ದುಬೈ ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದ ಮಹಿಳಾ ಏಷ್ಯಾಕಪ್ 2026ರ ಫೈನಲ್‌ನಲ್ಲಿ ಶ್ರೀಲಂಕಾ ತಂಡವನ್ನು 72 ರನ್‌ಗಳಿಂದ ಮಣಿಸಿದ ಭಾರತ ದಾಖಲೆಯ 8ನೇ ಬಾರಿ ಚಾಂಪಿಯನ್ ಆಗಿದೆ. ಕಳೆದ ಆವೃತ್ತಿಯಲ್ಲಿ ಇದೇ ಶ್ರೀಲಂಕಾ ವಿರುದ್ಧ ಸೋತು ಟ್ರೋಫಿ ಕೈತಪ್ಪಿಸಿಕೊಂಡಿದ್ದ ಹರ್ಮನ್‌ಪ್ರೀತ್ ಕೌರ್ ಪಡೆ, ಈ ಬಾರಿ ಅದೇ ತಂಡವನ್ನು ಮಣಿಸಿ ಕಿರೀಟ ಮರಳಿ ಪಡೆದಿದೆ.
ಇದು ಮಹಿಳಾ ಏಷ್ಯಾಕಪ್‌ನ 10ನೇ ಆವೃತ್ತಿಯಾಗಿದ್ದು, ಭಾರತ ಈವರೆಗಿನ ಪ್ರತಿಯೊಂದು ಆವೃತ್ತಿಯಲ್ಲೂ ಫೈನಲ್ ತಲುಪಿರುವ ವಿಶೇಷ ದಾಖಲೆ ಹೊಂದಿದೆ.
ಮಂದಾನಾ-ಶಫಾಲಿ ಅಬ್ಬರ
ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ದುಕೊಂಡ ಭಾರತಕ್ಕೆ ಸ್ಮೃತಿ ಮಂದಾನಾ ಮತ್ತು ಶಫಾಲಿ ವರ್ಮಾ ಉತ್ತಮ ಆರಂಭ ನೀಡಿದರು. ಆರಂಭದಿಂದಲೇ ರನ್ ವೇಗ ಹೆಚ್ಚಿಸಿಕೊಂಡ ಈ ಜೋಡಿ ಮೊದಲ ವಿಕೆಟ್‌ಗೆ 129 ರನ್‌ಗಳ ಭರ್ಜರಿ ಜೊತೆಯಾಟ ನೀಡಿತು.
ಸ್ಮೃತಿ ಮಂದಾನಾ 39 ಎಸೆತಗಳಲ್ಲಿ 5 ಬೌಂಡರಿ ಹಾಗೂ 3 ಸಿಕ್ಸರ್‌ಗಳೊಂದಿಗೆ 59 ರನ್ ಗಳಿಸಿದರು. ಮತ್ತೊಂದೆಡೆ ಶಫಾಲಿ ವರ್ಮಾ ಕೂಡ ಅದೇ 39 ಎಸೆತಗಳಲ್ಲಿ 9 ಬೌಂಡರಿ ಮತ್ತು 2 ಸಿಕ್ಸರ್‌ಗಳ ನೆರವಿನಿಂದ 68 ರನ್ ಸಿಡಿಸಿದರು.
129 ರನ್‌ಗಳಾಗುವಷ್ಟರಲ್ಲಿ ಕೇವಲ 3 ರನ್‌ಗಳ ಅಂತರದಲ್ಲಿ ಇಬ್ಬರೂ ವಿಕೆಟ್ ಒಪ್ಪಿಸಿದರು. ಆರಂಭಿಕ ಜೋಡಿ ಪೆವಿಲಿಯನ್ ಸೇರಿದ ಬಳಿಕ ಭಾರತದ ರನ್ ವೇಗ ಸ್ವಲ್ಪ ಕುಗ್ಗಿತು.
ರಿಚಾ ಘೋಷ್ 13 ಎಸೆತಗಳಲ್ಲಿ 17 ರನ್ ಗಳಿಸಿದರೆ, ಅಂತಿಮ ಹಂತದಲ್ಲಿ ಗುಣಾಲನ್ ಕಮಲಿನಿ ಕೇವಲ 5 ಎಸೆತಗಳಲ್ಲಿ ಅಜೇಯ 15 ರನ್ ಸಿಡಿಸಿದರು. ಈ ಕೊಡುಗೆಯಿಂದ ಭಾರತ 20 ಓವರ್‌ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 183 ರನ್‌ಗಳ ಸವಾಲಿನ ಮೊತ್ತ ಕಲೆಹಾಕಿತು.
183 ರನ್‌ಗಳ ಗುರಿ ಬೆನ್ನತ್ತಿದ ಶ್ರೀಲಂಕಾಗೆ ಆರಂಭದಲ್ಲೇ ಭಾರತ ಬೌಲರ್‌ಗಳು ಒತ್ತಡ ಹೇರಿದರು. ಇಮೇಶಾ ದುಲಾನಿ ಕೇವಲ 4 ರನ್‌ಗೆ ವಿಕೆಟ್ ಕಳೆದುಕೊಂಡರು.
ನಾಯಕಿ ಚಾಮರಿ ಅಟಪಟ್ಟು ಆರಂಭದಲ್ಲಿ ರನ್ ಗಳಿಸಲು ಪರದಾಡಿದರೂ ಬಳಿಕ ಇನ್ನಿಂಗ್ಸ್‌ಗೆ ವೇಗ ನೀಡಲು ಪ್ರಯತ್ನಿಸಿದರು. ಆದರೆ ದೊಡ್ಡ ಮೊತ್ತದ ಒತ್ತಡದ ನಡುವೆ ಹೆಚ್ಚು ಹೊತ್ತು ಕ್ರೀಸ್‌ನಲ್ಲಿ ನಿಲ್ಲಲು ಅವರಿಗೆ ಸಾಧ್ಯವಾಗಲಿಲ್ಲ. 32 ಎಸೆತಗಳಲ್ಲಿ 36 ರನ್ ಗಳಿಸಿದ್ದ ಚಾಮರಿ ವಿಕೆಟ್ ಒಪ್ಪಿಸಿದರು.
ಚಾಮರಿ ಔಟಾದ ಬಳಿಕ ಶ್ರೀಲಂಕಾದ ಚೇಸ್ ಮತ್ತಷ್ಟು ಕಷ್ಟವಾಯಿತು. ಮಧ್ಯಮ ಕ್ರಮಾಂಕದ ಬ್ಯಾಟರ್‌ಗಳು ಭಾರತದ ಬೌಲಿಂಗ್ ದಾಳಿಗೆ ಉತ್ತರ ನೀಡಲು ವಿಫಲರಾದರು. ಅಂತಿಮವಾಗಿ ಶ್ರೀಲಂಕಾ 20 ಓವರ್‌ಗಳಲ್ಲಿ 111 ರನ್‌ಗಳಿಗೆ ಆಲೌಟ್ ಆಯಿತು.
https://x.com/BCCIWomen/status/2099194448316182540
ಭಾರತದ ಪರ ಶ್ರೀ ಚರಣಿ ಅದ್ಭುತ ಬೌಲಿಂಗ್ ಪ್ರದರ್ಶನ ನೀಡಿ 4 ವಿಕೆಟ್ ಕಬಳಿಸಿದರು. ದೀಪ್ತಿ ಶರ್ಮಾ 3 ವಿಕೆಟ್ ಪಡೆದು ಲಂಕಾ ಬ್ಯಾಟಿಂಗ್ ಬೆನ್ನೆಲುಬು ಮುರಿದರು.
ಕಳೆದ ಬಾರಿಯ ಸೋಲಿಗೆ ಭಾರತದಿಂದ ಉತ್ತರ
ಕಳೆದ ಆವೃತ್ತಿಯಲ್ಲಿ ಶ್ರೀಲಂಕಾ ವಿರುದ್ಧ ಸೋತು ಏಷ್ಯಾಕಪ್ ಟ್ರೋಫಿಯಿಂದ ವಂಚಿತವಾಗಿದ್ದ ಭಾರತಕ್ಕೆ ಈ ಗೆಲುವು ವಿಶೇಷವಾಗಿದೆ. ಈ ಬಾರಿ ಫೈನಲ್‌ನಲ್ಲೇ ಲಂಕಾ ತಂಡವನ್ನು ಮಣಿಸಿ 8ನೇ ಬಾರಿ ಪ್ರಶಸ್ತಿ ಗೆದ್ದಿರುವುದು ತಂಡದ ಪ್ರಾಬಲ್ಯವನ್ನು ಮತ್ತೊಮ್ಮೆ ತೋರಿಸಿದೆ.
ಟೂರ್ನಿಯಲ್ಲಿ ಭಾರತ ಆರಂಭದಿಂದಲೇ ಉತ್ತಮ ಪ್ರದರ್ಶನ ನೀಡಿತ್ತು. ಲೀಗ್ ಹಂತದಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನವನ್ನು ಸೋಲಿಸಿ ಅಗ್ರಸ್ಥಾನ ಪಡೆದಿದ್ದ ತಂಡ, ಸೆಮಿಫೈನಲ್‌ನಲ್ಲಿ ಬಾಂಗ್ಲಾದೇಶವನ್ನು 40 ರನ್‌ಗಳಿಂದ ಮಣಿಸಿ ಫೈನಲ್ ಪ್ರವೇಶಿಸಿತ್ತು.
ಫೈನಲ್‌ನಲ್ಲೂ ಅದೇ ಲಯ ಮುಂದುವರಿಸಿದ ಭಾರತ, ಬ್ಯಾಟಿಂಗ್‌ನಲ್ಲಿ ಮಂದಾನಾ-ಶಫಾಲಿ ಜೋಡಿಯ ಅಬ್ಬರ ಹಾಗೂ ಬೌಲಿಂಗ್‌ನಲ್ಲಿ ಶ್ರೀ ಚರಣಿ-ದೀಪ್ತಿ ಶರ್ಮಾ ಅವರ ಪರಿಣಾಮಕಾರಿ ದಾಳಿಯ ನೆರವಿನಿಂದ ಶ್ರೀಲಂಕಾವನ್ನು ಮಣಿಸಿತು.
ಭಾರತ: 20 ಓವರ್‌ಗಳಲ್ಲಿ 183/5
ಸ್ಮೃತಿ ಮಂದಾನಾ 59 (39), ಶಫಾಲಿ ವರ್ಮಾ 68 (39), ರಿಚಾ ಘೋಷ್ 17 (13), ಕಮಲಿನಿ 15* (5)
ಶ್ರೀಲಂಕಾ: 20 ಓವರ್‌ಗಳಲ್ಲಿ 111 ಆಲೌಟ್
ಚಾಮರಿ ಅಟಪಟ್ಟು 36 (32), ನಿಲಂಕ್ಷಿಕಾ ಸಿಲ್ವಾ 22 (16), ವಿಶ್ಮಿ ಗುಣರತ್ನೆ 20 (22)
ಭಾರತದ ಬೌಲಿಂಗ್: ಶ್ರೀ ಚರಣಿ 4 ವಿಕೆಟ್, ದೀಪ್ತಿ ಶರ್ಮಾ 3 ವಿಕೆಟ್.
