ಸಾಮಾನ್ಯವಾಗಿ ಎಲ್ಲರೂ ಚಿನ್ನವನ್ನು ಇಷ್ಟಪಡುತ್ತಾರೆ. ಆದರೆ, ಕಳೆದ ಕೆಲವು ತಿಂಗಳುಗಳಿಂದ ಚಿನ್ನದ ಬೆಲೆ (Gold Rate) ನಿರಂತರವಾಗಿ ಹೆಚ್ಚುತ್ತಿರುವುದರಿಂದ ಸಾಮಾನ್ಯ ಜನರಿಗೆ ಚಿನ್ನ ಖರೀದಿಸುವುದು ಕಷ್ಟವಾಗಿದೆ. ಇಂತಹ ಸಂದರ್ಭದಲ್ಲಿ ಭಾರತದ ಯಾವ ವ್ಯಕ್ತಿಯ ಬಳಿ ಹೆಚ್ಚು ಚಿನ್ನವಿದೆ ಎನ್ನುವ ಕುತೂಹಲ ಎಲ್ಲರಲ್ಲೂ ಇರುತ್ತದೆ. ಅದರಲ್ಲೂ ಭಾರತದ ಯಾವ ನಟನ ಬಳಿ ಅತಿ ಹೆಚ್ಚು ಬಂಗಾರವಿದೆ ಎಂಬ ಅಚ್ಚರಿಯ ಸುದ್ದಿ ಇಲ್ಲಿದೆ.
ಅತಿ ಹೆಚ್ಚು ಚಿನ್ನ ಹೊಂದಿರುವ ನಟ ಬಿಗ್ ಬಿ
ವರದಿಗಳ ಪ್ರಕಾರ, ಭಾರತದಲ್ಲಿ ಅತಿ ಹೆಚ್ಚು ಚಿನ್ನ ಹೊಂದಿರುವ ನಟ ಬೇರೆ ಯಾರೂ ಅಲ್ಲ, ಅದುವೇ ಬಾಲಿವುಡ್‌ನ ಶೆಹನ್‌ಶಾ ಅಮಿತಾಬ್ ಬಚ್ಚನ್. ಎಂಬತ್ತರ ದಶಕದ ನಂತರವೂ ಸತತ ಚಿತ್ರಗಳಲ್ಲಿ ನಿರತರಾಗಿರುವ ಅಮಿತಾಬ್, ಬಾಲಿವುಡ್‌ನಲ್ಲಿ ಅತಿ ಹೆಚ್ಚು ಆಸ್ತಿ ಹೊಂದಿರುವ ನಾಯಕರಲ್ಲಿ ಒಬ್ಬರು.
ಚುನಾವಣಾ ಅಫಿಡವಿಟ್‌ನಿಂದ ಹೊರಬಿದ್ದ ಸತ್ಯ
2024ರಲ್ಲಿ ಜಯಾ ಬಚ್ಚನ್ ಅವರು ಸಲ್ಲಿಸಿದ ಚುನಾವಣಾ ಅಫಿಡವಿಟ್‌ನಲ್ಲಿ ತಮ್ಮ ಮತ್ತು ಪತಿ ಅಮಿತಾಬ್ ಬಚ್ಚನ್ ಅವರ ಆಸ್ತಿ ವಿವರಗಳನ್ನು ಬಹಿರಂಗಪಡಿಸಿದ್ದಾರೆ. ಈ ವರದಿಯ ಪ್ರಕಾರ ಬಚ್ಚನ್ ದಂಪತಿ ಬಳಿ ಇರುವ ಆಭರಣಗಳ ಮೌಲ್ಯ ಬೆರಗುಗೊಳಿಸುವಂತಿದೆ:
ಅಮಿತಾಬ್ ಬಚ್ಚನ್: ಇವರ ಬಳಿ ಸುಮಾರು 54.77 ಕೋಟಿ ರೂ. ಮೌಲ್ಯದ ಚಿನ್ನದ ಆಭರಣಗಳಿವೆ.
ಜಯಾ ಬಚ್ಚನ್: ಇವರ ಬಳಿ 40.97 ಕೋಟಿ ರೂ. ಮೌಲ್ಯದ ವಜ್ರ ಮತ್ತು ಚಿನ್ನದ ಆಭರಣಗಳಿವೆ.
ಒಟ್ಟು ಮೊತ್ತ: ಈ ದಂಪತಿ ಬಳಿ ಒಟ್ಟಾರೆಯಾಗಿ 95 ಕೋಟಿ ರೂ.ಗಳಿಗೂ ಅಧಿಕ ಮೌಲ್ಯದ ಆಭರಣಗಳಿವೆ ಎನ್ನಲಾಗಿದೆ.
ದಕ್ಷಿಣದತ್ತ ಬಿಗ್ ಬಿ ಪಯಣ
83ನೇ ವಯಸ್ಸಿನಲ್ಲಿಯೂ ಅಮಿತಾಬ್ ಬಚ್ಚನ್ ಅವರು ಸಿನೆಮಾ ರಂಗದಲ್ಲಿ ಸಕ್ರಿಯರಾಗಿದ್ದಾರೆ. ಹಿಂದಿ ಚಿತ್ರಗಳ ಜೊತೆಗೆ ದಕ್ಷಿಣ ಭಾರತದ ಚಿತ್ರರಂಗದಲ್ಲಿಯೂ ಅವರು ಮಿಂಚುತ್ತಿದ್ದಾರೆ. ವಿಶೇಷವೆಂದರೆ, ಕನ್ನಡದ ಅಮೃತಧಾರೆ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದ ಅಮಿತಾಬ್, ರಮೇಶ್ ಅರವಿಂದ್ ನಿರ್ದೇಶನದ ಬಟರ್ ಫ್ಲೈ ಚಿತ್ರದ ಹಾಡೊಂದಕ್ಕೆ ಧ್ವನಿ ಕೂಡ ನೀಡಿದ್ದಾರೆ.
ಒಟ್ಟಾರೆಯಾಗಿ, ಬರೋಬ್ಬರಿ 54.77 ಕೋಟಿ ಮೌಲ್ಯದ ಚಿನ್ನಾಭರಣಗಳನ್ನು ಹೊಂದುವ ಮೂಲಕ ಅಮಿತಾಬ್ ಬಚ್ಚನ್ ಅವರು ಭಾರತದ ನಂಬರ್ 1 ‘ಗೋಲ್ಡನ್ ಸ್ಟಾರ್’ ಎನಿಸಿಕೊಂಡಿದ್ದಾರೆ.
