ಬೆಂಗಳೂರು: ಅಮೆರಿಕಾದಲ್ಲಿ ಓದಿ ಅಲ್ಲಿಯೇ ನೆಲೆಸಬೇಕು ಎಂಬ ನೂರಾರು ಭಾರತೀಯರ ಕನಸಿಗೆ ಈಗ ಅಮೆರಿಕಾ ಫಸ್ಟ್ ನೀತಿ ಅಡ್ಡಿಯಾಗುತ್ತಿದೆ. ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಎರಡನೇ ಬಾರಿಗೆ ಅಧಿಕಾರಕ್ಕೆ ಬಂದ ನಂತರ ಜಾರಿಗೊಳಿಸುತ್ತಿರುವ ಕಠಿಣ ವಲಸೆ ನೀತಿಗಳಿಂದಾಗಿ, ಅಮೆರಿಕಾದ ವಿಶ್ವವಿದ್ಯಾಲಯಗಳಲ್ಲಿ ಭಾರತೀಯ ವಿದ್ಯಾರ್ಥಿಗಳ ದಾಖಲಾತಿ ದಾಖಲೆ ಮಟ್ಟದಲ್ಲಿ ಕುಸಿದಿದೆ.
45% ಕುಸಿತ: 2025ರ ಆಗಸ್ಟ್ ವೇಳೆಗೆ ಅಮೆರಿಕಾದ ವಿವಿಗಳಲ್ಲಿ ಭಾರತೀಯರ ದಾಖಲಾತಿ ಪ್ರಮಾಣದಲ್ಲಿ ಬರೋಬ್ಬರಿ ಶೇ. 45ರಷ್ಟು ತೀವ್ರ ಇಳಿಕೆಯಾಗಿದೆ.
ವೀಸಾ ಸಂಕಷ್ಟ: ವೀಸಾ ವಿಳಂಬ, ನಿರಾಕರಣೆ ಮತ್ತು ಕಠಿಣ ನಿಯಮಗಳಿಂದಾಗಿ ಶೇ. 90ರಷ್ಟು ಪದವಿ ಕೋರ್ಸ್‌ಗಳಲ್ಲಿ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆ ಕ್ಷೀಣಿಸಿದೆ.
ಬದಲಾದ ಟ್ರೆಂಡ್: ಭಾರತೀಯರು ಈಗ ಸಾಂಪ್ರದಾಯಿಕ ತಾಣಗಳಾದ ಅಮೆರಿಕಾ, ಕೆನಡಾ ಮತ್ತು ಆಸ್ಟ್ರೇಲಿಯಾವನ್ನು ಬಿಟ್ಟು ಪಶ್ಚಿಮ ಯುರೋಪ್ ಹಾಗೂ ಏಷ್ಯಾದ ದೇಶಗಳತ್ತ ಮುಖ ಮಾಡುತ್ತಿದ್ದಾರೆ.
ದಾಖಲಾತಿ ಇಳಿಕೆಗೆ ಟಾಪ್ 3 ಕಾರಣಗಳು:
ಟ್ರಂಪ್ ಅವರ ಕಠಿಣ ನೀತಿ: ಅಮೆರಿಕಾ ಫಸ್ಟ್ ಎನ್ನುವ ಮಂತ್ರ ಜಪಿಸುತ್ತಿರುವ ಟ್ರಂಪ್ ಸರ್ಕಾರ, ವಲಸಿಗರ ವಿರುದ್ಧ ಕಠಿಣ ನಿಲುವು ತಳೆದಿರುವುದು ವಿದ್ಯಾರ್ಥಿಗಳಲ್ಲಿ ಆತಂಕ ಮೂಡಿಸಿದೆ.
ವೀಸಾ ಅನಿಶ್ಚಿತತೆ: ವೀಸಾ ಸಂದರ್ಶನದ ಸ್ಲಾಟ್‌ಗಳ ಕೊರತೆ ಮತ್ತು ಪದವಿ ಮುಗಿದ ನಂತರ ಅಲ್ಲಿಯೇ ಕೆಲಸ ಮಾಡಲು ಇರುವ ಕಾನೂನು ಅಡೆತಡೆಗಳು ದೊಡ್ಡ ತಲೆನೋವಾಗಿ ಪರಿಣಮಿಸಿವೆ.
ಹೆಚ್ಚುತ್ತಿರುವ ವೆಚ್ಚ: ಡಾಲರ್ ಎದುರು ರೂಪಾಯಿ ಮೌಲ್ಯದ ಕುಸಿತ ಮತ್ತು ಅಮೆರಿಕಾದ ದುಬಾರಿ ಜೀವನಶೈಲಿ ಮಧ್ಯಮ ವರ್ಗದ ವಿದ್ಯಾರ್ಥಿಗಳ ಪಾಲಿಗೆ ಮರೀಚಿಕೆಯಾಗುತ್ತಿದೆ.
ಭಾರತ ಈಗ ಅಂತರಾಷ್ಟ್ರೀಯ ಫೇವರೆಟ್
ಒಂದೆಡೆ ಅಮೆರಿಕಾದಲ್ಲಿ ಭಾರತೀಯರ ಸಂಖ್ಯೆ ಕಡಿಮೆಯಾಗುತ್ತಿದ್ದರೆ, ಮತ್ತೊಂದೆಡೆ ಭಾರತದ ಬಿಸಿನೆಸ್ ಸ್ಕೂಲ್‌ಗಳಿಗೆ ವಿದೇಶಿ ವಿದ್ಯಾರ್ಥಿಗಳ ಅರ್ಜಿ ಪ್ರಮಾಣದಲ್ಲಿ ಶೇ. 25ರಷ್ಟು ಏರಿಕೆಯಾಗಿದೆ GMAC ಬಿಡುಗಡೆ ಮಾಡಿದ ಶ್ವೇತಪತ್ರದ ಪ್ರಕಾರ, ಭಾರತವು ಈಗ ಜಾಗತಿಕ ಶಿಕ್ಷಣದ ಹೊಸ ಕೇಂದ್ರವಾಗಿ ಹೊರಹೊಮ್ಮುತ್ತಿದೆ. ಅಮೆರಿಕಾದಿಂದಲೂ ವಿದ್ಯಾರ್ಥಿಗಳು ಭಾರತೀಯ ಮ್ಯಾನೇಜ್‌ಮೆಂಟ್ ಕೋರ್ಸ್‌ಗಳತ್ತ ಆಕರ್ಷಿತರಾಗುತ್ತಿರುವುದು ವಿಶೇಷ.
ಆರ್ಥಿಕ ಅಸ್ಥಿರತೆ ಮತ್ತು ರಾಜಕೀಯ ಬದಲಾವಣೆಗಳು ಭಾರತೀಯ ವಿದ್ಯಾರ್ಥಿಗಳನ್ನು ಹೊಸ ದೇಶಗಳತ್ತ ಹುಡುಕಾಟ ನಡೆಸುವಂತೆ ಮಾಡಿದೆ. ಅಮೆರಿಕಾದ ಶಿಕ್ಷಣ ಸಂಸ್ಥೆಗಳಿಗೆ ಭಾರತೀಯರೇ ದೊಡ್ಡ ಆದಾಯದ ಮೂಲವಾಗಿದ್ದು, ಈ ಕುಸಿತ ಅಲ್ಲಿನ ವಿಶ್ವವಿದ್ಯಾಲಯಗಳಲ್ಲಿ ಭೀತಿ ಮೂಡಿಸಿದೆ.
