ತೆಲಂಗಾಣದ ಹೈದರಾಬಾದ್ ನಗರದ ರಸ್ತೆಯೊಂದರಲ್ಲಿ ಇಬ್ಬರು ದ್ವಿಚಕ್ರ ವಾಹನ ಸವಾರರ ನಡುವೆ ನಡೆದ ಮಾತಿನ ಚಕಮಕಿಯ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿದ್ದು, ಸಾರ್ವಜನಿಕರಲ್ಲಿ ಇರಬೇಕಾದ ಕನಿಷ್ಠ ನಾಗರಿಕ ಪ್ರಜ್ಞೆ ಮತ್ತು ವೈಯಕ್ತಿಕ ಹೊಣೆಗಾರಿಕೆಯ ಕುರಿತಂತೆ ದೊಡ್ಡ ಚರ್ಚೆಯನ್ನು ಹುಟ್ಟುಹಾಕಿದೆ.
ರಸ್ತೆಯಲ್ಲಿ ಚಲಿಸುತ್ತಿದ್ದ ಸವಾರನೊಬ್ಬ ತ್ಯಾಜ್ಯವನ್ನು ಎಸೆದಿದ್ದನ್ನು ಮತ್ತೊಬ್ಬ ಸವಾರ ಪ್ರಶ್ನಿಸಿದ್ದೇ ಈ ಗಲಾಟೆಗೆ ಕಾರಣವಾಗಿದೆ. ಘಟನೆಯನ್ನು ಮೊಬೈಲ್‌ನಲ್ಲಿ ಸೆರೆಹಿಡಿದ ಲೈಶ್ರಮ್ ಬೆನೆಡಿಕ್ಸನ್ ಸಿಂಗ್ ಎಂಬ ಯುವಕ, ಬಳಿಕ ಈ ವಿಡಿಯೋವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿದ್ದಾರೆ.
ಸಿಂಗ್ ಅವರ ವಿವರಣೆಯ ಪ್ರಕಾರ, ಮುಂದಿನ ವಾಹನದಲ್ಲಿದ್ದ ಸವಾರ ರಸ್ತೆಯಲ್ಲೇ ಪ್ಲಾಸ್ಟಿಕ್ ಹೊದಿಕೆಯನ್ನು ಎಸೆದಿದ್ದಾನೆ. ಇದನ್ನು ಗಮನಿಸಿದ ಸಿಂಗ್, ತಕ್ಷಣವೇ ಕೆಳಗೆ ಬಿದ್ದಿದ್ದ ಆ ತ್ಯಾಜ್ಯವನ್ನು ಕೈಗೆತ್ತಿಕೊಂಡು, ಇದನ್ನು ನನ್ನ ಬಳಿಯೇ ಇಟ್ಟುಕೊಂಡು ಮುಂದೆ ಸರಿಯಾದ ಕಸದ ಬುಟ್ಟಿಗೆ ಹಾಕುತ್ತೇನೆ ಎಂದು ಆ ಸವಾರನಿಗೆ ತಿಳಿಸಿದ್ದಾರೆ. ಆದರೆ, ತನ್ನ ತಪ್ಪನ್ನು ತಿದ್ದಿಕೊಳ್ಳುವ ಬದಲು ಆ ಸವಾರ ತೀವ್ರವಾಗಿ ಸಿಟ್ಟಿಗೆದ್ದು, ಸಿಂಗ್ ಅವರೊಂದಿಗೆ ವಾಗ್ವಾದಕ್ಕೆ ಇಳಿದಿದ್ದಾನೆ.
ಜಾಲತಾಣದಲ್ಲಿ ಹರಿದಾಡುತ್ತಿರುವ ಆ ವಿಡಿಯೋದಲ್ಲಿ ಆ ಸವಾರ, ರಸ್ತೆಯಲ್ಲಿ ಬಿದ್ದಿರುವ ಇತರ ಕಸವನ್ನೂ ಎತ್ತು, ನಿನ್ನ ವಾಹನದಿಂದ ರಸ್ತೆಗೆ ಮಣ್ಣು ಬೀಳುತ್ತಿದೆಯಲ್ಲ ಅದನ್ನೂ ಬಾಚಿಕೊಂಡು ಹೋಗು ಎಂದು ಗೇಲಿ ಮಾಡಿ ಅಪಹಾಸ್ಯ ಮಾಡುವುದು ದಾಖಲಾಗಿದೆ. ಜೊತೆಗೆ, ನಗರ ಪಾಲಿಕೆಯವರು ನಿನಗೇನಾದರೂ ರಸ್ತೆ ಸ್ವಚ್ಛಗೊಳಿಸುವ ಕೆಲಸ ಕೊಟ್ಟಿದ್ದಾರೆಯೇ ಎಂದು ಲೇವಡಿ ಮಾಡಿದ್ದಾನೆ.
ಇದಕ್ಕೆ ತೀಕ್ಷ್ಣವಾಗಿ ಉತ್ತರಿಸಿದ ಸಿಂಗ್, ಬೇರೆಯವರು ರಸ್ತೆಯಲ್ಲಿ ಕಸ ಎಸೆದಿದ್ದಾರೆ ಎಂಬ ಕಾರಣಕ್ಕೆ ನೀವೂ ಎಸೆಯುವುದು ಸರಿಯೇ? ಇತರರು ತಪ್ಪು ಮಾಡುತ್ತಾರೆ ಎಂದು ನಾವೂ ಅದನ್ನೇ ಸಮರ್ಥಿಸಿಕೊಳ್ಳಲು ಸಾಧ್ಯವೇ ಎಂದು ನೇರವಾಗಿ ಪ್ರಶ್ನಿಸಿದ್ದಾರೆ.
ವಿಡಿಯೋ ಜತೆಗೆ ತಮ್ಮ ಅನಿಸಿಕೆಯನ್ನು ಬರೆದುಕೊಂಡಿರುವ ಸಿಂಗ್, ಮೊಬೈಲ್ ಕ್ಯಾಮೆರಾ ಆನ್ ಮಾಡುವ ಮೊದಲು ನಾನು ಅತ್ಯಂತ ಸಮಾಧಾನದಿಂದಲೇ ಆತನಿಗೆ ಬುದ್ಧಿ ಹೇಳಲು ಯತ್ನಿಸಿದೆ. ಆದರೆ ಆತ ತನ್ನ ವಾಹನವನ್ನು ನಿಲ್ಲಿಸಿ ಜಗಳಕ್ಕೆ ಮುಂದಾಗಿದ್ದನು. ಯಾವಾಗ ನಾನು ಕ್ಯಾಮೆರಾ ಆನ್ ಮಾಡಿದೆನೋ, ಆಗ ಆತನ ವರ್ತನೆ ಸಂಪೂರ್ಣವಾಗಿ ಬದಲಾಯಿತು ಎಂದು ವಿವರಿಸಿದ್ದಾರೆ. ನಮ್ಮ ದೇಶದಲ್ಲಿ ಸ್ವಚ್ಛತೆ ಮತ್ತು ನಾಗರಿಕ ಪ್ರಜ್ಞೆಯ ಕೊರತೆ ಇರುವುದನ್ನು ಕಂಡು ಮನಸ್ಸಿಗೆ ತೀವ್ರ ನೋವಾಗಿದೆ ಎಂದು ಅವರು ಬೇಸರ ವ್ಯಕ್ತಪಡಿಸಿದ್ದು, ಈ ವಿಡಿಯೋ ನೋಡಿ ನೆಟ್ಟಿಗರು ಕಸ ಎಸೆದ ಸವಾರನ ಬೇಜವಾಬ್ದಾರಿಯುತ ವರ್ತನೆಗೆ ಭಾರಿ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
