ ಲುಕ್ ಬೇಡ” ಎಂದು ಕೇಳಬಹುದು.
4. 80ರ ದಶಕದ ಬಾಲಿವುಡ್ ಲುಕ್
ಮಹಿಳೆಯರು ವರ್ಣರಂಜಿತ ಸೀರೆ, ದೊಡ್ಡ ಕೇಶವಿನ್ಯಾಸ ಮತ್ತು ಸ್ಟೇಟ್‌ಮೆಂಟ್ ಆಭರಣಗಳಿರುವ 80ರ ದಶಕದ ಬಾಲಿವುಡ್ ನಾಯಕಿಯ ಲುಕ್ ಕೇಳಬಹುದು.
ಪುರುಷರಿಗೆ ಆ ಕಾಲದ ಶರ್ಟ್, ಹೈ-ವೇಸ್ಟ್ ಪ್ಯಾಂಟ್, ಮೀಸೆ ಮತ್ತು ಕ್ಲಾಸಿಕ್ ಹೇರ್‌ಸ್ಟೈಲ್‌ ಸೇರಿಸಿ 80ರ ದಶಕದ ಬಾಲಿವುಡ್ ನಾಯಕನಂತೆ ಫೋಟೋ ಮರುಸೃಷ್ಟಿಸುವಂತೆ ಕೇಳಬಹುದು.
5. 1980ರ ದಶಕದ ನಿಯತಕಾಲಿಕೆ ಮುಖಪುಟ
ನಿಮ್ಮ ಫೋಟೋವನ್ನು 1980ರ ದಶಕದ ಭಾರತೀಯ ನಿಯತಕಾಲಿಕೆಯ ಮುಖಪುಟದ ಭಾವಚಿತ್ರದಂತೆ ಮಾಡಿಸಬಹುದು. ಆ ಕಾಲಕ್ಕೆ ಹೊಂದುವ ಕೇಶವಿನ್ಯಾಸ, ಬಟ್ಟೆ, ಆಭರಣ ಮತ್ತು ಮೇಕಪ್ ಜೊತೆಗೆ ಸರಳ ಸ್ಟುಡಿಯೋ ಹಿನ್ನೆಲೆ ಹಾಗೂ ಹಳೆಯ ಕ್ಯಾಮೆರಾ ಫಿನಿಶಿಂಗ್ ಇರಲಿ ಎಂದು ಪ್ರಾಂಪ್ಟ್ ನೀಡಬಹುದು.
ಫೋಟೋ ಮಾಡಿಸುವಾಗ ಗಮನದಲ್ಲಿರಲಿ
AI ಮೂಲಕ ಫೋಟೋ ಬದಲಾಯಿಸುವಾಗ ಕೆಲವೊಮ್ಮೆ ಮುಖದ ಸಣ್ಣ ವಿವರಗಳು, ಬೆರಳುಗಳು, ಆಭರಣಗಳು ಅಥವಾ ಬಟ್ಟೆಯ ವಿನ್ಯಾಸದಲ್ಲಿ ಬದಲಾವಣೆಗಳು ಕಾಣಿಸಿಕೊಳ್ಳಬಹುದು. ಆದ್ದರಿಂದ ಫೋಟೋ ಸಿದ್ಧವಾದ ಬಳಿಕ ಒಮ್ಮೆ ಪರಿಶೀಲಿಸುವುದು ಉತ್ತಮ.
ಇನ್ನು ಇಂತಹ ಚಿತ್ರಗಳು 1980ರ ದಶಕದ ನಿಜವಾದ ದಾಖಲೆಗಳಲ್ಲ. ಇವು AI ಮೂಲಕ ಸೃಷ್ಟಿಸಲಾದ ಸೃಜನಶೀಲ ಚಿತ್ರಗಳು ಎಂಬುದನ್ನು ಗಮನದಲ್ಲಿಟ್ಟುಕೊಳ್ಳಬೇಕು.
ಅದೇ ರೀತಿ, ಖಾಸಗಿ ದಾಖಲೆಗಳು ಅಥವಾ ಬೇರೆಯವರ ಫೋಟೋಗಳನ್ನು ಅವರ ಅನುಮತಿಯಿಲ್ಲದೆ AI ಟೂಲ್‌ಗಳಿಗೆ ಅಪ್‌ಲೋಡ್ ಮಾಡದಿರುವುದು ಉತ್ತಮ.
